2021 އަހަރުގެ އޮކްޓޯބަރު މަހުގެ 19ވަނަ ދުވަހު މަރާލާފައިވާ، އައިޖީއެމްއެޗުގެ ނަރުސް، މޭރީ ގްރޭސްގެ މަރުގެ މައްސަލާގައި ދައުވާލިބޭ ހަލީމަތު ލަމްހާއާ ދެކޮޅަށް އޭނާގެ ރަހުމަތްތެރިއަކު ކްރިމިނަލް ކޯޓުގައި މިއަދު ހެކިބަސް ދީފިއެވެ.
2021 ވަނަ އަހަރު އޮކްޓޯބަރު މަހުގެ 19ވަނަ ދުވަހު މޭރީ މަރާލި މައްސަލަ ފުލުހުން ތަޙުގީގުކުރަން ފެށީ، އެޙާދިސާއާ ގުޅިގެން އާދަޔާ ޚިލާފު ކަންތައްތަކެއް ފާހަގަކުރެވިގެންނެވެ. އޭނާ މަރުވެގެން ހޮސްޕިޓަލަށް ގެންގޮސްފައިވަނީ އޭނާގެ ފިރިމީހާއެވެ. އޭރު އޭނާ ބުނީ މޭރީ ދަންޖެހިގެން އަމިއްލައަށް މަރުވީކަމަށެވެ. މޭރީގެ މަރުގެ މައްސަލާގައި ހެދި ޕޯސްޓްމޯޓަމް ރިޕޯޓްގައިވާ ގޮތުން މޭރީ މަރާލާފައިވަނީ ނޭވާ ހާސްކޮށްލައިގެންނެވެ.
ކްރިމިނަލް ކޯޓުގައި ކުރިއަށްދާ ޝަރީއަތުގައި މިއަދު ހަމަޖެހިފައި އޮތީ ތިން މީހެއްގެ ހެކިބަސް ނެގުމެވެ. އޭގެ ތެރޭގައި ހިމެނެނީ ތަހުގީގުގައި ބައިވެރިވި ދެ އޮފިސަރެއްގެ ހެކިބަހާއި ލަމްހާގެ އެކުވެރިއެއްގެ ހެކިބަހެވެ. އެއީ މުހައްމަދު މުބީން (ލަމްހާގެ އެކުވެރިއެއް، ފުލުހެއް)، މަރިޔަމް ލައުޒާ (އޯގަނައިޒް ކްރައިމް ޑިޕާޓްމަންޓްގެ އޮފިސަރެއް)، އާދަމް މުހައްމަދު (ވީޑިއޯ އިމޭޖް އެނަލިސިސް ރިޕޯޓް ތައްޔާރުކުރި އޮފިސަރެއް) އެވެ.
މީގެ ތެރެއިން ފުލުހުންގެ ތެރޭގައި މަސައްކަތް ކުރާ ލަމްހާގެ އެކުވެރި މުބީން ބުނެފައިވަނީ ލަމްހާ އާއި މާވިން ލޯބީގެ ގޮތުން ގުޅިގެން އުޅޭކަން މޭރީ އަށް އެނގިގެން ލަމްހާ އަށް މޭރީ މެސެޖްކޮށް، އެކަން އައިޖީއެމްއެޗަށް ހުށަހަޅާނެ ކަމަށް ބުނުމުން މޭރީއާ ވާހަކަ ދައްކައިގެން އެކަން ހައްލުކުރަން ލަމްހާ އެދުނުކަމަށެވެ.
ލަމްހާގެ އެކުވެރިޔާ މުބީނަކީ ދިވެހި ފުލުހުންގެ ހިދުމަތުގައި މަސައްކަތް ކުރަމުން އަންނަ މީހެކެވެ. މި ދުވަސްވަރު އޭނާ ހުރީ ވެސް ދ. ވާނީ ޕޮލިސް އެކަޑަމީ ޓްރެއިނިންއެއްގަ އެވެ. ހެކިބަސް އަދާކުރީ ވެސް ދ. ކުޑަހުވަދޫ މެޖިސްޓްރޭޓް ކޯޓުގައި ހުރެ އޮންލައިންކޮށް ބައިވެރިވެގެނެވެ.
