މާލެ ސިޓީ ކައުންސިލްއިން ފަށާފައިވާ މިސްކިތްތައް މަރާމާތު ކުރުމުގެ މަސައްކަތްތައް ރަމަޟާން މަހަށް ނިމޭނެކަމަށާއި މިކަމަށް ބޮޑު ޚަރަދުތަކެއް ކުރަންޖެހޭކަަމަށް ކައުންސިލުން ބުނެފިއެވެ.
މާލެ ސިޓީގައި ހުރި މަރާމާތު ކުރަން ޖެހިފައިވާ މިސްކިތްތަކާއި އެކު ހުޅުމާލޭގެ ފުރަތަމަ ފިޔަވަހީގެ މިސްކިތްތަކާއި ވިލިމާލޭގެ މިސްކިތަތްތައް މަރާމާތު ކުރުމުގެ މަސައްކަތް މާލޭ ސިޓީ ކައުންސިލުން އަންނަނީ މިހާރުވެސް ކުރަމުންނެވެ. އަދި ކައުންސިލްގެ އުންމީދަކީ ރަމަޞާންމަހަށް މިސްކިތްތަކުގެ މަރާމާތުގެ މަސައްކަތްތައް ނިންމުންކަމަށް ބުނެފައިވެއެވެ.
ސިޓީ ކައުންސިލްއިން ހާމަކޮށްފައިވާ ގޮތުގައި އެކި މިސްކިތްތަކުގައި ކުރިއަށް ދަނީ މަރާމާތުގެ އެކި މަސައްކަތްތައްކަމަށާއި، ކުދި އަދި ބޮޑެތި މަސައްކަތްތައް ހިމާރު ގާތްގަނޑަަކަށް ނިމިފައިވާކަމަށް ކައުންސިލުން ހާމަކޮށްފައިވެއެވެ. މީގެ ތެރެއިން ވިލިމާލޭގައި އެންމެ މައްސަލަ ބޮޑުވި "ބިއްރި" މިސްކިތުގެ މަރާމާތުގެ މަސައްކަތް މުޅިހެން މިހާރު ނިމިފައިވާ ކަމަށް ކައުންސިލުން މަޢުލޫމާތުދެއެވެ. އަދި އާ މަރާމާތާއެކު ރޯދައަށް އެ މިސްކިތް ބޭނުންކުރެވޭނެ ކަމަށް ކައުންސިލުން ބުނެފައިވެއެވެ.
އެގޮތުން އާސަހަރާ މިސްކިތުގެ ސީލިން މަރާމާތުކުރުމާއި ލައިޓުތައް ބަދަލުކުރުމުގެ އިތުރުން ފާރު މަރާމާތުކުރުމުގެ މަސައްކަތްތައް ކުރިއަށްދާ ކަމަށް ސިޓީ ކައުންސިލުން ވަނީ ބުނެފައެވެ. މިސްކިތްތައް މަރާމާތު ކުރަމުން ގެންދަނީ “ޗާލު މިސްކިތް” ފަންޑުން ލިބުނު ފައިސާއިން ކަމަށްވާއިރު، އެ ފަންޑަށް ލިބުނު އެއް މިލިއަން ރުފިޔާ ހިމެނޭހެން މިސްކިތްތައް މަރާމާތު ކުރުމަށް އަށް މިލިއަން ރުފިޔާ ހޭދަވާކަމަށް މާލެ ސިޓީޣެ މޭޔަރާއި ހަވާލާދީ ބައެއް މީޑިޔާތަކުގައި ބުނެފައިވެއެވެ.
ޗާލު މިސްކިތް ފަންޑުން ލިބުނު އެއް މިލިއަން ނުލައި، ދެން ޚަރަދުވާ ހަތް މިލިއަން ރުފިޔާ އަކީ ކައުންސިލުގެ އަމިއްލަ ބަޖެޓުން ޚަރަދުކުރާ ފައިސާ ކަމަށްވެސް މޭޔަރު ވިދާޅުވެފައިވެއެވެ.
