މި ހަފްތާ ބަންދުގައި ބޭއްވުނު، ޖުމުހޫރީ ޕާޓީގެ ގައުމީ ކޮންފަރެންސް މިހާރު ނިމުމަކާއި ހަމައަށް އައިސްފައިވާއިރު، އެޕާޓީގެ ވަރަށް އިސް މެމްބަރެއް ކަމުގައިވާ، އަދި އެ ޕާޓީގެ ސްލޮޓެއްގައި ޓުއަރިޒަމް މިނިސްޓަރުކަމުގެ މަގާމުގައި ހުންނެވި ޑރ އަބްދުﷲ މައުސޫމް ބައިވެރިވެވަޑައިނުގަންނަކަން ގިނަބަޔަކު ފާހަގަ ކުރާން ފަށައިފިއެވެ.
މިހާރުވެސް މާލޭގައި ދަރުބާރުގޭގައި ކުރިޔަށްދާ ޖުމުހޫރީ ޕާޓީގެ ގައުމީ ކޮންގްރެސްއިން އެޕާޓީގެ ސްލޮޓުގައި ސަރުކާރުގެ އިސް ބައެއް މަގާމްތަކަށް ވަޑައިގެންފައިވާ ބައެއް އިސް ބޭފުޅުން ފެނިގެން ގޮސްފައި ނުވާތީ، ގިނަބައެއްގެ ފާޑުކިޔުން ވަނީ އަމާޒުވެފައެވެ. އޭގެތެރޭގައި، ޖޭޕީގެ ސްލޮޓުގައި ނައުބުރައީސްކަމަށް ވަޑައިގެންނެވި ފައިސަލް ނަސީމު މާލޭގައި ހުންނަވާ، ގައުމީ ކޮންފަރެންސަށް ހާޒިރު ނުވުމުން، ގިނަ ބަޔަކު ވަނީ އެކަން ފާހަގަ ކޮށްފައެވެ. ޖޭޕީން ބުނެފައިވަނީ ނާއިބު ރައީސަށް އެޕާޓީން ދައުވަތު ދީފައިވާ ކަމަށާއި، އެހެންމަވެސް ގައުމީ ކޮންފަރެންސަށް ވަޑައިނުގެންނެވި ސަބަބު އެޕާޓީއަށް އެގިފައި ނުވާކަމުގައެވެ.
ހަމަ އެއާއެކު، ޖޭޕީގެ ސްލޮޓުގައި ކެބިނެޓް ވަޒީރެއްގެ ގޮތުގައި ހުންނެވި ޑރ. މައުސޫމުވެސް ޖޭޕީގެ މުހިންމު އިވެންޓެއްގެ ގޮތުގައި ފާހަގަވާ، ގައުމީ ކޮންފަރެންސްއިން ފެނިގެން ނުދިޔައީ ކޮން ސަބަބަކާއި ހެދިކަމެއް އަދި ސާފު ވެފައެއް ނުވެއެވެ.
ޖޭޕީގެ އިސް ބޭފުޅެއްގެ ގޮތުގައި ހުންނެވި ޑރ. މައުސޫމުވެސް ވަނީ ދާދިފަހުން ރައީސް ސާލިހަށް ދެވަނަ ދައުރެއް ލިބެންޖެހޭނެކަން ފާހަގަށް، ރައީސް ސާލިހަށް ވަރަށް ބޮޑަށް ދާއީދުކޮށް ވާހަކަ ދައްކަވާފައެވެ.
އެހެންނަމަވެސް ރިޔާސީ އިންތިޚާބަށް ޖުމުހޫރީ ޕާޓީން އަދި ރައީސް ސާލިހާއި ކޯލިޝަން ހަދަން ނިންމާފައެއް ނުވެއެވެ. މިހާރު ކުރިޔަށްދާ އެޕާޓީގެ ގައުމީ ކޮންފަރެންސްއިން ރިޔަސީ އިންތިޚާބާ ގުޅޭ ޚާއްސަ ގަރާރެއް މިރޭ ފާސްކުރުމަށް ވަނީ ހަމަޖެހިފައެވެ.
