ޢަދާލަތު ޕާޓީއަކީ ސެކިއުލަރ ފަރާތްތަކާ ގުޅިގެން ލާދީނީ ފަލްސަފާއަށް ފާޅުގައި ވާގިދޭ ބައެއްކަމުގައި ދީނީ ޢިލްމުވެރިޔާ އައްޝައިޚް އާދަމް ނިޝާން ވިދާޅުވެއްޖެއެވެ.

ޢަދާލަތު ޕާޓީގެ ސިޔާސަތުތަކާއި ފަހަކަށްއައިސް އެޕާޓީގެ ޢަމަލުތަކާ ފާޅުގައި ދެކޮޅު ހައްދަވައި ފާޑު ވިދާޅުވާ ދީނީ ޢިލްމުވެރިންގެ ތެރެއިން ޝައިޚް ނިޝާނަކީ ފާހަގަކޮށްލެވޭ ބޭފުޅެޖެވެ. މިފަހަރު ޝައިޚް ނިޝާން ޢަދާލަތު ޕާޓީއަށް ފާޑު ވިދާޅުވީ ދީނީ މަދަނީ ޖަމްޢިއްޔާ ޖަމްޢިއްޔަތުއް ސަލަފަށް އިންޒާރުދީ ޢަދާތު ޕާޓީގެ ތަރުޖަމާނު ކުރެއްވި ޓްވީޓަކާ ގުޅިގެންނެވެ. ޖަމްޢިއްޔަތުއް ސަލަފުގެ ބައެއް ބޭފުޅުން ވަނީ ދާއިފަހުން އިދިކޮޅު ޕީޕީއެމް/ޕީއެންސީގެ ލީޑަޝިޕުގެ ބައެއް ބޭފުޅުންނާ ބައްދަލުކުރައްވައި މަޝްވަރާ ކުރައްވާފައެވެ. ޖަމްޢިއްޔަތުއް ސަލަފަކީ މިސަރުކާރުގެ ސިޔާސަތުތަކާ ވަރަށްދެކޮޅު ޖަމްޢިއްޔާއެކެވެ. ޚާއްސަކޮށް އިސްލާމް ދީނާ ގުޅުންހުރި ކަންކަމުގައި ސަރުކާރުގެ ޢަމަލުތައް ހުންނަގޮތާމެދު އެޖަމްއިއްޔާއިން ކަންބޮޑުވެއެވެ.

ދީނަށް ފިރައްސާރަކުރާ މީހުންނާމެދު ފިޔަވަޅެއް ނޭޅި އެމީހުންނަށް ޙިމާޔަތްލިބިފައި، ދީނީ ޝިޢާރު ފާޅުކޮށް ދީނަށްޓަކައި މަސައްކަތްކުރާ މީހުންނަކީ ހަރުކަށި ފިކުރުގެ މީހުންކަމުގައި މިސަރުކާރުން ލޭބަލްކުރާ ކަމަށް ސަލަފުން ތުހުމަތުކުރެއެވެ. ޢަދާލަތު ޕާޓީގެ ރައީސް ހޯމް މިނިސްޓަރުކަމުގައި ހުންނަވައި އެޕާޓީގެ ބޭފުޅަކު އިސްލާމިކް މިނިސްޓަރުކަމުގައި ހުންނަވައި މިފަދަ ކަންކަން ހިންގަނީ ގަސްތުގައި އަދާލަތުގެ ރުހުންވެސް އޮވެގެންކަމަށް ސަލަފުން ތުހުމަތުކުރެއެވެ.

ސަލަފުން އިދިކޮޅު ފަރާތްތަކާ ބައްދަލުކުރުމުން އަދާލަތުގެ ތަރުޖަމާނު އަދި ހޯމް މިނިސްޓްރީގެ ސްޓޭޓި މިނިސްޓަރު ޢަލީ ނަޒީރުވަނީ އެޖަމްޢިއްޔާއަށް އިންޒާރުދެއްވާފައެވެ. އެގތޮތުން ސިޔާސީ މަސައްކަތްތައް ކުރަންވާނީ ސިޔާސީ ޕާޓީއެއްގެގޮތުގައި ރަޖިސްޓްރީކޮށްގެންކަމަށާ، މަދަނީ ޖަމްޢިއްޔާއެއްގެގޮތުގައި އޮވެގެން ސިޔާސީ ޙަރަކާތް ހިންގާނަމަ ފިޔަވަޅު އަޅާނެކަމުގެ އިންޒާރު ނަޒީރުވަނީ ދެއްވާފައެވެ.

ޝައިޚް ނިޝާން ވިދާޅުވީ، މިއީ ދީނާ ސިޔާސަތު އޮންނަންވާނީ ވަކިވެފައިކަމަށް ސެކިއުލަރ މީހުން ދެކޭ ފިކުރުކަމަށެވެ. އެހެންކަމުން ޢަދާލަތަކީ ފާޅުގައި ސެކިއުލަރ ފިކުރު ފަތުރާ މީހުންނަށް ވާގިދޭ ބައެއްގެގޮތުގައި ޝައިޚް ނިޝާން ސިފަކުރެއްވިއެވެ.

މިއީ ޢަދާލަތު ޕާޓީއަކީ ލާދީނީ ސެކިއުލަރ ފަރާތްތަކާއި ގުޅިގެން، ލާދީނީ ފަލްސަފާއަށް ފާޅުގައި ވާގިދޭ ބައެއް ކަމުގައި އަޅުގަނޑުމެން ބުނާ ބުނުމުގެ ހެއްކެކެވެ. pic.twitter.com/HjWkxLEnZ9

— Adam Nishan Ibn Ali Adam (@adamnishanali) March 2, 2023

ޝައިޚް ނިޝާނަކީ ޔޯގާދުވަސް ފާހަގަކުރަން ސަރުކާރުން އިންތިޒާމުކުރި ޙަރަކާތާ ދެކޮޅަށް އަޑުއުފުލައި އިހުތިޖާޖުކުރުމުން ހައްރުކޮށް ޓެރަރިޒަމްގެ ޢަމަލެއް ހިންގަން ހިތްވަރިދިންކަމުގެ ކުށުގެ ދަޢުވާ މިސަރުކާރުން އުފުލާފައިވާ ބޭފުޅެކެވެ.