ވެރިކަމުގައި ތިއްބެވި ބޭފުޅުންވެސް މިފަހަރު އާރާއި ބާރާއިއެކު އަރަންޖެހޭނީ ޖުމްހޫރީ ޕާޓީގެ ލީޑަރު ޤާސިމް އިބްރާހިމްގެ ފަހަތްޕުޅަށް ކަމުގައި ޖުމްހޫރީ ޕާޓީގެ ލީޑަރު ގާސިމް އިބްރާހިމް ކަމަށް އޭނާގެ އެޑްވައިޒަރު ނަވާޒް ވިދާޅުވެއްޖެއެވެ.
އޭނާ މިހެން ވިދާޅުވީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި، ޖުމްހޫރީ ޕާޓީގެ ލީޑަރު ޤާސިމް އިބްރާހީމް އާއިއެެކު ބޭއްވި ބައްދަލުވުމަށްފަހު ދެކެވުނު ވާހަތަކާއި ގުޅިގެން ކުރެއްވި ޓުވީޓެއްގައެވެ. ފުލުހުންގެ ތެރޭގައިވެސް އިސް މަޤާމުތަކެއް ފުރުއްވާފައިވާ ނަވާޒުގެ ވާހަކަ އިޝާރާތް ކުރެއްވީ ރައީސް ޞާލިހަށް ކަމަށްބެލެއެވެ.
އޭނާ ވިދާޅުވީ ސެޕްޓެމްބަރު މަހު ބާއްވާ ރިިޔާސީ އިންތިޚާބުގައި މިފަހަރު އާރާއި ބާރުގައި ތިއްބެވި ބޭފުޅުންވެސް އަރަންޖެހޭނީ ޖުމްހޫރީ ޕާޓީގެ ލީޑަރު ޤާސިމް އިބްރާހިމްގެ ފަހަތަށް ކަމުގައެވެ. މިފަހަރު ޤާސިމް ވިދާޅުވަނީ އިނަފް އީސް އިނަފް ކަމަށް ނަވާޒު ވިދާޅުވިއެވެ.
މިފަހަރު އާރާއި ބާރާއިއެކު އަރަންޖެހޭނީ ޤާސިމްގެ ފަހަތްޕުޅަށް. މިފަހަރު ލީޑަރ ވިދާޅުވާނީ އިނަފް އިސް އިނަފްއޭ. މާތް ރަސްކަލާންގެ އިރާދަ ފުޅާއިއެކު މިއީ ލީޑަރގެ ފަހަރު.
– ނަވާޒު ވިދާޅުވިއެވެ.
ނަވާޒު މިހެން ވިދާޅުވިއިރު މިހހާތަނަށް ބޭއްވުނު 3 ރިޔާސީ އިންތިޚާބުގައިވެސް ވާދަކޮށް، ދެވަނަ ބުރަށް ނުދިއުމުން ޤާސިމް ޖެހެނީ ކޮންމެވެސް ކެނޑިޑޭޓެއްގެ ފަހަތަށް އަރައި އިންތިޚާބު ކާމިޔާބު ކޮށްދެއްވުމަށެވެ. ނަމަވެސް މިފަހަރު ސިޔާސީ މަސްރަހު އޮތްގޮތުން މިއީ ޤާސިމަށް ވެރިކަމަށް އައުމަށް އޮތް އެންމެ ތަނަވަސް ފުރުސަތުކަމަށް ގިނަ ބަޔަކު ދެކެއެވެ. އެންމެ ފަހުން އެޕާޓީގެ ޤައުމީ ކޮންގްރެސްގައިވެސް ވަނީ ޖުމްހޫރީ ޕާޓީން ކެނޑިޑޭޓަކު ނެރުމަށް ޤަރާރެއްވެސް ފާސްކޮށްފައެވެ.
ރައީސުލްޖުމްހޫރިއްޔާގެ އޮފީހުގެ ބޭރުގައި ހުންނަވާ ނޫސްވެރިންނާއި ވާހަކަ ދައްކަވަމުން ޤާސިމް ވިދާޅުވީ، ރައީސުލްޖުމްހޫރިއްޔާއާ ބައްދަލުކުރައްވާ ސިޔާސީ ވާހަކަ ދެއްކެވިކަމަށެވެ. ނަމަވެސް ކޯލިޝަން ހެދުމާއި، ރިޔާސީ އިންތިޚާބުގައި ޤާސިމް ނުވަތަ ޖުމްހޫރީ ޕާޓީން ނިންމާނެ ގޮތަކާއި ގުޅޭގޮތުން ޤާސިމް ވާހަކަ ނުދައްކަވައެވެ.
ޤާސިމް ވިދާޅުވީ، ރިޔާސީ އިންތިޚާބުގައި އެޕާޓީން ކެނޑިޑޭޓެއް ނެރުމަށް ނުވަތަ އެޕާޓީން އިސްވެ އޮވެ ކޯލިޝަން ހެދުމަށް ޤަރާރެއް ޤައުމީ ކޮންފަރެންސުން ފާސްކޮށްފައިވާކަމަށެވެ. ނަމަވެސް އެ ޤަރާރާއި މެދު ގޮތެއް ނިންމާނީ ޕާޓީގެ ކައުންސިލުންކަމަށް ޤާސިމް ވިދާޅުވިއެވެ. ކޯލިޝަން ހަދަން އެއްވެސް ޕާޓީއަކާއެކު މަޝްވަރާ ކޮށްފައި ނުވާކަމަށްވެސް ގާސިމް ވިދާޅުވިއެވެ.
