ބީއެމްއެލް އެޕް މެދުވެރިކޮށް ކުރާ މުއާމަލާތްތަކުގެ ސެކިއުރިޓީ އިތުރަށް ހަރުދަނާކުރުމަށް ކުރަމުންދާ މަސައްކަތުގެ ތެރެއިން، ހުރިހާ ކިއުއާރު ޕޭމަންޓްތަކަށްވެސް ވަން ޓައިމް ޕާސްވޯޑްސް (އޯޓީޕީސް) ބޭނުންކުރަންޖެހޭ ގޮތަށް ބޭންކް އޮފް މޯލްޑިވްސް އިން ހަމަޖައްސައިފިއެވެ.

ބީއެމްއެލްއިން ހާމަކޮށްފައިވާ ގޮތުގައި، އެޕް އަޕްޑޭޓް ކުރުމާއެކު، ބީއެމްއެލް މޯބައިލް ބޭންކިންގ އެޕް އިން ކަސްޓަމަރުންކުރާ ކޮންމެ އަދަދެއްގެ 'ސްކޭން ޓު ޕޭ' ޓްރާންސެކްޝަންތަކަށް އޯތެންޓިކޭޓަރ، އެސްއެމްއެސް ނުވަތަ އީމެއިލް މެދުވެރިކޮށް ލިބޭ އޯޓީޕީ ޖަހަންޖެހޭ ގޮތަށް މިހާރުވަނީ ބަދަލު ގެނެސްފައި ކަމުގައެވެ.

ބޭންކުން އިތުރަށް ބުނެފައިވަނީ، އާންމުކޮށް ހިނގަމުން އަންނަ ސްކޭމްތަކުން ކަސްޓަމަރުން ރައްކާތެރި ކުރުމަށް އަންނަނީ ގިނަގުނަ މުހިންމު ފިޔަވަޅުތަކެއް އަޅަމުން ކަމުގައެވެ.

މިގޮތުން 2022 ވަނަ އަހަރުގެ ޑިސެންބަރު މަހުގައި، ބޭންކުގެ އިންޓަރނެޓް ބޭންކިންގ އަދި މޮބައިލް ބޭންކިންގ ހިދުމަތް މެދުވެރިކޮށް ކުރާ ހުރިހާ މުއާމަލާތްތަކަށް ބޭނުންވާ އޯޓީޕީ އޮތެންޓިކޭޓަރ އެޕް މެދުވެރިކޮށް ޖެނެރޭޓްކުރެވޭ ގޮތަށް ހަމަޖައްސާފައިވާކަމަށްވެސް ބުނެފައި ވެއެވެ. ބެންކުން ބުނެފައިވަނީ، މިއީ އީމެއިލް ކޮންޕްރަމައިޒްވެފައިވާ ހާލަތްތަކުގައިވެސް ކަސްޓަމަރުންނަށް އިތުރު ރައްކާތެރިކަމެއް ދިނުމުގެ ގޮތުން އެޅުނު ފިޔަވަޅެއް ކަމުގައެވެ.

މީގެ އިތުރުންވެސް، ސެކިއުރިޓީ ފީޗަރސްތައް އިތުރަށް ހަރުދަނާ ކުރުމަށް އަޅަމުންދާ އިތުރު ފިޔަވަޅުތަކެއް މި މާރިޗު މަސް ނިމުމުގެ ކުރިން ތައާރަފްކުރާނެ ކަމަށްވެސް ބޭންކުން ބުނެފައި ވެއެވެ. ސްކޭމްތައް ހިންގާ ފަރާތްތަކުން އެމީހުންގެ އުކުޅުތައް އެކި ދުވަސްވަރު އެކި ގޮތްގޮތަށް ބަދަލަކުރަމުން އަންނައިރު، ބޭންކުން އިލްތިމާސް ކޮށްފައިވަނީ، ސްކޭމް އުކުޅުތައް ދެނެގަނެ، ޒާތީ މައުލޫމާތު އެއްވެސް ފަރާތަކާ ހިއްސާ ނުކުރުމަށެވެ.

