ރައްޔިތުންގެ މަޖިލީހުގެ ގުރައިދޫ ދާއިރާގެ ބައި-އިލެކްޝަނަށް ވެރިކަން ކުރާ މައި ޕާޓީ، އެމްޑީޕީން ހުޅުވާލައިފިއެވެ.
ގުރައިދޫ ދާއިރާގެ ގޮނޑި ހުސްވީ، އެދާއިރާގެ މެންބަރުކަމުގައި ހުންނެވި އިބްރާހީމް ރިޒާ އަވަހާރަވުމުންނެވެ. ގުރައިދޫ ދާއިރާގެ ބައި-އިލެކްޝަން އޭޕްރީމް މަހުގެ 15 ގައި ބޭއްވުމަށް އިލެކްޝަންސް ކޮމިޝަނުން ވަނީ ނިންމައި، ކުރިމަތިލާން މިއަދު ހުޅުވާލާފައެވެ.
ބައި-އިލެކްޝަނެއް ބާއްވަން އިލެކްޝަންސް ކޮމިޝަނުން ނިންމީ ގުރައިދޫ ދާއިރާގެ މެމްބަރު އިބްރާހިމް ރިޒާ ކެންސަރުގެ ބަލީގައި މިދިޔަ ބުރާސްފަތި ދުވަހު އަވަހާރަވުމުންނެވެ. އިދިކޮޅު ޕީޕީއެމްގެ ކައުންސިލް މެމްބަރު ރިޒާ ވަނީ ގުރައިދޫ ދާއިރާގެ މެމްބަރުކަން މިދިޔަ 14 އަހަރު މެދުނުކެނޑި ކުރައްވައިފަ އެވެ.
އެމްޑީޕީން ބުނީ، އެ ދާއިރާ އަށް އެ ޕާޓީގެ ޓިކެޓްގައި ވާދަކުރުމަށްޓަކައި ބާއްވާ ޕްރައިމަރީ އަށް ނަން ހުށަހެޅުމުގެ ފުރުސަތު މިއަދުން ފެށިގެން އަންނަ ބުރާސްފަތި ދުވަހުގެ ހަވީރު ހަތަރެއް ޖެހުމާ ހަމައަށް ހުޅުވާފައިވާ ކަމަށެވެ. އެ ކަމަށް އެދި ހުށަހަޅާ މީހުން 100 މެމްބަރުންގެ ސޮއި ހުށަހަޅަން ޖެހެ އެވެ. އެއީ ޕްރައިމަރީގައި ބައިވެރިވާ މީހުންނަށް ތާއީދު އޮތް ކަން އަންގައިދޭ 100 މެމްބަރުންގެ ސޮޔެވެ.
ގުރައިދޫ ދާއިރާގެ މެންބަރު ރިޒާ އަވަހާރަވީ ކެންސަރުގެ އާލާސްކަންފުޅަކަށް ފަރުވާ ހޯއްދަވަމުން ގެންދަވަނިކޮށް މިމަހުގެ 22 ވަނަ ދުވަހުގެ ރޭ މެލޭޝިއާގައެވެ. އިދިކޮޅު ޕީޕީއެމްގެ މެމްބަރެއްގެ ގޮތުގައި މަޖިލިސް ތަމްސީލުކުރައްވަމުން ގެންދެވި ރިޒާއަކީ މަޖިލީހުގައި އެންމެ ގިނަ ދުވަސްވީ އެއް މެންބަރެވެ. ރިޒާ ވަނީ، ނިމުނު 3 ދައުރުގައިވެސް މެންބަރުކަން ކުރައްވާފައެވެ.
