ރައްޔިތުންގެ މަޖިލީހުގެ ކ. ގުރައިދޫ ދާއިރާގެ މެންބަރު ކުރައްވަމުން ދާއިރާ ތަމްސީލް ކުރައްވަނިކޮށް އަވަހާރަވެވަޑައިގަތް މެންބަރު އިބްރާހިމް ރިޒާގެ ހަނދާނުގައި ތައުބީނުގެ ޖަލްސާއެއް ބޭއްވުމަށް އިދިކޮޅު ޕީޕީއެމް/ ޕީއެންސީ ކޯލިޝަނުން ނިންމައިފިއެވެ.
ރިޒާގެ ހަނދާނުގައި ބާއްވާ އެ ޖަލްސާ އޮންނާނީ މިރޭ ގުރައިދޫގައެވެ. މިޖަލްސާއަކީ އިދިކޮޅު ލީޑަރު އަދި ކުރީގެ ރައީސް ޔާމީންގެ އެދިވަޑައިގަތުމުގެ ބާއްވާ ޖަލްސާއެކެވެ. މި ޖަލްސާއަށް ވީހާވެސް ގިނަ ފަރާތްތަކުން ގުރައިޫއަށް ދިއުމަށް އިދިކޮޅުން ވަނީ އެދިފައެވެ.
އިދިކޮޅު މައި ޕާޓީ، ޕީޕީއެމްއަށް ނިސްބަތްވާ ރިޒާއަކީ ރައްޔިތުންގެ މަޖިލީހުގައި އެންމެ ގިނަ ދުވަސްވީ އެއް މެންބަރެވެ. މިއީ އޭނާ މަޖިލީހުގެ މެންބަރުކަން ކުރައްވާތާ ތިން ވަނަ ދައުރެވެ. ގާނޫނީ ވަކީލެއްގެ ގޮތުގައި ވެސް ޕްރެކްޓިސް ކުރައްވަމުން ގެންދެވި ރިޒާ ވަނީ 18 ވަނަ ރައްޔިތުންގެ މަޖިލީހުގެ މެމްބަރެއްގެ ހައިސިއްޔަތުން ޖުޑީޝަލް ސާވިސް ކޮމިޝަންގެ މެމްބަރުކަން އަދާކުރައްވައިފައެވެ. އަދި އޭރު އެ ކޮމިޝަންގެ ނައިބު ރައީސްކަން ވެސް އޭނާ ކުރެއްވިއެވެ.
ދެ ހާސް ނަވާރަ ވަނަ އަހަރު ބޭއްވި ރައްޔިތުންގެ މަޖިލީހުގެ އިންތިހާބުގައި ކ. ގުރައިދޫ އަށް އުފަން ރިޒާ، އެ ދާއިރާގެ ގޮނޑި ކާމިޔާބު ކުރެއްވީ އެމްޑީޕީގެ ކެންޑިޑޭޓު، އާދިލް ސަލީމްއާ ވާދަކުރައްވައިގެންނެވެ. ރިޒާއަކީ މިހާރު ހިނގަމުންދާ މަޖިލީހުގެ މިނިވަން މުއައްސަސާތަކުގެ ކޮމިޓީ އާއި ޖުޑިޝަރީ ކޮމިޓީގެ މެމްބަރެކެވެ. އަދި އެމްއެމްޕީއާރްސީ ހިޔާނާތުގެ މައްސަލަ ބެލި ސަލާމަތީ ހިދުމަތްތަކާބެހޭ ކޮމިޓީ އާއި ޖުޑީޝިއަރީ ކޮމިޓީގެ ޖޮއިންޓް ކޮމިޓީގައި މަސައްކަތް ކުރެއްވެވިއެވެ.
ހިނގަމުން މިދާ ރައްޔިތުންގެ މަޖިލީހުގެ ކޮމަންޑޫ ދާއިރާގެ ކުރީގެ މެމްބަރު ހުސައިން ވަހީދު ޑިސެމްބަރު 14، 2021 ގައި އަވަހާރަވިއެވެ. ގާނޫނުއަސާސީގެ 78 މާއްދާގައި ބުނެފައިވާ ގޮތުން މެންބަރެއްގެ ގޮނޑި ހުސްްވާ ތާރީހުން ފެށިގެން ހަ މަސް ދުވަހުގެ ތެރޭގައި އެ ދާއިރާއެއްގެ ބައި އިލެކްޝަން ބާއްވަންޖެހެއެވެ. ގުރައިދޫ ދާއިރާގައި ހިމެނޭ ރަށްތަކަކީ، ގުރައިދޫގެ އިތުރުން މާފުއްޓާއި ގުޅިއެވެ.
ގުރައިދޫ ދާއިރާއަށް ޕީޕީއެމްގެ ޓިކެޓު، އަވަހާރަވެފައިވާ އެދާއިރާގެ ކުރީގެ މެންބަރު އިބްރާހީމް ރިޒާގެ ކޮއްކޮ، ޙުސައިން ރިޒާއަށް ވަނީ ދީފައެވެ.