މިގޮތުން ކަސްޓަމަރުންނަށް ސަމާލުވުމަށް ބޭންކުން ފާހަގަ ކޮށްފައިވާ ބައެއް ކަންކަން:

• ބީއެމްއެލް އިން ވެބްސައިޓް ލިންކް ހިމެނޭހެން އެސްއެމްއެސް އެއް ނުކުރާނެއެވެ. އެސްއެމްއެސް އައުމުން އެއީ ބީއެމްއެލް އިން ފޮނުވި އެސްއެމްއެސް އެއް ކަމުގައި ހީވިނަމަވެސް އެއްވެސް ލިންކަކަށް ނުފިތުން. އަދި އެއްވެސް މައުލޫމާތެއް ހިއްސާނުކުރުން. ބީއެމްއެލް ނުވަތަ އިތުބާރު ކުރެވޭ އެހެނިހެން ފަރާތްތަކުގެ ނަން 'ސްޕޫފް' ކޮށް ( ބީއެމްއެލް ނުވަތަ އެހެން އިދާރާއެއްގެ ނަން އޮންނަ ގޮތަށް ބޭނުންކުރުން) އެސްއެމްއެސް އަދި ފޯނު ކޯލުކުރެވޭކަން ހަނދާނުގައި ބެހެއްޓުން.

• އީމެއިލް އަދި އެސްއެމްއެސް މެދުވެރިކޮށް އަންނަ ޝައްކުކުރެވޭ މެސެޖް، ޕޮޕް އަޕް ވިންޑޯސް، ލިންކް އަދި އެޓޭޗްމަންޓް ނުހުޅުވުން.

• ވަން ޓައިމް ޕާސްވޯޑް ނުވަތަ އޯޓީޕީ އަކީ ސެކިއުރިޓީ އަށް ބޭނުންކުރާ ވަސީލަތަކަށް ވީހިނދު، ސައްހަ މުއާމަލާތެއްކަމަށް ހީވި ނަމަވެސް އެއްވެސް ފަރާތަކާ އޯޓީޕީ ހިއްސާނުކުރުން.

• ބޭންކިންގ ޕާސްވޯޑް އަދި އީމެއިލް ޕާސްވޯޑް ދޭތެރެދޭ ތެރެއިން ބަދަލުކުރާށެވެ. ޕާސްވޯޑް ބަދަލުކުރާއިރު އެހެންފަރާތްތަކަށް ހިޔާރުކުރަން އުނދަގޫ ޕާސްވޯޑެއް ބޭނުންކުރުން.

• ބްރައުޒަރ ގައި އީމެއިލް އަދި ބޭންކިންގ ޕާސްވޯޑް ސޭވް ނުކުރުން. އީމެއިލް އެކައުންޓް ކޮންޕްރޮމައިޒް ވެއްޖެނަމަ، ސޭވްކޮށްފައިވާ ޔޫސަރނޭމް އަދި ޕާސްވޯޑްތައް ސްކޭމް ހިންގާ ފަރާތްތަކަށް ފަސޭހައިން އެކްސެސްވެވޭނެއެވެ.

• ވެބްސައިޓް ލިންކް ރަނގަޅަށް ޗެކް ކުރުން. އިންޓަރނެޓް ބޭންކިންގ ފަދަ ސެކުއަރ ސައިޓްތަކުގައި އެޑްރެސް ހިމެނޭތަނުގައި 'ލޮކް' (ތަޅެއް) ނިޝާނެއް ފެންނާނެއެވެ.

އެއްވެސް ލިންކެއް މެދުވެރުކޮށް އިންޓަރނެޓް ބޭންކިންގ އަށް ނުވަނުން. ސްކޭމް ކުރާ ފަރާތްތަކުން ޔޫސަރނޭމް އަދި ޕާސްވޯޑް ހޯދުމަށް އިންޓަރނެޓް ބޭންކިންގ އާއި ވައްތަރު ވެބް ޕޭޖް ހަދައިގެން މި މައުލޫމާތުތައް ހޯދައެވެ.

• ބޭންކުން ފޮނުވާ ނޯޓިފިކޭޝަން އަބަދުވެސް ބަލުން. ބީއެމްއެލް އިން ރަޖިސްޓްރީކޮށްފައިވާ އީމެއިލް އަށް، ލޮގިންވާ ކޮންމެ ފަހަރަކު އިންޓަރނެޓް ބޭންކިން ލޮގިން ނޮޓިފިކޭޝަން ފޮނުވާނެއެވެ. އަމިއްލައަށް ލޮގިންނުވާ ނޯޓިފިކޭޝަންއެއް އައިސްފިކަމުގައިވާނަމަ ނުވަތަ ލޮގިން އާ ބެހޭ މައުލޫމާތު އެހެން ފަރާތަކަށް ލިބިފައިވާ ކަމަށް ޝައްކު ކުރެވޭނަމަ، ވީހާވެސް އަވަހަކަށް ޕާސްވޯޑް ބަދަލުކުރުން.