އިންތިޚާބުތަކަށް ކޯޓުތަކުން އަތް ނުބޭނުމަށް ވަކާލާތު ކުރި ފަރާތްތަކަށް، އެންމެ ފަހުން މިވީ ކިހިނެއް؟

ދިވެހިރާއްޖެ ޑިމިކްރަސީއަށް އަލި ވިލުމަށްފަހު، އެންމެ ފާޅުކަން ބޮޑު ގޮތެއްގައި ފެނިގެން ގޮސްފައިވަނީ، ދިވެހިންނާއި އެހާތަނާއި ހަމައަށް ވަރަށް ބީރައްޓެ ބަސްތަކާއި، އިބާރާތްތަކާއި، އަދި ޒީނަތްތެރި ވީހާ ވާހަކަތަކެއް ބައެއް ފަރާތްތަކުން ދިވެހިންގެ ތެރެއަށް ތައާރަފް ކުރި މަންޒަރުތަކެވެ.

މީގެ ތެރެއިންވެސް ވަކީ ޚާއްސަ ގޮތެއްގައި، އެމްޑީޕީގެ ރައީސް މުހައްމަދު ނަޝީދާއި އެމަނިކްފަނަށް ތާއީދުކުރާ ފަރާތްތަކުން ވަކާލާތު ކުރަމުން އައިސްފައިވަނީ، އިންސާނީ ހައްގުތައް ރައްކާތެރިކޮށް، ދިވެހި ރާއްޖެއަށް ޑިމޮކްރަސީ ތައާރަފް ކުރުމަށް ހަމަ ހަމައެކަނި މަސައްކަތް ކުރެއްވި ފަރާތަކީ، "ދެކުނު އޭޝިއާގެ މަންޑޭލާ"ގެ ގޮތުގައި އެބޭފުޅުން ލޭބަލް ކުރަމުންއައި، ކުރީގެ ރައީސް މުހައްމަދު ނަޝީދު ކަމުގައެވެ.

އެހެންނަމަވެސް، ވެރިކަމަށް ވަޑައިގެން، ނަޝީދުގެ ވެރިކަމުގައި ގާޒީއަކުން ނިޒާމުން ގެއްލުވާލައި، އެއަށްފަހު އުފެދިގެންދިޔަ ސިޔާސީ ހަލަބޮލިކަމުގެ ތެރެއިން އޭރުގެ ސަރުކާރު ވެއްޓިގެން ދިއުމަށްފަހު، ނަޝީދަކީ "ދެކުނު އޭޝިއާގެ މަންޑޭލާ"ގެ ގޮތުގައި ނަޝީދަށް ތާއީދުކުރާ ފަރާތްތަކުން ސިފަކުރަމުން އައިއައުން ހުއްޓުމަކަށް އައިސްފައި ވެއެވެ.

އެހެންނަމަވެސް، އެއާއެކުވެސް، މިރާއްޖޭގައި މިނިވަން އިންސާފްވެރި އިންތިޚާބުތައް ބޭއްވެން ޖެހޭނެކަމަށާއި، އިންތިޚާބުތައް މިނިވަން އިންސާފްވެރި ވެގެންދަނީ، އިންތިޚާބުތަކުގެ ތެރެއަށް ކޯޓުތަކުން އަތް ބޭނުން ހުއްޓުވާ، ބަލިވާ ފަރާތުން މޮޅުވާ ފަރާތުގެ ފަހަތައް އަރުއްވާ ޑިމޮކްރަސީގެ ރިވެތި ނަމޫނާ ދައްކުވައި ދީގެން ކަމަށާއި، މި މޭރުމުން، ޑިމޮކްރަސީގެ ރިވެދި އާދަކާދައިގެ ވާހަކަ މިރާއްޖޭގައި އެންމެ އަޑުހަރުކޮށް ދައްކަވާ، ވަކާލާތު ކުރައްވަމުން ގެންދަވާފައިވަނީ، ކުރީގެ ރައީސް ނަޝީދުއާއި އެމަނިކުފާނަށް ތާއީދުކުރާ ފަރާތްތަކުންކަން މިފުރުސަތުގައި ފާހަގަ ކޮށްލާން ޖެހެއެވެ.

