ވެރިކަން ކުރާ މައި ޕާޓީ އެމްޑީޕީން ވެރިކަމަށް އައުމަށްޓަކައި 2018 ވަނަ އަހަރު ރައްޔިތުންނަށް ވީ ވައުދުތަކަށް ބޭވަފާ ވެފައިކަމަށް ކުރީގެ ފޮރިން މިނިސްޓަރ ދުންޔާ މައުމޫން ވިދާޅުވެއްޖެއެވެ.

މޯލްޑިވްސް ނޭޝަނަލް ޕާޓީ، އެމްއެންޕީގެ އަންހެނުންގެ ގޮފީގެ ލީޑަރުގެ މަޤާމުވެސް ފުރުއްވަމުންދާ ދުންޔާ ކުރެއްވި ޓުވީޓެއްގައި ވިދާޅުވީ އެމްޑީޕީން ރައްޔިތުންނަށް ބޭވަފާ ވެފައިވާކަމަށެވެ. ވެރިކަމަށް އައުމަށް އެމްޑީޕީން ރައްޔިތުންނަށް ވެފައިވާ ވައުދުތަކުގެ ތެރެއިން ގިނަ ކަންކަން ނުވެހުރިކަން ދުންޔާ ވަނީ ފާހަގަކޮށްފައެވެ.

ވެރިކަމަށް އައުމަށް ޒުވާނުންނަށް ވެފައިވާ ވައުދުތަކަށް އަލި އަޅުވާލައި ދުންޔާ ވިދާޅުވީ ވަޒީފާގެ ފުރުސަތުތައް ތަނަވަސްކޮށް ޒުވާނުންނަށް ވަޒީފާގެ ފުރުސަތު ހޯދައިދޭނެކަމަށް ވައުދުވި ނަމަވެސް އެކަން ނުވިކަމަށެވެ. މިހާރުވެސް ވަޒީފާ ނެތް ނިސްބަތް 25 އިންސައްތައިން މަތީގައި ހުރިކަމަކީ ފެންނަން އޮތް ހަގީގަތް ކަމަށް ދުންޔާ ވިދާޅުވިއެވެ. އޭނާ ވިދާޅުވީ ސްލޫކު ނިންމާފައި އެތައް ހާސް ދަރިވަރަކު މިހާރުވެސް ވަޒީފާ ނުލިބި ދަތިހާލުގައި އުޅެމުންދާކަމަށެވެ.

އެމްޑީޕީ އިން ވައުދަށް ވީ ބޭވަފާ: "އުފެއްދުންތެރި ޒުވާނުން" ނަށް 2018ގައި ވީ ވައުދު ކޮބާ؟ ވަޒީފާ ނުލިބޭ ޒުވާނުންގެ ނިސްބަތް %25 އަށްވުރެ މަތި. ސްކޫލަކަށް ނުވަދެވި އަދި 18 އަހަރު ނުފުރޭތީ ވަޒީފާއަކަށް ނުވަދެވި 8 ހާހަށްވުރެ ގިނަ ކުދިން އެބަތިބި. ދިވެހިންގެ ކުރިމަގަށް ވީ ބޭވަފާ!

– ދުންޔާ މައުމޫން ވިދާޅުވިއެވެ.

ދުންޔާ ސަރުކާރަށް ފާޑުވިދާޅުވެ ވާހަކަ ދެއްކެވިއިރު، އެމްއެންޕީން މިއަދު ވަނީ ރައީސް އިބްރާހިމް މުހައްމަދު ޞާލިހު އިއްވެވި ރިޔާސީ ބަޔާނަށްވެސް ވަރަށް ބޮޑަށް ފާޑު ކިޔާފައެވެ. އެމްއެންޕީން ބުނީ ރިޔާސީ ބަޔާނަކީ މިއަހަރު ބާއްވާ ރިޔާސީ އިންތިޚާބަށް ވައުދުވުމަށް އިއްވި ބަޔާނެއްކަމަށެވެ.

އެމްއެންޕީން ބުނީ މި އަހަރުގެ ރިޔާސީ ބަޔާނުގެ ފެށުމުގައި ސަރުކާރުގެ ކުރިމަތީގައި ތިބޭނީ ހަމަހަމަ ދިވެހިން ކަމަށާއި އަދި ރާއްޖެއަށް ގެންނަވަން ވައުދުވެފައިވާ ބަދަލުގެ ފަހަތުގައިވަނީ، ރައްޔިތުންގެ އުފާފާގަތި ދިރިއުޅުމާއި، ބާއްޖަވެރިކަމާއި ތަނަވަސްކަމާއި ފުދުންތެރިކަން ކަމަށް ބަޔާންކޮށްފައި އޮތް ކަމަށެވެ.

"އެހެން ނަމަވެސް، މި އަހަރުގެ ރިޔާސީ ބަޔާނުން ފެނިގެންދިޔައީ، ރައީސުލްޖުމްހޫރިއްޔާއަށް ޤާނޫނުއަސާސީން މަތިކޮށްފައިވާ ރިޔާސީ ބަޔާން އިއްވުމުގެ ބާރާއި ޒިންމާ، މި އަހަރުގެ ރިޔާސީ އިންތިހަބަށް ވަޢުދުތަކެއް ވެވަޑައިގަތުމަށް ބޭނުންކުރެއްވިތަން. އަދި ދައުލަތުގެ ހިންގުމުގެ ސިޔާސަތަކީ، ގައުމީ ވިސްނުމާއި ރޭވުންތެރިކަމެއް ނެތި، ފެންފައިބާ ތަންތަނުގައި ޕެޗް އެޅުމުގެ ވިސްނުމުން ހިންގަވާ ސިޔާސަތެއްކަން ފެނި ހާމަވެގެން ދިޔަ ތަނެވެ." އެމްއެންޕީގެ ބަޔާނުގައި ވެއެވެ.

އޭގެ އިތުރުން ރާއްޖޭގައި އަވަހަށް ހައްލުކުރަންޖެހޭ ސީރިއަސް މައްސަލަތަކެއް ހުރިއިރު، އެކަންކަމުގެ ހައްލުތަކުގެ ވާހަކަނެތި، ވޯޓަށްޓަކައި މީހުން ރުއްސުމަށް ދޭ ހަދިޔާތަކެއްގެ ވާހަކަ މުޅި ރިޔާސީ ބަޔާނުގައި ހިމަނުއްވާފައިވާ ކަމަށް ވެސް އެމްއެންޕީން ބުނެފައި ވެއެވެ.