އެހެންވެ، ލަމްހާގެ އެދުމުގެ މަތިން މޭރީއަށް ގުޅައިގެން މޭރީއާ ހެކިވެރިޔާ ބައްދަލުކުރި ކަމަށާއި މޭރީ ވެސް ބޭނުންވީ ވާހަކަ ދައްކައިގެން ހައްލު ކުރަން ކަމަށް އެ ހެކިވެރިޔާ ބުންޏެވެ. އަދި އެ ވާހަކަ ލަމްހާ ގާތު ބުނުމުން މާވިންއާ އޮތް ލޯބީގެ ގުޅުން ހުއްޓާލާނެ ކަމަށް ލަމްހާ ބުނި ކަމަށް ވެސް އޭނާ ބުންޏެވެ. އޭނާ ބުނިގޮތުގައި މޭރީ މަރުވި ދުވަހު ލަމްހާ އޭނާއަށް ގުޅާފައި، މޭރީ އޭނާގެ އަމިއްލަ ނަފްސަށް ގެއްލުން ދީގެން މާވިން ޑީޕޯޓްކޮށްލަން އުޅެނީ ކަމަށް ބުންޏެވެ. އަދި ފަހުން، މޭރީ މަރުވި ވާހަކަ އޭނާއަށް ގުޅާފައި ބުނީ ވެސް ލަމްހާ ކަމަށް އެ ހެކިވެރިޔާ ބުންޏެވެ.
އަޅުގަނޑު ދިޔައިން އައިޖީއެމްއެޗަށް. އަދި ލަމްހާއަށް ގުޅުމުން އޭނަ ވެސް އެ ތަނަށް އައި. މޫނު މަތިން އެއްވެސް ވަރަކަށް ދެރަވުމުގެ އިހުސާސެއް ނެތް. ވަރަށް އެކްސައިޓްވެފައި ހުރި ގޮތަކަށް، ވަރަށް ހިތްހަމަޖެހިލައިގެން ހިނިތުން ވެފައި ހުރީ.
– ލަމްހާގެ އެކުވެރި ފުލުސް މީހާ މުބީން ބުނެފައިވެއެވެ.
އޭގެ ފަހުން އެކި ފަހަރު މަތިން ލަމްހާ ގުޅާފައި "މައްސަލައަށް ވާނީ ކިިހިނެއްހޭ" ސުވާލުކުުރަމުން ދިޔަ ކަމަށް މުބީން ބުންޏެވެ. މީގެ ކުރިން ވެސް ފުލުހުގައި މަސައްކަތް ކުރި ބައެއް މީހުން ވަނީ އެ މީހުންނަށް ގުޅާފައި ލަމްހާ އެކަން ސާފުކުރުމަށް މަސައްކަތް ކުރި ކަމަށް ބުނެ ހެކިބަސް ދީފައެވެ.
ލަމްހާގެ ވަކީލުން މައިގަނޑު ގޮތެއްގައި ސުވާލުކުރަމުން ދިޔައީ މޭރީ އާއި މުބީނާ ދެމެދު ގުޅުމެއް އޮތްތޯ ސާފުކުރުމަށެވެ. މުބީން ބުނަމުން ދިޔައީ އޭނާ މޭރީއާ ކުރިހާ ވެސް މުއާމަލާތަކީ ލަމްހާ އެދިގެން ސުލްހަކުރަން ކުރި މުއާމަލާތާއި މޭރީ އެދިގެން މާވިން އިސްލާމް ވެއްޖެތޯ ބެލުމަށް ކުރި މުއާމަލާތް ކަމަށެވެ. އޭގެ އިތުރަށް މޭރީއާ އެކު އެއްވެސް ވާހަކައެއް ދައްކާފައިނުވާނެ ކަމަށް އޭނާ ބުންޏެވެ.