މިގޮތުން މިއުސޫކުލުން ވާހަކަ ދައްކަވާ، ފާއިތުވެދިޔަ ކައުންސިލް އިންތިޚާބުގައިވެސް ނަޝީދަށް ތާއީދުކުރާ ފަރާތްތަކުން ވަނީ، ޕާޓީގެ އެތެރޭގައި، ކައުންސިލް އިންތިޚާބަށް އަމާޒުކޮށް ބޭއްވުނު ޕްރައިމަރީގައި ބަލިވާ ކެނޑިޑޭޓުންނަށް މޮޅުވާ ކެނޑިޑޭޓުންގެ ފަހަތަށް ނޭރޭނަމަ، ސިޔާސީ ޕާޓީއެއްގައި ދެމިތިބުމުގެ ބޭނުމެއް ނެތްކަމަށް ބުނެ، އެމޭރުމުން އެތައް ފަހަރެއްގެ މަތިން ވާހަކަ ދައްކަވާފައެވެ.

އެއަށްފަހު، ޕާޓީގެ އެތެރޭގައި ބޭއްވުނު އެންމެ ވާދަވެރި އިންތިޚާބެއްގެ ގޮތުގައި ދެން އެޕާޓީއަށް ކުރިމަތިލާން ޖެހުނީ ފާއިތުވެދިޔަ މަހުގެ 18 ވަނަ ދުވަހު ބޭއްވުނު އެމްޑީޕީގެ ރިޔާސޫ ޕްރައިމަރީއެވެ. މި ރިޔާސީ ޕްރައިމަރީގައި ވާދަ ކޮށްފައިވަނީ، އެމްޑީޕީގެ އެންމެ އިސް ދެ ލީޑަރުން ކަމުގައިވާ، ޕާޓީގެ އިސް ލީޑަރު، ރައީސް ސާލިހާއި، ޕާޓީގެ ރައީސް މުހައްމަދު ނަޝީދެވެ.

ޕްރައިމަރީ ނިމިގެން ދިޔައީ، އެއްބަޔަކު އަނެއްކަޔަކަށް ޒާތީގޮތުންނާއި އެނޫން ގޮތްގޮތުންވެސް ދިމާކޮށް، ފާޑުކިޔާ، ޕްރައިމަރީ އޮތް ދުވަހު ޕާޓީގެ މެމްބަރުން ނިކުމެ ވޯޓު ފޮށިތައް ފަޅާލާ، އަދި އިންތިޚާބުން ބަލިވިޔަސް އެއްބަޔަކު އަނެއް ބައެއްގެ ފަހަތަައް ނާރުއްވާނޭކަމަށް ވީ ވައުދުތަކާއެކީއެވެ.

މިއީ، އެތައް އަހަރެއް ވަންދެން ޑިމޮކްރަސީގެ ރިވެތި ނަމޫނާ ދައްކަވަމުން، ޑިމޮކްރަސީގެ ޗެމްޕިއަންކަމުން މެޑަލް ޖައްސަވަމުން ވަޑައިގެންނެވި، އެޕާޓީގެ ރައީސް މުހައްމަދު ނަޝީދުގެ ކެމްޕޭން ޓީމުގެ ފަރާތުން، ފާއިތުވެދިޔަ ރިޔާސީ ޕްރައިމަރީގައި ފެނިގެންދިޔަ ޑިމޮކްރަސީގެ މިސާލުތަކުގެ ވާހަކަތަކެވެ.

ނަޝީދުގެ އެންމެ ފަހުން ޓީމުން ކޯޓަށް!

