ތ.ހިރިލަންދޫން 200 އަށްވުރެ ގިނަ މީހުން ވެރިކަން ކުރާ މައި ޕާޓީ އެމްޑީޕީއާއި ގުޅިއްޖެއެވެ.
ރައީސް އިބްރާހިމް މުހައްމަދު ޞާލިހު ހިރިލަންދޫ ސްކޫލުގެ 71 އަހަރު ފާހަގަކުރުމަށް ބޭއްވި ރަސްމިއްޔާތުގައި ބައިވެރިވުމަށްފަހު ރޭ ބޭއްވި އެމްޑީޕީ ކަންމަތީ ބައްދަލުވުމުގައި އެޕާޓީއާއި ހިރިލަންދޫއިން އަލަށް ގުޅުނު މީހުންގެ ފޯމްތަކާއި ހަވާލުވީ އެމްޑީޕީގެ ރިޔާސީ ކެނޑިޑޭޓް ރައީސް އިބްރާހިމް މުހައްމަދު ޞާލިހުއެވެ.
އެމްޑީޕީން ބުނެފައިވަނީ ހިރިލަންދޫގެ 200 އަށްވުރެ ގިނަ މީހުން ރޭ އެޕާޓީއާއި އަލަށް ގުޅުނުކަމަށެވެ. ރައީސް ޞާލިހު އިއްޔެ ހިރިލަންދޫއަށް ވަޑައިގެންނެވުމުން އެރަށުން ވަނީ ވަރަށް ހޫނު މަރުހަބާއެއް ދަންނަވާފައެވެ.
ތ.ހިރިލަންދޫގައި ރޭ ބޭއްވި ކަންމަތީ ޖަލްސާގައި ތ. ހިރިލަންދޫއިން އެމްޑީޕީއާ އަލަށް ގުޅުނު 200އަށްވުރެ ގިނަ މެންބަރުންގެ ފޯމު ރައީސް @ibusolih، އަދި ޗެއަރޕާސަން @faya_i އާ ހަވާލުކުރުން.#MDPKuriah pic.twitter.com/HNFOXHBPL0
— MDP Secretariat (@MDPSecretariat) March 3, 2023
ރޭގެ ކަންމަތީ ބައްދަލުވުމުގައި ވާހަކަ ދައްކަވަމުން ރައީސް ޞާލިހު ވިދާޅުވީ ކުރިއަށް އޮތް ރިޔާސީ އިންތިހާބު ކާމިޔާބުކުރުމަށް އޮތް ފޯމިއުލާއަކީ ކޯލިޝަން ކަމަށް ގަބޫލުފުޅުކުރައްވާ ކަމަށް ވިދާޅުވާ ވާހަކަފުޅު ތަކުރާރު ކުރައްވާފައެވެ. އެމްޑީޕީ ޕްރައިމަރީގައި އެމަނިކުފާނާ އެކު ވާދަކުރެއްވި ޕާޓީގެ ރައީސްމުޙައްމަދު ނަޝީދު އެމްޑީޕީއަށް ކޯލިޝަނާ ނުލައި އިންތިޚާބު ކާމިޔބާކުރެވޭނެކަމަށް ވިދާޅުވެފައި ވީނަމަވެސް ނަމަވެސް ރައީސް ނަޝީދުގެ އަރިސް ބޭފުޅުން ޖުމްހޫރީ ޕާޓީއާއި ކޯލިޝަން ހަދައިގެން އިންތިޚާބަށް ނިކުމެވަޑައިގަންނަވާނެކަމަށް ދެކެވޭ ވާހަކަތަކަށް އިޝާރާތްކުރައްވަމުން ރައީސް ވިދާޅުވީ، ކޯލިޝަނާއި ދެކޮޅު ހެއްދެވި ބޭފުޅުންވެސް މިހާރު ދައްކަމުން އަންނަނީ ކޮންމެވެސް އެއް ޕާޓީއަކާއެކު ކޯލިޝަން ހެދުމުގެ ވާހަކަތައްކަމަށެވެ.
ރައީސް ވިދާޅުވީ އެމަނިކުފާނާއެކު މިހާރު ކޯލިޝަންގައި ތިއްބެވި ހުރިހާ ޕާޓީތަކަށް ކުރިއަށް އޮތް ރިޔާސީ އިންތިޚާބަށްވެސް ކޯލިޝަން ހެދުމަށް ދައުވަތު ދެއްވާފައިވާ ކަމަށެވެ. ރައީސް ވިދާޅުވީ ކޯލިޝަނަކާއި ނުލައި އިންތިހާބެއް އެއް ބުރުން ކާމިޔާބު ނުކުރެވޭނެ ކަމަށާއި, ކޯލިޝަންގައި މިހާރު ތިއްބެވި ބޭފުޅުން ގޮތް ނިންމަވާނީ ރައްޔިތުންނަށް އެންމެ ފައިދާހުރި ގޮތަށް ކަމަށް އުއްމީދު ކުރައްވާކަމަށެވެ. އެގޮތުން އެބޭފުޅުން ވިސްނުންތެރިކަމާއެކު ގޮތް ނިންމަވާނެކަމަށް ގަބޫލުކުރައްވާ ކަމަށާއި، އެގޮތުން އެމްއާރުއެމާއި ޖޭޕީންވެސް އެމްޑީޕީއާއެކު ކޯލިޝަން ހަދާނެކަމުގެ ޔަޤީންކަން އެބައޮތްކަމަށް ރައީސް ވިދާޅުވިއެވެ.
ރިޔާސީ އިންތިޚާބުގެ ވާދަވެރިކަން ބޮޑުވެފައިވާއިރު، ރައީސް ދެއްވި ދަޢުވަތު ޤަބޫލުކޮށް އެމްޑީޕީއާއެކު ކޯލިޝަން ހަދަން ޢަދާލަތު ޕާޓީއާއި، އެމްޑީއޭ ނިންމާ އެ ދެޕާޓީން އެކަން ވަނީ އިއުލާންކޮށްފައެވެ.
