ހުކުރުދުވަހުގެރޭ މާލޭގެ ފިހާރައަކަށްވަދެ ވަޅިހަރައި ހިންގި މާރާމާރީގެ މައްސަލާގައި މީހަކު ހައްޔަރުކޮށްފިއެވެ.
ކޮމިޝަނަރ އޮފް ޕޮލިސް މުހައްމަދު ހަމީދު ވަނީ މިކަން ހާމަކުރައްވައި ޓްވީޓެއް ކުރައްވާފައެވެ. އޭނާ ވިދާޅުވީ މި މަރާމާރީގައި ޢަމަލީ ގޮތުން ބައިވެރިވި އެކަކު ހައްޔަރު ކޮށްފައިވާ ކަމަށެވެ. އެމީހާ ހައްޔަރު ކުރީ ފުލުހުންގެ ތަހުގީގަށް ހޯދުނު މަޢުލޫމާތުތަކުގެ މައްޗަށް ބިނާކޮށް ކޯޓު އަމުރެެއްގެ ދަށުންކަމަށާ، ހައްޔަރުކުރީ ރޭ ދަންވަރު ކަމަށް ސީޕީ ވިދާޅުވެފައިވެއެވެ.
ފެބުރުވަރީ 24 ވަނަ ދުވަހުގެރޭ، މާފަންނު ފިހާރައެއްގެ ތެރޭގައި ތޫނު ހަތިޔާރު ބޭނުންކޮށްގެން މީހަކަށް ހަމަލާދިނުމުގައި އަމަލީ ގޮތުން ބައިވެރިވި އެކަކު، ފުލުހުންގެ ތަހުގީގަށް ހޯދުނު ހޯދުމުގެ މައްޗަށް، ކޯޓު އަމުރެެއްގެ ދަށުން ރޭ ދަންވަރު ހައްޔަރުކުރެވިފައިވޭ. #ގޭންގުމާރާމާރީ
— Mohamed Hameed (@M_Hameedh) February 26, 2023
މާލޭގެ ފިހާރައަކަށްވަދެ ހުކުރުދުވަހުގެރޭ ހިންގި މާރާމާރީއެއްގައި ފިރިހެނެއްގެ ގަޔަށް ވަޅި ހަރައި ވަރަށް ބޮޑަށް ޒަޚަމްކޮށްލާފައިވެއެވެ.
އަނިޔާވި ފިރިހެން މީހާ އައިޖީއެމްއެޗަށް ގެންގޮސް ފަރުވާދެމުންދެއެވެ. އޭނާގެ ޙާލު ސީރިއަސްކަމަށާ، އަދިވެސް އޮތީ އައިސީޔޫގައިކަމަށް މަޢުލޫމާތުލިބެއެވެ.
އެ މީހާއަށް ލިބުނު އަނިޔާގެ ތަފްސީލެއް ފުލުހުން ހާމައެއް ނުކުރެއެވެ. ބައެއް ވީޑިއޯތަކުން ފެންނަ ގޮތުގައި ހަމަލާ ރައްދުވި މީހާގެ އުނަގަނޑުގައި ވެސް ވަޅިއެއް ހަރުކޮށްފައި އޮންނަ ތަން ފެނެއެވެ.
މިއީ ދެ ގޭންގެއްގެ ދޭތެރޭގައި ހިނގި ހަމަނުޖެހުމެއް ކަމަށް ކޮމިޝަނަރ އޮފް ޕޮލިސް މުޙައްމަދު ޙަމީދު ވަނީ ވިދާޅުވެފައެވެ.
ހަމަލާ ދިން ކްރާސާ ފިހާރައިގެ ކޭޝިއަރު އެވަގުތު ވަނީ ސަލާމަތް ވާން ވެގެން ކުރިމަތީގައި ހުރި މަރުހަބާ ފިހާރައަށް ވަދެއެވެ. އެނގިފައިވާ ގޮތުގައި އޭނާ ވެސް އޮތީ ހަބަރު ހުސްވެފައެވެ.