ރޭ ރައީސް ސާލިހާއި އެމްޑީޕީގެ ރިޔާސީ ޓިކެޓް ހަވާލުކުރުމަށް ބޭއްވުމަށް ޚާއްސަ ޖަލްސާ ބޭއްވުމަށް ހަމަޖެހިފައި ވަނިކޮށް، ފާއިތުވެދިޔަ ރިޔާސީ ޕްރައިމަރީގައި ބަލިވި، އެޕާޓީގެ ރައީސް މުހައްމަދު ނަޝީދުގެ ފެކްޝަނުންވަނީ، ރައީސް ސާލިހާއި ރިޔާސީ ޓިކެޓް ހަވާލުކުރު ހުއްޓުވުމަށް ކޯޓަށް ގޮސްފައެވެ.

އެމްޑީޕީގެ ރިޔާސީ ޓިކެޓް ރައީސް ސާލިހާއި ރަސްމީކޮށް ހަވާލު ކުރުމަށް އެޕާޓީން ހަމަޖައްސާފައި ވަނިކޮށް، ރިޔާސީ ޓިކެޓް ހަވާލުކުރުން ހުޓުވާ ދިނުމަށާއި، އަދި އެޕާޓީގެ ރިޔާސީ ޕްރައިމަރީ އަލުން ބާއްވާ ދިނުމުގެ ވަގުތީ އަމުރެއް ހޯދުމަށް ކޯޓަށް މައްސަލަ ހުށަހަޅުއްވާފައިވަނީ، ޕޮލިސް ބޯޑުގައި ހިމެނިވަޑައިގަންނަވާ، އަދި އެމްޑީޕީގެ ކުރީގެ އިންޓަރނޭޝަނަލް ސްޕޯލްސްޕާރސަން ހާމިދު އަބުދުލް އަފޫރެވެ.

ހާމިދު އަބުދުލް ޢަފޫރަކީ ފާއިތުވި ރިޔާސީ ޕްރައިމަރީގަވެސް އަދި އޭގެ ކުރިންވެސް ރައީސް ނަޝީދަށް ތާއީދު ކުރަމުންވަމުން ގެންދަވާ ބޭފުޅެކެވެ.

މި މައްސަލާގައި ހާމިދުގެ ވަކީލެއްގެ ގޮތުގައި ކޯޓަށް ވަޑައިގަތުމަށް ހަމަޖެހިފައިވަނީ، ނަޝީދުގެ ދައުރުގައި ބަންޑާރަނައިބުކަން ކުރެއްވި ދިޔާނާ ސައީދެވެ. ދިޔާނާއަކީ މީގެކުރިން ނަޝީދަށް ފާޑުވިދާޅުވެފައިވާ ބޭފުޅެއް ނަމަވެސް، ފާއިތުވެދިޔަ ރިޔާސީ ޕްރައިމަރީގައި ނަޝީދަށް ތާއީދު ކުރައްވާ، ޕްރައިމަރީ ކެމްޕޭންގައިވެސް ނަޝީދު އަރުހުގައި، ކެމްޕޭނަށް އައްޑޫއަށް ވަޑައިގެންނެވި ބޭފުޅެކެވެ.

ފާއިތުވެދިޔަ މަހުގެ 28 ވަނަ ދުވަހު ބޭއްވުނު ރިޔާސީ ޕްރައިމަރީ ރައީސް ސާލިހު ކާމިޔާބު ކުރެއްވީ 61 އިންސައްތައިގެ ބޮޑު އަޢުލަބިއްޔަތަކުންނެވެ. ޕްރައިމަރީގެ އިންތިޚާބުގައި ބަލިވި، އެ ޕާޓީގެ ރައީސް މުހައްމަދު ނަޝީދަށް ލިބިވަޑައިގެންނެވީ އެންމެ 39 އިންސައްތަ ވޯޓެވެ.

