އެންމެ ކުޑަކޮށް ތަރައްޤީވެފައިވާ ޤައުމުތަކުގެ ލިސްޓުން މެދުފަންތީގެ ޢާމްދަނީ ލިބޭ ޤައުމަކަށް ހިޖުރަކުރުމަށް ރާއްޖެ ކުރި ދަތުރުގައި، އަދި މިބަދަލުގެ މަރުހަލާގައި، އިޤްތިޞާދީ ޙާލަތު ކުރިއެރުވުމަށް ޖުމްލަގޮތެއްގައި މަސައްކަތްކުރެވުނު ނަމަވެސް އިޤްތިޞާދު ނުރައްކަލަށް ހުށަހެޅިދާނެ ކަންކަމަށް އެހާބޮޑު ސަމާލުކަމެއް ދެވިފައި ނެތްކަމަށް ރައީސް ސާލިހު ވިދާޅުވެއްޖެއެވެ.
ރައީސް ސާލިހު މިހެން ވިދާޅުވީ ޤަޠަރުގެ ވެރިރަށް ދޯހާގައި ކުރިޔަށްދާ އ.ދ.ގެ އެންމެ ކުޑަކޮށް ތަރައްޤީވެފައިވާ ޤައުމުތަކުގެ ފަސްވަނަ ކޮންފަރެންސްގެ ޖެނެރަލް ޑިބޭޓްގައި އިއްޔެ ތަޤުރީރު ކުރައްވަމުންނެވެ.
އ.ދ.ގެ އެންމެ ކުޑަކޮށް ތަރައްޤީވެފައިވާ ޤައުމުތަކުގެ 5 ވަނަ ކޮންފަރެންސްގައި ވާހަކަ ދައްކަވަމުން ރައީސް ސާލިހު ވިދާޅުވީ ދިވެހިރާއްޖެ، މެދުފަންތީގެ ޢާމްދަނީ ލިބޭ ޤައުމަކަށް ހިޖުރަ ކުރުމާއެކު އޭގެ ކުރިން ހަމަޖެހިފައި ހުރި ބައެއް ޚާއްޞަ އިންތިޒާމުތަކާއި ލިބެމުންއައި ބައެއް އިނާޔަތްތައް މެދުކެނޑިގެން ނުދާނެކަން ކަށަވަރުކުރުމަށް ގިނަގުނަ މަސައްކަތްތަކެއް ކުރަންޖެހުނުކަމަށެވެ.
އަދި ޤައުމު ގުދުރަތީގޮތުން އުފެދިފައި އޮންނަ ގޮތުންނާއި ބޮޑުކުޑަމިނާއި ރަށްތައް ފެތުރިފައިވާ ގޮތާއި މޫސުމަށް އަންނަ ނޭދެވޭ ބަދަލުތަކާއި، އިޤްތިޞާދު ސިންދަފާތުވެފައި ނެތުމާއި ޑިވެލޮޕްމަންޓް ފައިނޭންސް އެކަށީގެންވާގޮތެއްގައި ލިބޭނެގޮތްތައް ހަމަޖެހިފައި ނެތުމާއި ޖިއޮޕޮލިޓިކަލް ޝޮކްތަކުގެ ސަބަބުން ކުރިމަތިލާންޖެހޭ ނާޒުކުކަން ފަދަ ކަންކަމަކީވެސް ރާއްޖެއަށް ކުރިމަތި ލާންޖެހިފައިވާ ބޮޑެތި ގޮންޖެހުންތަކުގެ ގޮތުގައިވެސް ރައީސް ސާލިހު ފާހަގަ ކުރައްވާފައި ވެއެވެ.
ރައީސް ސާލިހުގެ ވާހަކަފުޅުގައި، އެންމެ ކުޑަކޮށް ތަރައްޤީވެފައިވާ ޤައުމުތަކާއި ސިޑްސްގައި ހިމެނޭ ޤައުމުތަކަށް، މޫސުމަށް އަންނަ ބަދަލުތަކުގެ ސަބަބުން ކުރާ ނޭދެވޭ އަސަރުތައް ފާހަގަކުރައްވާ، މޫސުމަށް އަންނަ ބަދަލުތަކަށް ފިޔަވަޅުތައް އެޅުމަށް، ޖައްވަށް ބޭރުކުރާ ވިހަ ގޭސްތައް މަދުކުރުމާއި، މޫސުމަށް އަންނަ ބަދަލުތަކުން ލިބޭ ގެއްލުންތަކަށް ހޭނުމާއި ވިލުންވެރިކަން އިތުރުކުރުންފަދަ ކަންކަމަށް ބޭނުންވާނެ ކަމަށް އަންދާޒާ ކުރެވިފައިވާ މިންވަރަށް ފައިސާ ހަމަޖެހިގެން ނުދާކަންވެސް ފާހަގަ ކުރައްވާފައި ވެއެވެ.
އަދި މީގެ އިތުރުން، ފާއިތުވި ނޮވެމްބަރުމަހު ބޭއްވުނު ކޮޕް27ގެ ސަމިޓުގައި، ކުރިއަރާފައިވާ ޤައުމުތަކުން އެއްބަސްވި ގޮތަށް އެޤައުމުތަކުގެ ޒިންމާ އަދާކޮށް، "ލޮސް އެންޑް ޑެމޭޖް" ފަންޑު ޤާއިމުކުރުމުގެ މަސައްކަތް އަވަސްކޮށް، އަހަރަކު 100 ބިލިއަން ޑޮލަރުގެ ފައިނޭންސް ހަމަޖެއްސުމުގެ އަމާޒަށް ވާޞިލުވުމަށް އެ ޤައުމުތަކަށް ރައީސް ސާލިހުވަނީ ގޮވާލައްވާފައެވެ.
ރައީސް ސާލިހު ވަނީ އެންމެ ކުޑަކޮށް ތަރައްޤީވެފައިވާ ޤައުމުތަކުން، ވިލުންވެރިކަން އިތުރުކުރުމަށް މަސައްކަތްކުރާއިރު ގުޑް ގަވަނަންސްގެ ބޭނުން ހިފުމަށާއި ދެމެހެއްޓެނިވި ތަރައްޤީ ހޯދުމުގައި ދިރިއުޅުމުގެ ހުރިހާ ކަމެއްގައި ވެސް ހަމަހަމަ ގޮތެއްގައި އަދި މާނަހުރި ގޮތުގައި އަންހެނުންނާއި އަންހެން ކުދިންގެ ބައިވެރިވުން އިތުރުކުރުމަށް މިގައުމުތަކަށްވެސް އިލްތިމާސް ކުރައްވާފައެވެ.
އ.ދ.ގެ އެންމެ ކުޑަކޮށް ތަރައްޤީވެފައިވާ ޤައުމުތަކުގެ 5 ވަނަ ކޮންފަރެންސް ކުރިޔަށްދަނީ މާރިޗު މަހުގެ 5 އިން 9 ދުވަހަށް ޤަޠަރުގެ ވެރިރަށް ދޯހާގެ ޤަޠަރުގައެވެ. ކޮންމެ ދިހަ އަހަރަކުން އެއްފަހަރު ބާއްވާ މިކޮންފަރެންސް 2021 ވަނަ އަހަރު ފެށިގެން ކޮވިޑްގެ ބަލިމަޑުކަމާހުރެ ދެ ފަހަރެއްގެ މަތިން ފަސްކޮށްފައިވެއެވެ.
ކޮމެންޓު ފޮނުވާ