ދެން މިއަދު ހެކިބަސް ދިނީ މާލޭގެ އެކި ސަރަހައްދުތަކާއި މޭރީ އުޅުނު ގޭގެ ކެމެރާގެ ވީޑިއޯ ފުޓޭޖްތައް ތަހުލީލުކުރި ފުލުސް މީހާއެވެ. އޭނާ ބުނިގޮތުގައި ވީޑިއޯތަކުން ފެންނަނީ މާވިން ކަން ޔަގީންކަމާ އެކު ބުނަން އެނގުނަސް، ދެން ފެންނަ މީހަކީ ލަމްހާ ކަން ޔަގީންކަމާ އެކު ބުނާކަށް ނޭނގެއެވެ. އެ ފުލުސް މީހާ ބުނިގޮތުގައި މޭރީ މަރުވި ދުވަހު އައިޖީއެމްއެޗަށް މާވިންގެ ސައިކަލުގައި މޭރީ ގެންދިއުމަށްފަހު މާވިން އެނބުރި ގެއަށް އައިސް ދަރިފުޅު ގޮވައިގެން ނިކުމެގެން، މާލޭގެ ގޯޅިއަކަށް ގޮސް އެހެން މީހަކާ ދަރިފުޅު ހަވާލުކުރެއެވެ. ދަރިފުޅާ ހަވާލުވި މީހެއް އެއްވެސް ކެމެރާއަކަށް ނާރައެވެ.
ތިން ވަނައަށް ހެކިބަސް ދިނީ މޭރީ މަރުވިކަމުގެ ރިޕޯޓް ލިބިގެން އައިޖީއެމްއެޗާއި އެ ގެއަށް ދިޔަ ފުލުހެކެވެ. އެ ފުލުސް މީހާ ބުނިގޮތުގައި އައިޖީއެމްއެޗްގައި މާވިންއާ ސުވާލު ކުރުމުން، މޭރީ މަރުވީ ބެޑް ޝީޓެއް ބޭނުންކޮށްގެން ކުޑަދޮރެއްގައި ދަންޖެހިގެން ކަމަށް އޭނާ ބުނެފައިވެއެވެ. އޭނާ ބުނިގޮތުގައި މޭރީ މަރުވެފައި އޮތްއިރު އޭނާގެ މޫނު ރަތްވެ އަދި ލައިގެން ހުރި ހެދުން އޮތީ ތެމިފަ އެވެ. އަދި ފައިގައި ޒަހަމެއް ހުރި ކަމަށް ވެސް އޭނާ ބުންޏެވެ.
އިތުރު ފުލުހުންނާ އެކު، އެ ގެއަށް ގޮސް ބެލިއިރު ކޮޓަރީގެ ކުޑަ ދޮރެއްގެ ކައިރީގައި ވެއްޓިފައި އޮތް ބެޑްޝީޓެއް އޮތް ކަމަށް އެ ފުލުސް މީހާ ބުންޏެވެ. އަދި އެތަނުގައި ސިރިންޖް ހުސްކުރި ޕެކެޓަކާއި ފަސް ލީޓަރުގެ ފެން ފުޅިއެއް އޮތް ކަމަށް ވެސް އޭނާ ބުންޏެވެ.
މާވިންގެ މައްޗަށް ދައުލަތުން އުފުލާފައިވަނީ ގަސްތުގައި މީހަކު މެރުމުގެ ކުށުގެ ދައުވާއެވެ. އަދި ލަމްހާގެ މައްޗަށް އިތުރު 3 ދައުވާއެއް އުފުލާފައިވެއެވެ. އެއީ އެނގިހުރެ މީހަކު މެރުމުގައި ބައިވެރިވުމާއި، އެހެން މީހެއްގެ މުދަލެއްގެ މައްޗަށް ހުއްދަނޫން ގޮތެއްގައި ބާރު ހިންގުމުގެ ކުށުގެ ދައުވާއާއި، ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގައި ކުރުމުގެ ދައުވާއެވެ. މިމައްސަލައިގެ އަޑު އެހުމެއް ބޭއްވުމަށް ދެން ތާވަލް ކޮށްފައިވަނީ މިމަހުގެ އަށްވަނަ ދުވަހުއެވެ.
