ރިޝަވަތު ދިނުމާ މަނީ ލޯންޑަރިންގެ ކުށުގައި 11 އަހަރަށް ޖަލަށް ލާފައިވާ ކުރީގެ ރައީސް ޔާމިން މިނިވަންކުރުމަށް ގޮވާލާ މާލެއާއި ރާއްޖޭގެ ބައެއް ރަށްތަކުގައި އިދިކޮޅު ޕީޕީއެމްއިން މިއަދު ހަވީރު މުޒާހިރާ ކޮށްފިއެވެ.

ރާއްޖޭގެ ބައެއް ރަށްތަކުގައި އިދިކޮޅުން އިންތިޒާމްކުރި މި މުޒާހިރާ މިއަދު ހަވީރު ކުރިޔަށް ގެންގޮސްފައިވާއިރު، މާލޭގައިވެސްވަނީ، ރަސްފަންނު ސަރަހައްދުގައި މުޒާހިރާ ކުރިޔަށް ގެންގޮސްފައެވެ. ރަސްފަންނުގައި ބޭއްވުނު މުޒާހިރާގައި ޕީޕީއެމްގެ ލީޑަރޝިޕްގެ ބައެއް ބޭފުޅުންވެސްވަނީ ބައިވެރި ވެފައެވެ.

މާލޭގެ އިތުރުން މުޒާހިރާ ކުރިޔަށް ގޮސްވައިވާ ބައެއް އަތޮޅުތަކުގެ ތެރޭގައި ޏ. ފުވައްމުލަކާއި އއ އަތޮޅުގެ ބައެއް ރަށްތަކާ ގދ. އަތޮޅުގެ ބައެއް ރަށްތަކާއި ހއ. އަތޮޅުގެ ބައެއް ރަށްތަކާއި ހދ. ރ. އަދި ށ. އަތޮޅުގެ ބައެއް ރަށްތައް ހިމެނެއެވެ.

މާލޭގައި މިމުޒާހިރާ މިއަދު ކުރިޔަށް ދިޔައިރު، ފުލުހުންވަނީ ބައެއް ސަރަހައްދުތަކަށް ނުވަދެވޭނެހެން ބަންދު ކޮށްފައެވެ. މުޒާހިރާގެ ބައިވެރިން އަޑު އުފުލާފައިވަނީ ޔާމިނަށް ކޮށްފައިވަނީ "ހަރާމް ހުކުމެއް" ކަމަށްބުނެ، ވަގުތުން މިނިވަން ކުރުމަށެވެ.

ވ. އާރަށް ކުއްޔަށް ދިނުމުގައި ރިޝްވަތު ބަލައިގަތުމުގެ އިތުރުން ރިޝްވަތުން ހޯދި ފައިސާ ލޯންޑަރ ކުރުމުގެ ކުށުގައި ޔާމިން 11 އަހަރަށް ޖަލަށްލާން ހުކުމް ކޮށްފައިވަނީ ފާއިތުވި ޑިސެމްބަރުމަހުގެ 25 ވަނަ ދުވަހުއެވެ. އެހެންނަމަވެސް ކުރިމިނަލް ކޯޓުން އިއްވި މިހުކުމް މިހާރުވަނީ ހައި ކޯޓުގައި އިސްތިއުނާފް ކޮށްފައެވެ.

ހައި ކޯޓުގައި އިސްތިއުނާފް ކުރި ހުކުމްގެ ބައެއް ލިޔުންތައް ފުރުހަމަ ކުރުމުގެ ފުރުސަތު އިދިކޮޅު ވަކީލުންނަށް ކޯޓުން މިހާރުވަނީ އަރުވާފައެވެ.