ރައްޔިތުންގެ މަޖިލީހުގެ ގުރައިދޫ ދާއިރާ ތަމްސީލް ކުރައްވަމުން ގެންދެވި އަލް އުޘްތާޒު އިބްރާހިމް ރިޒާ އަވަހާރަވުމުގެ ހިތާމާގައި ބައިވެރި، ރިޒާގެ ޢާއިލާއާއި ބައްދަލު ކުރެއްވައި ހިތްވަރު ދެއްވުމަށާއި، ގުރައިދޫ ދާއިރާގެ ރައްޔިތުންނާއި ބައްދަލު ކުރުމަށް އިދިކޮޅު ކޯލިޝަންގެ ލީޑަރޝިޕުން ގުރައިދޫ ދާއިރާއަށް ދަތުރެއް ފަށައިފިއެވެ.
މިދަތުރުގައި އިސްކޮށް ބައިވެރިވެ ވަޑައި ގަންނަވަނީ ޕީއެންސީގެ ރައީސް އަބްދުއްރަހީމެއެވެ. އޭނާގެ އިތުރުން ކުރީގެ އެންވާރުމަންޓް މިނިސްޓަރ ތޯރިގު އިބްރާހިމްއާއި، މަޑުއްވަރީ ދާއިރާގެ މެމްބަރު އާދަމް ޝަރީވެސް މިދަތުރުގައި ބައިވެރިވެފައިވެއެވެ. ޕީޕީއެމްއިން ބުނެފަިއވަނީ ޕީޕީއެމް، ޕީއެންސީގެ ލީޑަރޝިޕުން ގުރައިދޫ ދާއިރާގެ ތިން ރަށަށް ކުރައްވާ ދަތުރުގައި، އުޘްތާޒު އިބްރާހިމް ރިޒާ އަވަހާރަ ވުމުން ދާއިރާއަށް ލިބިފައިވާ ހިތާމާގައި ބައިވެރިވެ، އާއިލާއާއި ދާއިރާގެ ރައްޔިތުންނާއި ބައްދަލު ކުރައްވައި ރައީސް ޔާމީންގެ ތައުޒިޔާ ރައްދުކޮށް ހިތްވަރު ދެއްވާފައިވާކަމަށެވެ.
ރިޒާ އަވަހާރަވުމާއި ގުޅިގެން ހުސްވެފައިވާ ގުރައިދޫ ދާއިރާގެ މަޖިލިސް ގޮޑިއަށް ވާދަކުރާ އިދިކޮޅު ކެނޑިޑޭޓަކު ކަނޑައެޅުމާއިމެދު އަދި ވަކިގޮތެއް ނުނިންމައެވެ. ރިޒާ އަވަހާރަވީ ކެންސަރުގެ އާލާސްކަންފުޅަށް މެލޭޝިއާގައި ފަރުވާ ހޯއްދަވަމުން ގެންދަވަނިކޮށެވެ. ރިޒާއަކީ މަޖިލީހުގައި އެންމެ ގިނަ ދުވަސްވީ އެއް މެންބަރެވެ. ރިޒާ ވަނީ، ނިމުނު 3 ދައުރުގައިވެސް މެންބަރުކަން ކުރައްވާފައެވެ.
PPM PNC Leaders Guraidhoo dhaairaa ge 3 rashah kuravvaa dhathuru, Uz Ibrahim Riza avahaara vumun dhaairaa ah libifaivaa hithaamaiga baiverive, aailaa aai dhaairaage rayyithunnai badhdhalukurahvaa Raees Yameen ge Thauziyaa rahdhu koh hihvaru dhehvun. pic.twitter.com/RTKKRCubAH
— Progressive Party of Maldives (@ProgressPartyMV) March 3, 2023
ގުރައިދޫ ދާއިރާގެ ބައި އިލެކްޝަންގައި އެމްޑީޕީން ވާދަކުރާއިރު، އެމްއެންޕީންވެސް ވަނީ މާދަކުރަން ނިންމައި ކުރިމަތިލުމުގެ ފުރުސަތު ހުޅުވާލާފައެވެ. ކ. ގުރައިދޫ ދާއިރާގެ ބައި- އިލެކްޝަނުގައި އެމްޑީޕީގެ ޓިކެޓްގައި ވާދަކުރާ ކެނޑިޑޭޓަކު ހޮވުމަށް ބާއްވާ ޕްރައިމެރީގައި ވާދަކުރުމަށް ހަތަރު މީހަކު ވަނީ ކުރިމަތިލާފައެވެ. ޕްރައިމެރީގައި ވާދަކުރަން ނަން ހުށައެޅުމަށް މިދިޔަ މަހުގެ 27ގައި ހުޅުވާލި ފުރުސަތު މިމަހުގެ 2 ވަނަދުވަހު ވަނީ ހަމަވެފައެވެ.
އެމްޑީޕީގެ ޕްރައިމެރީގައި ވާދަކުރާ ކެނޑިޑޭޓުން:
1- މުޙައްމަދު މުސްތަފާ – ވިވިޑް / ކ. މާފުށި
2- ސަލްމާން ރަޝީދު – މާފަރިވާގެ / ކ. މާފުށި
3- އިބްރާހިމް ޝާޒް – ފައިވްރޯޒް / ކ ގުރައިދޫ
4- ސައީދު – ވެލި / ކ. ގުރައިދޫ
ގުރައިދޫ ދާއިރާގެ ގޮނޑި ހުސްވުމުން އެ ދާއިރާގެ ބައި- އިލެކްޝަން އަންނަ އޭޕްރިލްމަހުގެ 15ވަނަ ދުވަހު ބާއްވާނެކަން އިލެކްޝަންސް ކޮމިޝަނުން ވަނީ އިއުލާންކޮށްފައެވެ. ގުރައިދޫ ދާއިރާގައި ގުރައިދޫގެ އިތުރުން ދެން ހިމެނެނީ މާފުއްޓާއި ގުޅިއެވެ.
