ޖުމުހުރީ ޕާޓީގެ ލީޑަރު ގާސިމް އިބުރާހިމްއާއި އެމްއާރުއެމްގެ ރައީސް ފާރިސް މައުމޫން ބައްދަލު ކުރައްވައިފިއެވެ. މައުލޫމާތު ލިބިފައިވާ ގޮތުގައި ގާސިމްއާއި ފާރިސް ބައްދަލު ކުރައްވާފައި ވަނީ ކުރިޔަށް އޮތް ރިޔާސީ އިންތިޚާބާއި ގުޅޭގޮތުން މަޝްވަރާ ކުރުމަށެވެ. އެހެންނަމަވެސް މި މަޝްވަރާތަކުގެ އިތުރު ތަފްސީލެއް އަދި ލިބިފައެއް ނުވެއެވެ.
ގާސިމްއާއި ފާރިސް ބައްދަލު ކުރައްވާފައިވާއިރު، ގާސިމް އިބުރާހިމްގެ އިތުރުން އޭނާގެ ބައެއް އެޑްވައިޒަރުންވެސް ގެންދަވަނީ، ކުރިޔަށް އޮތް ރިޔާސީ އިންތިޚާބާއި ގުޅޭގޮތުން ސިޔާސީ ބައެއް ފަރާތްތަކާ ބައްދަލު ކުރައްވަމުންނެވެ. މިގޮތުން ގާސިމް އިބުރާހިމް އަމިއްލަ ފުޅަށް ރައީސް ސާލިހާއި ބައްދަލު ކުރައްވާފައިވާއިރު، ގާސިމްގެ އެޑްވައިޒަރު އިލްހާމް އަހުމަދު ވަނީ ތިން ފަހަރެއްގެ މަތިން ނަޝީދުއާއި ބައްދަލު ކުރައްވާފައެވެ.
އަދި ރިޔާސީ އިންތިޚާބުގެ މަޝްވަރާތަކަށް އަދާލަތު ޕާޓީގެ ރައީސް ޝެއިޚް އިމްރާންވެސް ވަނީ ގާސިމް އިބުރާހިމްއާއި ބައްދަލު ކުރައްވާފައެވެ.
އެހެންނަމަވެސް މިހާތަނަށް ރިޔާސީ އިންތިޚާބާއި ގުޅޭ އެއްވެސް ނިންމެވުމެއް ގާސިމް ނިންމަވާފައި ނުވެއެވެ. އެހެންނަމަވެސް، ޖޭޕީގެ ކައުންސިލުންވަނީ ކޯލިޝަން ހެދުމުގެ ހުރިހާ އިޚްތިޔާރެއް ޕާޓީގެ ލީޑަރާއި ހަވާލު ކޮށްފައެވެ.
އަދި އެމްއާރުއެމްވެސް ކުރިޔަށް އޮތް ރިޔާސީ އިންތިޚާބަށް ކޯލިޝަން ހަދާނެ ޕާޓީއެއް އަދި ނިންމާފައެއް ނުވެއެވެ. މައުލޫމާތު ލިބިފައިވާ ގޮތުގައި، އެމްއާރުއެމްގެ ލީޑަރޝިޕްގެ އިސް ބައެއް ބޭފުޅުން ރައީސް ސާލިހާއެކު ކޯލިޝަން ހެދުމަށް ތާއީދު ނުކުރައްވާއިރު، އެޕާޓީގެ ފަރާތުން ސަރުކާރުގެ އިސް މަގާމްތަކުގައި ތިއްބެވި ބައެއް ބޭފުޅުން ގެންދަވަނީ ރައީސް ސާލިހާއެކު ކޯލިޝަން ހެދުމަށް ތާއީދު ކުރައްވަމުންނެވެ.
އެހެންނަމެވެސް އެމްއާރުއެއިން ބުނެފައިވަނީ އެޕާޓީން ގޮތެއް ނިންމާނީ ރައީސް މައުމޫނާ ރައީސް ސާލިހާ ދެބޭފުޅުންގެ ބަދަލުވުމަކަށް ފަހުގައި ކަމަށެވެ.
