ހޯމަ ދުވަހު ފަރެސްމާތޮޑާ އެއަރޕޯޓަށް ޓެސްޓު ފްލައިޓް ޖައްސަނީ

ކަމާއި ގުޅުންހުރި މުވައްސަސާތަކުން ކުރިން ހާމަ ކޮށްފައިވާ ގޮތުގައި، އެއަރޕޯޓުގެ ކޮންޓްރެކްޓަރކަމަށްވާ، އެމްޓީސީސީގެ އަމާޒަކީ މި މާރޗްމަހުގެ 15 ވަނަ ދުވަހުގެ ކުރިން އެއްޕޯޓުގެ އެންމެ ފަހުގެ މަސައްކަތްތައް ނިންމާލުން ކަމުގައެވެ. މިގޮތުން އެމްޓީސީސީން، އެއަރޕޯޓުގެ އެންމެ ފަހުގެ މަސައްކަތްތައް ބާރު ސްޕީޑުގައި ކުރިޔަށް ގެންދާއިރު، އެއަރޕޯޓު ނިމުމުގެ ކުރިން ކުރިޔަށް ގެންދާންޖެހޭ އިންސްޕެކްޝަންގެ މަސައްކަތްތައްވެސް ކަމާއި ގުޅުންހުރި އިދާރާތަކުން މިހާރުވަނީ ފަށާފައެވެ.

މިއެއަރޕޯޓުގެ އެންމެ ފަހުގެ މަސައްކަތް ކުރިޔަށް ދާގޮތުގެ މައުލޫމާތު ނޫސްވެރިންނާ ހިއްސާ ކުރައްވަމުން، އެމްޓީސީސީގެ ސީއީއޯ އާދަމް އާޒިމް ވިދާޅުވެފައިވާ ގޮތުގައި، މި ޕްރޮޖެކްޓުގައި ހިމެނޭ އުމްރާނީ ތަރައްގީއާއި ގުޅުންހުރި ހުރިހާ މަސައްކަތްތަކެއް މިހާރު ވަނީ ނިމިފައެވެ.  އެއަރޕޯޓަށް ބޭނުންވާ ފަޔަރ ލޮރީވެސް ވަނީ އެރަށަށް ގެންދެވިފައެވެ.

ފަރެސްމާތޮޑާ އެއަރޕޯޓްގެ ޢަމަލީ މަސައްކަތް ފަށާފައިވަނީ 2021ވަނަ އަހަރުގެ ޖެނުއަރީ މަހުއެވެ. މި އެއަރޕޯޓް ތަރައްޤީކުރަނީ ކައިރީގައި ހުރި ކުދި ރަށްތަކެއް ހިއްކައިގެންނެވެ. އެއީ 19.9 ހެކްޓަރުގެ ބިމުގެ ސަރަޙައްދެކެވެ. ބިން ހިއްކުމުގެ މަސައްކަތް 2019ވަނަ އަހަރު ނިންމި ނަމަވެސް، ދިގު މުއްދަތެއްވަންދެން އެއަރޕޯޓްގެ ޢަމަލީ މަސައްކަތް އޮތީ ނުފެށިއެވެ. އެއަރޕޯޓްގެ ޢަމަލީ މަސައްކަތް ކުރުމަށް އެމްޓީސީސީއާ ހަވާލުކުރީ 2021 ވަނަ އަހަރުގެ ނޮވެމްބަރުމަހުއެވެ.

އެމްޓީސީސީން ޢަމާޒު ހިފާފައިވަނީ އެއަރޕޯޓްގެ ޢަމަލީ މަސައްކަތްތައް މުޅިން ނިންމާ، ޖުލައި މަސް ތެރޭގައި ސަރުކާރާއި އެއަރޕޯޓް ހަވާލުކުރުމަށެވެ. އެއަރޕޯޓް ތަރައްޤީކުރަނީ އެތެރޭގެ އުދުހުންތަކަށް ޚާއްސަކޮށްގެންނެވެ. ރަންވޭއަކީ 1200 މީޓަރުގެ ދިގު ރަންވޭއެކެވެ. ފަރެސްމާތޮޑާ އެއަރޕޯޓްގެ ޓަރމިނަލްވެސް ތަރައްޤީކުރަނީ ތަފާތު ސްޓްރަކްޗަރއަކަށެވެ. މިއީ ޕްރީ ފެބްރިކޭޓެޑް އިމާރާތަކެވެ.

މި ޕްރޮޖެކްޓަކީ ސަރުކާރުން 144.8 މިލިއަން ޚަރަދުކޮށްގެން ކުރިއަށްގެންދާ މަޝްރޫޢެކެވެ.