ރައްޔިތުންގެ މަޖިލީހުގެ ގުރައިދޫ ދާއިރާގެ މެންބަރ އިބްރާހީމް ރިޒާ އަވަހާރަވުމަކީ ޕީޕީއެމް އާއި ރައީސް ޢަބްދުﷲ ޔާމީން ޢަބްދުލްޤައްޔޫމަށް ލިބިގެންދިޔަ ފޫނުބެއްދޭވަރުގެ ގެއްލުމެއްކަމުގައި އިދިކޮޅު ޕީޕީއެމް އިން ބުނެފިއެވެ.
ގުރައިދޫ ދާއިރާގެ މެމްބަރު ރިޒާ އަވަހާރަ ވުމުގެ ހިތާމާގައި ޕީޕީއެމްއިން ނެރު ބަޔާނުގައި ބުނެފައިވަނީ، އެޕާޓީގެ ސެނެޓަރެއްގެ މަގާމުގައިވެސް ހުންނެވި ރިޒާގެ ވަކިވެދިއުމުގެ ޚަބަރު ޕީޕީއެމް ކޯލިޝަންގެ އެންމެހާ މެމްބަރުން އެހީ ފުން ހިތާމައާއި އަސަރާއެކު ކަމަށެވެ.
މި ބަޔާނުގައި އިތުރަށް ބުނެފައިވަނީ ރިޒާއަކީ ޕީޕީއެމް އުފެދުނީއްސުރެ ޕާޓީއަށް ވަރަށް އަގުހުރި ޚިދުމަތްތަކެއް އެންމެ ފަހު ވަގުތާއި ހަމައަށްވެސް ކުރައްވަމުން ގެންދެވި ބޭފުޅެއް ކަމުގައެވެ. އަދި ޑީއާރުޕީއާއި ޕީޕީއެމްވެސް އުފެއްދުމުގައި ރިޒާ ގިނަގުނަ މަސައްކަތަކެއް ކުރައްވާފައިވާ ކަމުގައެވެ.
އޭގެ އިތުރުން ރައްޔިތުންގެ މަޖިލިހުގެ މެމްބަރެއްގެ ގޮތުގައި ވަރަށް ދިގު މުއްދަތަކަށް ހުންނަވައިގެން އަދި ގާނޫނީ ވަކީލެއްގެ ގޮތުގައިވެސް ދިވެހި ދައުލަތަށްވެސް އަގު ނުކުރެވޭނެ ޚިދުމަތްތަކެއް އިޚްލާސްތެރިކަމާއެކު ރިޒާ ކޮށްދެއްވާފައިވާކަން ޕީޕީއެމްގެ ބަޔާނުގައި ފާހަގަ ކޮށްފައި ވެއެވެ.
ރިޒާ އަވަހާރަވުމުގެ ހިތާމާގައި އޭނާގެ އާއިލާއަށާއި އަދި ދާއިރާގެ އެންމެހާ މެމްބަރުންނަށްވެސް ޕީޕީއެމްއިން ވަނީ އެޕާޓީގެ އެންމެހާ މެމްބަރުންގެ ނަމުގައި ދައުޒިޔާ ފޮނުވާފައެވެ.
ރިޒާ އަވަހާރަވެފައިވަނީ ކެންސަރުގެ އާލާސްކަންފުޅުގައި އުޅުއްވާތާ ގިނަ ދުވަސްތަކެއް ފަހުންނެވެ. އާލާސްކަންފުޅާ އުޅުއްވާތީ ރާއްޖެ އިން ބޭރުގައި އުޅުއްވާތާ ވެސް ގިނަ ދުވަސްތަކެއް ވެއްޖެއެވެ.
އިދިކޮޅު ޕީޕީއެމްގެ މެންބަރެއް ކަމަށްވާ ރިޒާ ވަނީ 18 ވަނަ ރައްޔިތުންގެ މަޖިލީހުގެ މެންބަރުކަން ވެސް ކުރައްވައިފަ އެވެ. އޭގެ އިތުރުން ކުރީގެ ރައީސް ޔާމީންގެ ސަރުކާރުގައި ޖުޑީޝަލް ސާވިސް ކޮމިޝަން (ޖޭއެސްސީ) ގައި ރައްޔިތުންގެ މަޖިލީހުގެ މެންބަރުންގެ ތެރެއިން ހޮވާ މެންބަރެއްގެ ގޮތުގައި ވެސް ހިމެނިވަޑައިގެންނެވިއެވެ.
މެންބަރަކަށް ވަޑައިގަތުމުގެ ކުރިން ގާނޫނީ ވަކީލެއްގެ ގޮތުގައިވެސް މަސައްކަތް ކުރެއްވެވި ރިޒާ ވަނީ ނިމިދިޔަ 18 ވަނަ ރައްޔިތުންގެ މަޖިލީހުގެ މެންބަރެއްގެ ހައިސިއްޔަތުން ޖުޑިޝަލް ސާވިސް ކޮމިޝަންގެ މެންބަރުކަން ކުރައްވާފަ އެވެ.
ހިނގަމުން މިދާ 19 ރައްޔިތުންގެ މަޖިލީހުގެ މެންބަރެއްގެ ގޮތުގައި ހުންނެވި ކޮމަންޑޫ ދާއިރާގެ ކުރީގެ މެންބަރު ހުސައިން ވަހީދު ވެސް ވަނީ އަވަހާރަވެފައެވެ. އޭނާ އަވަހާރަވީ ޑިސެމްބަރު 14، 2021 ގައެވެ.
ގާނޫނުއަސާސީގެ 79 މާއްދާގައި ބުނެފައިވަނީ ރައްޔިތުންގެ މަޖިލީހުގެ މެންބަރަކު މެންބަރުކަމުން ވަކިވުމުގެ ސަބަބުން ހުސްވާ ގޮނޑިއަށް އެ ގޮނޑި ހުސްވާ ތާރީހުން ފެށިގެން 60 ދުވަހުގެ ތެރޭގައި މެންބަރަކު އިންތިހާބު ކުރަންވާނެ ކަމަށެވެ. ގާނޫނީ ވަކީލުކަން ވެސް ކުރެއްވި ރިޒާ ވަނީ ޖޭއެސްސީގެ ނައިބު ރައީސްކަމުގެ މަގާމު ވެސް ފުރުއްވައިފައެވެ.
