ފ.މަގޫދޫ އެއަރޕޯޓުގެ މަސައްކަތް އަންނަ އޮގަސްޓުމަހުގެ ނިޔަލަށް ނިންމައި ރައްޔިތުންނާ ހަވާލުކުރެވޭނެ ކަމަށް ބެލެވޭކަމުގައި އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ.
ބައެއް މިޑިއަތަކަށް މަޢުލޫމާތު ދެއްވަމުން އާޒިމް ވިދާޅުވީ މަގޫދޫ އެއަރޕޯޓު ހެދުމަށް ބިން ހިއްކުމުގެ މަސައްކަތުގެ 50 އިންސައްތަ މިހާރު ނިމިފައި ވާކަމަށެވެ. އެމްޓީސީސީން މަސައްކަތް ރާވާފައި ވަނީ ބިން ހިއްކަމުންދާ ވަރަކަށް އެއަރޕޯޓުގެ ރަންވޭގެ މަސައްކަތްވެސް ކުރިއަށްގެންދިއުމަށްކަމަށް އާޒިމް ވިދާޅުވިއެވެ. މި މުޅި މަސައްކަތް އޮގަސްޓުމަހުގެ ނިޔަލަށް ނިންމައި އެއަރޕޯޓު ހުޅުވޭވަރު ވާނެކަމަށްވެސް އާޒިމް ވިދާޅުވެފައިވެއެވެ.
ފ. މަގޫދޫ އެއަރޕޯޓް ޤާއިމުކުރުމަށްޓަކައި 47.8 ހެކްޓަރުގެ ބިން ހިއްކަން ހަމަޖެހިފައިވެއެވެ. މިއީ 206.88 މިލިޔަން ރުފިޔާގެ މަޝްރޫޢެކެވެ. މިމަޝްރޫއުގެ އެއްބަސްވުމުގައި އެމް.ޓީ.ސީ.ސީއާއި ޕްލޭނިންގ މިނިސްޓްރީ އާ ދެމެދު ސޮއިކޮށްފައިވަނީ 2022ވަނަ އަހަރުގެ އޮކްޓޯބަރު 19ވަނަ ދުވަހުއެވެ.
