ރާއްޖޭގެ 7 އަތޮޅެއްގައި އަޅާ 7 ހޮސްޕިޓަލަކަށް ކުވައިތު ފަންޑުން ފައިސާ ހަމަޖެހިފައިވާ ކަމުގައި ފިނޭންސް މިނިސްޓަރު އިބުރާހިމް އަމީރު ވިދާޅުވެއްޖެއެވެ.
ކޯވިޑްގެ ބަލިމަޑު ކަމުގެ ތެރޭގައި ރާއްޖެއަށް ގެނައުމަށް އޯޑަރުކުރި ވެންޓިލޭޓަރުތަކާއި ގުޅޭގޮތުން ތ. ވިލިފުށީ ދާއިރާގެ މެމްބަރު ހަސަން އަފީފު ކުރެއްވި ސުވާލަކަށް ޖަވާބުދާރީވުމަށް މިއަދު މަޖިލިހުގައި ވާހަކަ ދައްކަވަމުން އަމީރު ވިދާޅުވީ މި 7 ހޮސްޕިޓަލްތައް އެޅުމުގެ މަސައްކަތް ކުރިޔަށް އޮތް ހަފްތާއެއްހާ ދުވަހުގެ ތެރޭގައި ހަވާލު ކުރެވޭނެ ކަމަށެވެ.
މި 7 ހޮސްޕިޓަލް އަޅަން ނިންމާފައިވާ ރަށްތަކަކީ، ހދ. ހަނިމާދޫ، ށ. މިލަންދޫ، ކ. ތުލުސްދޫ، ވ. ފެލިދޫ އަދި ތ. ވިލުފުށީގައެވެ. މިއިން ކޮންމެ ހޮސްޕިޓަލަކީވެސް 30 އެނދުގެ ހޮސްޕިޓަލެކެވެ.
މި ހޮސްޕިޓަލްތަކުގެ މަސައްކަތްތަކާއި ގުޅޭގޮތުން މިއަދު މަޖިލިހުގައި މިލަންދޫ ދާއިރާގެ މެމްބަރު އަލީ ރިޒާ ކުރެއްވި ސުވާލަކަށް ޖަވާބު ދެއްވަމުން އަމީރު ވިދާޅުވީ މި ހޮސްޕިޓަލްތައް އެޅުމަށް މިހާރު ފައިސާ ހަމަޖެހިފައިވާ ކަމަށާއި، އަދި ޓެންޑަރ ކުރެވި އިވޭލުއޭޝަންގެ މަސައްކަތްތައްވެސް މިހާރު ނިމިފައިވާކަމުގައެވެ. އޭނާ ވިދާޅުވި ގޮތުގައި، މި ހަފްތާ ތެރޭގައި ހޮސްޕިޓަލް ޕްރޮޖެކްޓްތައް އެވޯޑްކޮށް، ނޯ އޮބްޖެކްޝަނަށް ކުވައިތު ފަންޑަށް ފޮނުވާނެ ކަމުގައެވެ.
މި ހޮސްޕިޓަލްތައް އަޅަށް ފިނޭންސް މިނިސްޓްރީން ހުޅުވާލީ ފާއިތުވެދިޔަ އަަހަރުގެ އެޕްރިލް މަހުގައެވެ.
