މިއަހަރުގެ ރިޔާސީ އިންތިޚާބު ބާއްވާއިރު، މިހާ އޮތް އިލެކްޝަން ކޮމިޝަނަށް ފުރިހަމައަށް އިތުބާރު ކުރާކަމުގައި އިދިކޮޅު ޕްރިގްރެސިވް ކޯލިޝަނުން ބުނެފިއެވެ.
އިލެކްޝަންސް ކޮމިޝަނުން މިއަދު ބޭއްވި ޤައުމީ ލަފާދޭ ކޮމެޓީގައި ވާހަކަ ދައްކަވަމުން ޕީއެންސީގެ ރައީސް އިބްރާހިމް ޝުޖާ ވިދާޅުވީ މިހާރު އޮތް އިލެކްޝަންސް ކޮމިޝަނަކީ މިނިވަންކަމާއިއެކު ރިޔާސީ އިންތިޚާބު ބޭއްވޭނެވަރުގެ ކޮމިޝަނެއްކަން ގަބޫލު ކުރައްވާކަމަށެވެ. އަދި މިހާތަނަށް ރާއްޖޭގައި ބޭއްވި އެންމެ މިނިވަން އިންތިޚާބު ބޭއްވިފައިވަނީވެސް މިހާރުގެ ކޮމިޝަންގެ ރައީސް ފުއާދު ތައުފީގް ކޮމިޝަންގެ ރައީސްކަމުގައި މީގެ ކުރިން ހުންވައިގެން ބޭއްވި އިންތިޚާބު ކަމުގައި އޭނާ ވަނީ ވިދާޅުވެފައެވެ.
ޝުޖާ ވިދާޅުވީ ކޮމިޝަނަށް ފުރިހަމަ އިތުބާރު އޮތްނަމަވެސް ސަރުކާރުން އިންތިޚާބަށް ނުފޫޒު ފޯރުވުމަށް ކުރަމުންދާ މަސައްކަތްތަކާއިމެދު ކަންބޮޑުވާކަމަށެވެ. އެގޮތުން ފުލުހުންގެ ޤާނޫނަށާއި، އިންތިޚާބުތަކާއި ބެހޭ ޤާނޫނުތަކަށް ހުށަހަޅާފައިވާ އިސްލާހުތަކާއިމެދު ނުހަނު ކަންބޮޑުވާކަމަށް އޭނާ ވިދާޅުވިއެވެ.
މިބައްދަލުވުމުގައި ޕީޕީއެމްގެ ނައިބް ރައީސް އަހުމަދު ޝިޔާމް ވިދާޅުވީ އިންތިޚާބު މިނިވަންކަމާއިއެކު ބޭއްވުމަށް ވަރަށް ގިނަ މަސައްކަތްތަކެއް ކުރަންޖެހޭކަމަށެވެ. އެންމެ މުހިންމު މަސައްކަތަކީ ސަރުކާރުން އިންތިޚާބަށް ނުފޫޒު ފޯރުވުމަށް ހިންގާ ކަންކަން ހުއްޓުވުންކަމަށެވެ. އިންތިޚާބަށް ސަރުކާރުގެ ވަސީލަތްތައް ބޭނުން ކުރުމަކީ ޖާގަ ދީގެންވާނެ ކަމެއް ނޫންކަމަށް ޝިޔާމް ވިދާޅުވިއެވެ.
އޭނާ ވިދާޅުވީ ރާއްޖޭގެ އިދިކޮޅު ލީޑަރު ޖަލަށް ލައިގެން އެމަނިކުފާނަށް ރިޔާސީ އިންތިޚާބުގައި ވާދަކުރުމުގެ ޖާގަ ނުދިނުމަށް ކުރަމުންދާ މަސައްކަތަކީ ބަލައި ގަނެވޭނެ ކަމެއް ނޫންކަމަށެވެ. އަދި ކޮމިޝަނުން މިކަމަށް އިތުރު ވިސްނުމަކަށް ދާންޖެހޭކަމަށްވެސް ޝިޔާމް ވިދާޅުވިއެވެ.
