ހުއްދަނެތި މާލޭގައި މީހުން ދިރިއުޅޭ ސަރަހައްދުތަކުގައި އެލްމިނިއަމާއި ދަގަނޑާއި ލޮއި ފަދަ މައުދަންތައް ގުދަން ކުރާ ފަރާތްތަކުން އެކަމަށް ހުއްދަ ހޯދަން އެންވަޔަރަމެންޓް ޕްރޮޓެކްޝަން އެޖެންސީ (އީޕީއޭ)އިން 1 މަސް ދުވަހުގެ ފުރުސަތެއް ދީފިއެވެ.
މިކަމާއި ގުޅިގެން އީޕީއޭއިން ބުނީ މާލެ ސިޓީގައި މީހުން ދިރިއުޅޭ ސަރަހައްދުތަކުގައި މައުދަން ގުދަން ކުރުމާއި ސާފު ކުރުމާއި ރީސައިކަލް ކުރުން ފަދަ މަސައްކަތްތައް ކުރުމުގެ ސަބަބުން އެ ސަރަހައްދުތަކުގައި ދިރިއުޅޭ މީހުންނަށް ތަފާތު އެކި އުދަނގޫތައްވާ ކަމަށާއި އަދި ސިއްހީ ގޮތުން އެމީހުން ނުރައްކަލަކަށް ހުށަހެޅިފައިވާ ކަމުގެ ޝަކުވާތައް ލިބޭ ކަމަށެވެ.
އެ އެޖެންސީން ބުނީ ކުނި މެނޭޖް ކުރުމުގެ ގަވާއިދުގެ ދަށުން، ކުނި ގުދަން ކުރުން ނުވަތަ ރީސައިކަލް ކުރުމުގެ މަސައްކަތްތައް ކުރެވެނީ އެކަމަށް ހާއްސަ ހުއްދަ ހޯދައިގެންކަމަށާއި އެ ހުއްދަ ނެތި އެފަދަ މަސައްކަތްތަކެއް ކުރުމަކީ އަދަބު ލިބޭ ކުށެއް ކަމަށެވެ.
މީގެއިތުރުން އެފަދަ މަސައްކަތްތަކީ ކުނީގެ މިންވަރު މަދު ކުރުމަށް ކުރާ ކަމެއް ނަމަވެސް، އެ މަސައްކަތްތައް ކުރަން ވާނީ އަޅަންޖެހޭ ސަލާމަތީ ފިޔަވަޅުތައް އެޅުމާއެކު، ނަގަންޖެހޭ އެންމެހާ ހުއްދަތައް ވެސް ނަގައިގެން ކަމަށްވެސް އީޕީއޭއިން ބުނެފައިވެއެވެ.
އެކަން ފާހަގަކޮށް 30 ދުވަސްތެރޭ ހޯދަން ޖެހޭ ހުއްދަތައް ހޯދައި އަޅަން ޖެހޭ ސަލާމަތާއި ރައްކާތެރިކަމުގެ ފިޔަވަޅުތައް އަޅުމަށް އީޕީއޭއިން ވަނީ އެލްމިނިއަމާއި ދަގަނޑާއި ލޮއި ފަދަ މައުދަންތައް ގުދަން ކުރާ ފަރާތްތަކަށް އަންގާފައެވެ.
