މީގެ 12 މަސްކުރިން ޔޫކުރެއިން ހަނގުރާމަ ފެށުނުފަހުން މިހާތަނަށް 8،006 އާންމު ރައްޔިތުން މަރުވެފައިވާ ކަމުގައި ޔުނައިޓެޑް ނޭޝަންސް އޮފީސް ފޯރ ހިއުމަން ރައިޓްސް (OHCHR)އިން ހާމަކޮށްފިއެވެ.
OHCHR އިން ހާމަ ކޮށްފައިވާ ގޮތުގައި، މީގެއިތުރުން މި ހަނގުރާމާގައި 13,287 އާންމު ރައްޔިތުންނަށް އަނިޔާވެފައިވާ ކަމުގައެވެ.
އިންސާނީ ޙައްގުތަކާބެހޭ، ޔޫއެންގެ ހައިކޮމިޝަނަރ ވޯލްކަރ ޓާރކް ވިދާޅުވި ގޮތުގައި، މި އަދަދުތަކުން އެކަނިވެސް ރަޝިއާއިން ޔޫކުރެއިންއަށް ދެމުންދާ އުދުވާނީ ހަމާލާތަކުން އާންމު ރައްޔިތުން ތަހައްމަލް ކުރަންޖެހިފައިވާ ވޭނާއި ކެކުޅުންތައް ހާމަވެގެން ދެއެވެ.
"އަހަރެމެންގެ މިއަދަދު ތަކަކީ ވަރަށް މަދު މިންވަރެއް. މި ހަނގުރާމައިގެ ސަބަބުން އާންމު ރައްޔިތުން ދައްކާން ޖެހިފައިވާ އަގަކީ ތަހައްމަލް ކުރެވޭނެ ކަމެއް ނޫން. ފިނި މޫސުމުގައި ފެނާއި ކަރަންޓުން މަހުރޫމުވެފައިވާ 18 މިލިއަން މީހުންނަށްވަނީ އިންސާނީ އެހީތެރިކަން ބޭނުންވެފަ. 14 މިލިއަން މީހުންނަށް ވަނީ ގެދޮރު ނެތިފަ،" އޭނާ ވިދާޅުވިއެވެ.
ޔޫކުރެއިންގައި މަސައްކަތް ކުރަމުންދާ OHCHRގެ މުވައްޒަފުން ފާހަގަ ކޮށްފައިވާ ގޮތުގައި، މި ހަނގުރާމާގައި މަރުވެފައިވާ މީހުންނާއި އަދި އަނިޔާވެފައިވާ މީހުންގެ އަދަދު ޔުއެންއިން އާންމު ކޮށްފައިވާ އަދަދަށްވުރެ މާ ބޮޑަށް މަތިވާނެއެވެ. ސަބަބެއް ކަމުގައި ފާހަގަ ކޮށްފައިވަނީ، ޔުއެންއިން އާންމު ކޮށްފައިވާ އަދަދުތަކަކީ، މަރުވީ މީހުންގެ ވަނަވަރު ކަށަވަރު ކުރުމަށްފަހު އާންމު ކޮށްފައިވާ އަދަދުތަކަށް ވާތީއެވެ.
މިމަހުގެ 24 ވަނަ ދުވަހަކީ މިހަނގުރާމައަށް 1 އަހަރު ފުރޭ ތާރީޚެވެ.
