މިއަހަރު ބާއްވާ ރިޔާސީ އިންތިޚާބު ކާމިޔާބު ކުރާނީ ރައީސް ޔާމީނާއިއެކު އިދިޖޮޅު ޕްރޮގްރެސިވް ކޯލިޝަނުން ކަމުގައި ޕީއެންސީގެ ރައީސް އަބްދުއްރަހީމް ވިދާޅުވެއްޖެއެވެ.

ސިޔާސީ މަސްރަހުގައި ގިނަ ކަންތައްތަކެއް ބަދަލުވަމުންދާ މިދަނޑިވަޅުގައި އަދުރޭ ވިދާޅުވީ ސެޕްޓެމްބަރު މަހު އޮންނަ ރިޔާސީ އިންތިޚާބުގައި ޕްރޮގްރެސިވް ކޯލިޝަނުން ވާދަކުރާނެކަމަށެވެ. އިދިކޮޅުން ވާދަކުރާއިރު، ރިޔާސީ ކެނޑިޑޭތަކީ ރައީސް ޔާމީންކަމަށެވެ. އަދި އިންތިޚާބު އިދިކޮޅު ޕްރޮގްރެސިވް ކޯލިޝަނުން ފަސޭހަ ކަމާއިއެކު ކާމިޔާބު ކުރާނީ ރައީސް ޔާމީނާއިއެކު ގައިކަމަށް އަދުރޭ ވިދާޅުވިއެވެ.

ޕީ.ޕީ.އެމް/ޕީ.އެން.ސީ ކޯލިޝަނުން މިއަހަރު ބާއްވާ ރިޔާސީ އިންތިޚާބުގައި ވާދަކުރާނެ. ރިޔާސީ ކެނޑިޑޭޓްކީ ރައީސް ޔާމީން. ރިޔާސީ އިންތިޚާބު ކާމިޔާބު ކުރާނީ ރައީސް ޔާމީންއާ އެކު މި ކޯލިޝަނުން.

– އަދުރޭ ވިދާޅުވިއެވެ.

އަދުރޭ މިހެން ވިދާޅުވިއިރު ރައީސް ޔާމީން ގެންދަވަނީ 11 އަހަރުގެ ޖަލު ހުކުމެއް ތަންފީޒު ކުރައްވަންނެވެ. ޤާނޫނު ބުނާގޮތުން ރައީސް ޔާމީން ޖަލުން މިނިވަން ވެގެން ނޫންގޮތަކަށް އިންތިޚާބުގައި ވާދަކުރުމުގެ ޖާގައެއް ނެތެވެ. ރިޔާސީ އިންތިޚާބަށް 6 މަސްދުވަހަށް ވެފައިވާއިރުވެސް އިދިކޮޅުގެ އުންމީދަކީ ރައީސް ޔާމީން މިނިވަންވުމެވެ. ނަމަވެސް އަދިވެސް އިސްތިއުނާފުގެ މަރުހަލާވެސް ފެށިފައިނުވެއެވެ.

އިދިކޮޅުން ނެރޭނެ ކެނޑިޑޭޓެއް ސާފު ނުވާއިރު، ވެރިކަން ކުރާ މައި ޕާޓީ އެމްޑީޕީން ރައީސް ޞާލިހު ވަނީ ވާދަކުރަން ނިންމާފައެވެ. ރައީސް ޞާލިހާއިއެކު އަދާލަތާއި، އެމްޑީއޭ އޮތްއިރު، ޖުމްހޫރީ ޕާޓީން ވަނީ ވަކިން ރިޔާސީ އިންތިޚާބުގައި ވާދަ ކުރުމަށް ނިންމާފައެވެ. މިއާއިއެކު ސިޔާސީ މަސްރަހުގެ ވާދަވެރިކަން ބޮޑުވެ ސިޔާސީ ގޮތުން ގިނަ ބަދަލުތަކެއް ކުރިއަށް އޮތް ދުވަސްތަކުގައި ފެނުމަކީ ކައިރިކަމެކެވެ.