އިންޑިއާގެ ބޮޑުވަޒީރު ނަރެންދުރަ މޯޑީއަށް ފާޑުކީ، އެގައުމުގެ އިދިކޮޅު ކޮންގްރެސް ޕާޓީގެ އިސް އޮފިޝަލަކު އިންޑިއާގެ ސަރުކާރުން ހައްޔަރު ކޮށްފިއެވެ.
އިންޑިއާގެ އިދިކޮޅު ކޮންގްރެސް ޕާޓީގެ ސީނިއަރ އޮފިޝަލް، ޕަވަން ޚެރާ ހައްޔަރު ކުރީ ދިއްލީ އެއްރޕޯޓުން، ފުރަން ފްލައިޓަކަށް އަރާ އިންދާ، ކޮންގްރެސް ޕާޓީގެ އެހެން ބައެއް އޮފިޝަލުންނާއެކު ފްލައިޓުން ބޭލުމަށް ފަހުއެވެ.
އޭނާ ހައްޔަރު ކޮށްފައިވަނީ އިންޑިއާގެ ބޮޑުވަޒީރަށް ނިސްބަތްކޮށް، "ނަރެންދުރަ ގައުޓަމްޑަސް މޯޑީ" މިހެން މުޚާތަބު ކުރުމާއި ގުޅިގެންނެވެ.
މޯޑީއަށް މިހެން ނިސްބަތްކޮށް މުޚާތަބް ކޮށްފައިވަނީ، މިހާރު މާލީ ބޮޑެތި މައްސަލަތަކެއް ކުރިމަތިވެފައިވާ، އިންޑިއާގެ މަހުޖަނު، ގައުޓަމް އަދަނީގެ ނަމަށް ނިސްބަތް ކޮށެވެ.
ފާއިތުވެދިޔަ މަހު، ފައިނޭންޝަން ރިސާރޗް އަދި ސްޓޮކްޓް އެކްޗޭންގެ އިންވެސްޓްމެންޓް ފާރމެއް ކަމުގައިވާ، ހިންޑެމްބާރގް ރިސާރޗްއިން އަދަނީ ގުރޫޕުން ސްޓޮކް މާރކެޓްގެ މައުލޫމާތު އޮޅުވާލުމާއި އަދި ހިންގާފައިވާ ފްރައުޑުގެ މައުލޫމާތު އާންމު ކުރުމާއި ގުޅިގެން، މުޅި ދުނިޔޭގެވެސް އެންމެ މުއްސަދި މަހުޖަނުންގެ ތެރޭގައި ހިމެނޭ އަދަނިގެ ބައިތުލްމާލުގެ މުއްސަދިކަން އެންމެ ދެ ހަފްތާތެރޭގައި ދެބައިކޮށްފަ އެއްބަޔަށް ދަށަށް ގޮސްފައި ވެއެވެ.
އަދަނި ގުރޫޕުންވަނީ ހިންޑެމްބާރގް ރިސާރޗްއިން އާންމު ކުރި ރިޕޯޓަކީ އެއްވެސް ހަގީގަތެއް ނެތް ބުހުތާނު ދޮގުކަމަށް ބުނެފައެވެ.
އަދަނިއަކީ އިންޑިއާގެ ބޮޑުވަޒީރު ނަރެންދުރަ މޯޑީގެ ވަރަށް އަރިސް ފަރާތެކެވެ.
ފާއިތުވެދިޔަ މަސްތަކުގައި، މޯޑީއަށް ފާޑުކިޔާ ފަރާތްތަކުގެ އަނގަ ބަންދުކުރުމަށް އިންޑިއާ ސަރުކާރުން މަސައްކަތް ކުރަމުންދާކަމުގެ ތުހުމަތު މޯޑީގެ މައްޗަށް ގިނަބަޔަކު ދަނީ ކުރަމުންނެވެ. މިގޮތުން، މީގެ 20 އަހަރު ކުރިން، ގުޖުރާތުގެ ޗީފް މިނިސްޓަރަކަށް މޯޑީ ހުންނަވަނިކޮށް އެސިޓީގައި ހިނގި ނަސްލީ ހަމަނުޖެހުންތަކުގައި އޭނާ އަދާ ކޮށްފައިވާ ދައުރާއި ގުޅޭގޮތުން މޯޑީއަށް ފާޑުކިޔާ، ބީބީސީން ތައްޔާރު ކުރި ޑޮމިއުމެންޓްރީއެއް އިންޑިއާގައި ދެއްކުން މޯޑީގެ ސަރުކާރުން ވަނީ މަނާކޮށްފައެވެ.
މި ޑޮކިއުމަންޓްރީއަށްފަހު، ބީބީސީން ޓެކްސްއަށް މަކަރު ހަދަމުންދާކަމަށް ތުހުމަތުކޮށް، އިންޑިއާގެ ޓެކްސް އޮތޯރިޓީއިން ވަނީ ނިއު ދިއްލީގައި ހުންނަ ބީބީސީގެ އޮފީސް ބަލާ ފާސް ކޮށްފައެވެ. ބީބީސްއިން ވަނީ އެ ޑޮކިއުމެންޓްރީ ދިފާއުކޮށް، އިންޑިއާގެ ހުރިހާ ޓެކްސް ގަވާއިދަކަށް އަމަލު ކޮށްފައިވާނެކަމަށް ބުނެފައެވެ.
އިންޑިއާގެ އައްސާމް ސްޓޭޓުގެ ފުލުހުން ބުނެފައިވަނީ، އިދިކޮޅު ކޮންގްރެސް ޕާޓީގެ ސީނިއަރ އޮފިޝަލް ޚެރާ އިންޑިއާގެ ބޮޑުވަޒީރަށް "އިހުތިރާމް ކުޑަކޮށް" ދައްކާފައިވާ ވާހަކަތަކާއި ގުޅިގެން އޭނާ ހައްޔަރު ކުރުމަށް ފުލުހުން ނިއުދިއްލީ އެއަރޕޯޓުގައި ހަރަކާތްތެރި ވެފައިވާ ކަމުގައެވެ.
"އޭނާވަނީ، އިޖުތިމާއީ ހަމަޖެހުން ނަގާލުމަށް މަސައްކަތް ކޮށްފަ، މިއީ އިންޑިއާގެ ގާނޫނުލް އުގޫބާތުން މަނާކޮށްފައިވާ ކަމެއް،" އައްސާމް ސްޓޭޓްގެ ޕޮލިސް ތަރުޖަމާން ސީއެންއެންއަށް މައުލޫމާތު ދެމުން ވިދާޅުވެފައި ވެއެވެ.
ބުރާސްފަތު ދުވަހު އިންޑިއާގެ ސުޕްރިމް ކޯޓުންވަނީ، ކަފާލާތުގެ ދަށުން ޚެރާ ދޫކޮށްލުމަށް އަމުރު ކޮށްފައެވެ.
އިންޑިއާގެ ކޮންގްރެސް ޕާޓީން ވަނީ، ޚެރާ ހައްޔަރު ކުރުމަކީ ޑިމޮކްރަސީއާއި ބީރައްޓެހި އަމަލެއް ކަމުގައި ބުނެފައެވެ. "މި ޚުދުމުކްތާރު އުސޫލުތަކާއި ދަކޮޅުހަދަން،" ކޮންގްރެސް ޕާޓީން ނެރެފައިވާ ބަޔާނުގައި ބުނެފައި ވެއެވެ.
