ރާއްޖޭގެ މާކެޓަށް މައިކްރޮސޮފްޓް ސޮލިއުޝަންތަކެއް ތަޢާރަފްކުރުމަށް ދިރާގާއި އެޗްވަން ސްރީލަންކާއާއި ގުޅިގެން ނިންމައިފިއެވެ.
އެޗްވަންއަކީ ސްރީލަންކާގެ ލީޑިން ޓިއަރ 1 މައިކްރޮސޮފްޓް ލައިސަންސިން ސޮލިއުޝަންސް އަދި ކްލައުޑް ސޮލިއުޝަންސް ޕާޓްނަރެކެވެ.
ދިރާގުން ބުނީ އެކުންފުނީގެ އަމާޒަކީ ކަސްޓަމަރުންގެ ފުޅާވަމުން އަންނަ ބޭނުންތައް ފުއްދައިދިނުމަށް ފަސޭހަ ވަން ސްޓޮޕް ސޮލިއުޝަނެއް ފޯރުކޮށްދިނުންކަމަށެވެ. އެގޮތުން މި ޕާޓްނަރޝިޕް މެދުވެރިކޮށް ދިރާގާއި އެޗް ވަން ގުޅިގެން މައިކްރޮސޮފްޓްގެ އުފެއްދުންތަކާއި ޚިދުމަތްތައް ރާއްޖޭގެ އެކިކަންކޮޅުތަކަށް ފޯރުކޮށްދިނުމަށް ހަމަޖެހިފައިވާކަމަށް ދިރާގުން ބުނެއެވެ.
މިޕާޓްނަރޝިޕް މެދުވެރިކޮށް ފޯރުކޮށްދިނުމަށް ހަމަޖެހިފައިޥާ ޚިދުމަތްތަކުގެ ތެރޭގައި މޮޑަރން ވަރކް ކްލައުޑް، މޮޑަރން ވަރކް ސެކިއުރިޓީ، އެޕްސް އެންޑް އިންފްރާ (އަޒުއަރ)، މޮޑަރން އެޕް ޑިވެލޮޕްމަންޓް އަދި ޑޭޓާ އެންޑް އެނަލިޓިކްސް ފަދަ މައިކްރޮސޮފްޓް ޓެކްނޮލޮޖީތައް ހިމެނެއެވެ.
މިކަމާއި ބެހޭގޮތުން ދިރާގުގެ ސީއީއޯ އަދި އެމްޑީ އިސްމާއިލް ރަޝީދު ވިދާޅުވީ މައިކްރޮސޮފްޓާއި ޓެލެކޮމިއުނިކޭޝަންގެ ފުޅާ ދާއިރާއެއްގައި ހިދުމަތްތައް ގެނެސްދިނުމަށް އެޗް ވަން ސްރީލަންކާއާ އެކު ޕާޓްނާޝިޕް ގެނައުމަކީ ލިބޭ ބޮޑު އުފަލެއްކަމަށެވެ. އަދި މިޕާޓްނަރޝިޕް މެދުވެރިކޮށް ދިރާގުގެ އިނޮވޭޝަނާއި އެންމެ ފަހުގެ ޓެކްނޮލޮޖީ ބޭނުންކޮށްގެން ރާއްޖޭގެ މާކެޓަށް ޚިދުމަތް ފޯރުކޮށްދިނުމަށް ބޮޑު އަހައްމިއްޔަތުކަމެއް ދޭކަމަށްވެސް އޭނާ ވިދާޅުވިއެވެ.
ދިރާގުން ދަނީ ޓެކްނޮލަޖީއާއި ކޮމިއުނިކޭޝަންގެ ދާއިރާއިން އެކުންފުނިން ފޯރުކޮށްދޭ ޚިދުމަތްތައް ފުޅާކުރުމަށް ގިނަ މަސައްކަތްތަކެއް ކުރަމުންނެވެ.
