ރާއްޖޭގެ ރައްޔިތުންނަށް ފަސޭހައިން ދަތުރުކުރެވޭނެ ގޮތަކަށް ދަތުރުފަތުރުގެ ނިޒާމު އާއުސްމިންތަކަކަށް ގެންގޮސްދެއްވީ ރައީސް އިބްރާހިމް މުހައްމަދު ޞާލިހުކަމަށް ޓްރާސްޕޯޓް މިނިސްޓަރ އައިޝަތު ނަހުލާ ވިދާޅުވެއްޖެއެވެ.
ފަރެސްމާތޮޑާ އެއަރޕޯޓް ހުޅުވުމަށް ބޭއްވި ޚާއްސަ ރަސްމިއްޔާތުގައި ރައީސް ޞާލިހަށް ވަރަށް ބޮޑަށް ތަޢުރީފް ކުރައްވައި ވާހަކަ ދައްކަވަމުން ނަހުލާ ވިދާޅުވީ އުތުރާއި ދެކުނު ހިމެނޭ ގޮތުން މުޅި ރާއްޖެ ތަރައްގީ ކުރުމުގެ ތަސައްވުރެއް ގެންގުޅުއްވައި، ޒަމާނުންސުރެ ރާއްޖޭގައި ދަތުރުފަތުރު ކުރުމުގައި ދިވެހި ރައްޔިތުން އުފުލަމުން ދިޔަ ތަކުލީފު މިއަދު މިވަނީ މާޒީ އާއި އެކުވެ ގޮސް އެންމެނަށް ދަތުރުފަތުރުގެ ލުއި ފަސޭހަކަން ލިބިފަ ކަމަށެވެ.
މީގެ ކުރިން އެއްރަށުން އަނެއް ރަށަށް ދަތުރުކުރުމުގައި އުފުލަމުންދިޔަ ވޭނާއި އުދަގޫ ގޮތްތަކުން ރައްޔިތުން ސަލާމަތްކޮށް، ފަސޭހަ ނިޒާމެއްގެ ތެރެއިން ދަތުރުކުރެވޭނެ އިންތިޒާމު ހަމަޖައްސައި ދެއްވީ ރައީސް ޞާލިހުކަމަށް ނަހުލާ ވިދާޅުވިއެވެ.
އުތުރާއި ދެކުނު ހިމެނޭ ގޮތުން މުޅި ރާއްޖެ ތަރައްގީ ކުރުމުގެ ތަސައްވުރެއް ގެންގުޅުއްވައި، ޒަމާނުންސުރެ ރާއްޖޭގައި ދަތުރުފަތުރު ކުރުމުގައި ދިވެހި ރައްޔިތުން އުފުލަމުން ދިޔަ ތަކުލީފު މިއަދު މިވަނީ މާޒީ އާއި އެކުވެ ގޮސްފަ. އެންމެނަށް ދަތުރުފަތުރުގެ ލުއި ފަސޭހަކަން ލިބިއްޖެ. ރާއްޖޭގެ ރައްޔިތުންނަށް ފަހި ދިރިއުޅުމެއް ހޯއްދަވައިދެއްވާ ގައުމު ބިނާކުރުމުގައި ތިޔަ ދައްކަވާ ސާބިތުކަމަށާއި އަޅުގަނޑުމެންނަށް މަނިކުފާނު ދެއްވާ ހިތްވަރަށް، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހަށް ދިވެހި ރައްޔިތުންގެ ނަމުގައި ޝުކުރު ދަންނަވަން.
– ނަހުލާ ވިދާޅުވިއެވެ.
އާރުޓީއެލްގެ ހިދުމަތް ހަރުދަނާކަން ފާހަގަ ކުރެއްވުމުގެ ގޮތުން ނަހުލާ ވިދާޅުވީ ދަތުރުފަތުރުގެ ނިޒާމްގެ ދަށުން ހެޔޮ އަގުގައި ފަސޭހަކަމާއެކު ހަލުއި ސްޕީޑްގައި އެއްރަށުން އަނެއް ރަށަށް ހިދުމަތްތައް ހޯދުމަށާއި ވަޒީފާގެ ބޭނުންތަކަށް ދެވޭނެގޮތް ހަމަޖައްސައިދިނުމުގެ ގޮތުން ދަތުރުފަތުރުގެ ނިޒާމް އެއް ވިއުގަ އަކުން ގުޅާލެވިއްޖެ ކަމަށެވެ.
މިއާއިއެކު އެންމެ ބޮޑު ބަދަލެއް އައީ ޒުވާނުންގެ ވަޒީފާގެ ބާޒާރަށް ކަމަށާއި، އެތައް ޒުވާނުނަކަށް ވަޒީފާގެ ފަހި ފުރުސަތުތަކެއް ތަނަވަސްވެ އިގުތިސޯދީ ބާރުވެރިކަންވެސް އިތުރުވެފައިވާކަމަށް ނަހުލާ ވިދާޅުވިއެވެ.
ޒުވާނުން ބާރުވެރި ކުރެވިއްޖެ. ރައްޔިތުންނަށް ފޯރުންތެރި އަދި ފަހި ދިރިއުޅުމެއް ގާއިމް ކުރެވިއްޖެ. އަމިއްލަ ރަށުގައި ތިބެގެން ފައިދާ ހޯދޭނެ މަގު ތަނަވަސްވެ ގައުމުގެ އިގްތިސާދީ ދުވެލި ހަލުވިކަމާއިއެކު ކުރިޔަށްގޮސް ތަރައްގީގައި އުތުރާއި ދެކުނުގެ ރައްޔިތުންނަށް އެއްހަމައެއްގައި މަންފާ އާއި ނަފާ ލިބޭނެގޮތަށް އަތޮޅުތައް ބައްޓަން ކުރެވިއްޖެ.
– ނަހުލާ ވިދާޅުވިއެވެ.
ރައީސް ޞާލިހަށް ތައުރީފް ކުރައްވައި ނަހުލާ ރޭގެ ޖަލްސާގައި ވާހަކަ ދެއްކެވިއިރު، ނަހުލާ ވަނީ ކުރިއަށް އޮތް ރިޔާސީ އިންތިޚާބުގައި ޖުމްހޫރީ ޕާޓީން ވަކިން ވާދަކުރުމަށް ކައުންސިލްގައި ނެގުނު ވޯޓުގައި ބައިވެރިވެ ޖޭޕީން ވަކިން ނިކުންނަށް ވޯޓު ދެއްވާފައެވެ.
