ކޯވިޑް-19ގެ ޙަލަތާއި ގުޅިގެން ލޯނާއި ހިލޭ އެހީގެ ގޮތުގައި މިހާތަނަށް 520 މިލިއަން ޑޮލަރު ލިބިފައިވާކަމަށް ފިނޭންސް މިނިސްޓަރ އިބްރާހީމް އަމީރު ވިދާޅުވެއްޖެއެވެ.
މިނިސްޓަރ މިހެން ވިދާޅުވީ، ރައްޔިތުންގެ މަޖިލީހުގެ މިއަދުގެ ޖަލްސާއަށް ޙާޒިރުކުރައްވާ މެންބަރުން އަމާޒުކުރެއްވި ސުވާލުތަކަށް ޖަވާބުދެއްވަމުންނެވެ. މިނިސްޓަރ ވިދާޅުވީ މިއަހަރަށް ލަފާކޮށް ހުށައެޅި ބަޖެޓުގެ އަންދާޒާތަކަށް ވަރަށް ބޮޑެތި ބަދަލުތަކެއް އައިސްފައިވާކަމަށެވެ. އެގޮތުން ހިލޭއެހީއާއި ލޯންގެ ގޮތުގައި 30 ބިލިއަން ރުފިޔާ ލިބޭނެކަމަށް ކުރިން އަންދާޒާކުރިނަމަވެސް މިހާރު ލިބޭނެކަމަށް އަންދާޒާކުރަނީ 14 ބިލިއަން ރުފިޔާކަމަށެވެ. އަދި އެއީ 15 ބިލިއަން ރުފިޔާގެ ދަށްވުމެއްކަންވެސް މިނިސްޓަރ ފާހަގަކުރެއްވިއެވެ.
ކޯވިޑް19ގެ ޙާލަތާއި ލޯންގެ ގޮތުގައާއި ކޮންސެޝަނަލް އެހީގެ ގޮތުގައި އަދި އެހެން ގޮތްގޮތުން އަޅުގަނޑުމެންނަށް 520 މިލިއަން ޑޮލަރު ހަމަޖެހިފައިވާ ވާހަކަ ދަންނަވަން
ދައުލަތުގެ އާމްދަނީ ދަށްވިނަމަވެސް ރައްޔިތުންނަށް ބޭނުންވާ އަސާސީ ޚިދުމަތްތައް މެދުނުކެނޑި ފޯރުކޮށްދެމުން އަންނަކަމަށް މިނިސްޓަރ ވިދާޅުވިއެވެ. އަދި އެއްވެސް ތަރައްޤީގެ މަޝްރޫޢެެއްވެސް ނުހުއްޓޭކަމަށާއި ނުހުއްޓޭނެކަމުގެ ޔަޤީންކަން މިނިސްޓަރ ދެއްވިއެވެ. އެމަޝްރޫޢުތަކަށް ދައުލަތުން ދައްކަންޖެހޭ ފައިސާތައްވެސް ދައްކަވަމުން ގެންދަވާކަމަށާއި، އާމްދަނީއަށް އަސަރުކުރި މީހުންނަށް އެލަވަންސްތައް ދެމުން އަންނަކަމަށްވެސް ވިދާޅުވިއެވެ.
The Government of Maldives has now successfully secured $520m as Covid-19 financing from different donors. Details find below ?https://t.co/Ky0NGSx9zy
— އިބްރާހިމް އަމީރު (@iameeru) October 7, 2020
މީގެ އިތުރުން ސިއްޙީ ދާއިރާއަށް އިންވެސްޓްކުރަމުންވެސް ކޯވިޑްގެ ބަލިމަޑުކަން ރާއްޖޭގައި ވަރަށް ބޮޑަށް ކޮންޓްރޯލްކުރެވިފައިވާކަމަށްވެސް ފިނޭންސް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ އަންނަ އަހަރަށް ލަފާކޮށް ހުށައަޅާ ބަޖެޓުގައި ފަތުރުވެރިކަމަށް ބަރޯސާވާ މިންވަރު ކުޑަކޮށް ދަނޑުވެރިކަމާއި މަސްވެރިކަމަށް އިންވެސްޓްކުރުމަށް މުސްތަޤްބަލަށް ރާވަފައިވާ ކަންކަން ފެންނާކެމަަށެވެ.
ތިބޭފުޅުންނަށް އެނގިވަޑައިގަންނަވާނެ އެންމެ ފުރަތަމަ އަޅުގަނޑުމެން ސާމްޕަލް ނަގައިގެން ފޮނުވަންޖެހުނީ އިންޑިއާގެ ޕޫނޭއަށް ޓެސްޓްކުރަން. ރާއްޖޭގައި މިހާރު 5 ހާސް ޓެސްޓްކުރެވޭނެ ކެޕޭސިޓީ އެބަހުރި. މާލެއާއި ރަށްރަށުގައި ފެސިލިޓީތައް އެބަހުރި. ސޯޝަލް ސެކްޓައަށްވެސް އިންވެސްޓްކުރަމުން އާސަންދަ ނުހުއްޓި ބަރާބަރަށް އެބަދޭ.
ކޯވިޑް-19ގެ މިޙާލަތަކީ އެއްވެސްވަރަކަށް އަންދާޒާކުރެވުނުވެސް ހާލަތަކަށްނުވާތީ މިކަމުން އަރައިގަތުމަށް ސަރުކާރުން ވަރަށްގިނަ މަސައްކަތްތަކެއް ކުރަމުންދާކަމަށްވެސް މިނިސްޓަރ އަމީރު ވިދާޅުވިއެވެ.