ހާމިދު ސިވިލް ކޯޓަށް މައްސަލަ ހުށަހެޅުއްވީ، ޕާޓީން ވަކިކުރި މެމްބަރުންގެ ވޯޓު ލުމުގެ ހައްގު ގެއްލޭގޮތަށް ބޭއްވި ޕްރައިމަރީއަކީ ސައްޙަ އިންތިޚާބެއް ނޫންކަމަށް ކަނޑައަޅާދީ، އެ މެމްބަރުން ހިމަނައިގެން އަލުން ރިޔާސީ ޕްރައިމަރީ ބާއްވާދިނުމަށް ކޯޓުން އެމްޑީޕީގެ މައްޗަށް އަމުރު ކޮށްދިނުމަށެވެ. އޭގެ އިތުރުން، ރިޔާސީ ޕްރައިމަރީއާއި ގުޅިގެން ކޯޓުން ވަކި ގޮތެއް ނިންމުމުގެ ކުރިން ރައީސް ސާލިހާއި އެޕާޓީން ރިޔާސީ ޓިކެޓް ހަވާލުކޮށްފާނެތީ، ރިޔާސީ ޓިކެޓް ހަވާލުކުރުން ހުއްޓުވައިދިނުމުގެ ވަގުތީ އަމުރެއްވެސް ކޯޓުން ނެރެ ދިނުމަށް ހާމިދު އެދިފައި ވެއެވެ.

އަލުން ރިޔާސީ ޕްރައިމަރީ ބާއްވާ ދިނުމަށާއި، އަދި ރިޔާސީ ޓިކެޓް ރައީސް ސާލިހާއި ހަވާލުކުރުން ހުއްޓުވާ ދިނުމަށް އެދި ހާމިދު ސިވިލް ކޯޓަށް ހުށހެއްޅެއްވި މައްސަލާގައި ބުނެފައިވަނީ އެމްޑީޕީޓީގެ މެންބަރަކު ވަކިކުރުމަކީ މެންބަރާ މެދު އަޅާ ފިޔަވަޅެއްކަން އެ ޕާޓީގެ އަސާސީ ޤަވާއިދުން އެނގެން އޮންނައިރު، ވަކިކުރި 39،000 މެންބަރުން ވަކިކުރީ ފިޔަވަޅު އެޅުމުގައި ޢަމަލު ކުރަންޖެހޭ އިޖުރާޢަތުތަކާ ޚިލާފަށް ކަމަށެވެ.

ރިޔާސީ ޕްރައިމަރީއަށްފަހު ނަޝީދު ބަލި ގަބޫލު ކުރެއްވިނަމަވެސް، ވިދާޅުވެފައިވަނީ އެމަނިކުފާނު ބަލިވީ އެމްޑީޕީން ގަވާއިދާ ޚިލާފަށް 39،000 މެމްބަރުން ވަކި ކޮށްފައިވާތީ ކަމަށާއި، ދެން ކުރިޔަށް ވަޑައިގަންނަވާނީ، ކެމްޕޭންގައި ގެންގުޅުއްވި "ފިކުރެއްގެ ދިރުން" ޕާޓީ ތެރޭގައި ކުރިޔަށްދާ ވަކި ސިޔާސީ ހަރަކާތަކަށް ހައްދަވައިގެން ކަމުފައެވެ. އެއަށްފަހު ނަޝީދުވަނީ "ފިކުރެއްގެ ދިރުން" ނަމުގައި 50،000 މެމްބަރުންގެ މައްޗަށް އެކުލެވޭ ގޮތްޕެއް އުފެއްދެވުމުގެ މަސައްކަތް ފައްޓަވާފައެވެ.

އެހެންނަމަވެސް، ރޭ، ރަސްމީކޮށް ރައީސް ސާލިހާއި ރިޔާސީ ޓިކެޓް ހަވާލުކުރުމަށް ބޭއްވި ޖަލްސާ ބޭއްވުމާއި ހަމައަށްވެސް މިމައްސަލާގައި ކޯޓުން ވަކި ގޮތެއް ނިންމަވާފައެއް ނުވެއެވެ.

ޑިމޮކްރަސީގެ ނަމުގައި މޮޅު ވާހަކަ ދައްކަވަމުން ވަޑައިގެންނެވި ބޭފުޅުންމަށް މިވީ ހިކިނެއް؟

ދިވެހިރާއްޖެ ޑިމޮކްރަސީއަށް، ފާއިތުވި 15 ވަރަކަށް އަހަރުތެރޭ ކޮށްފައިވާ ދަތުރުގައި، ރާއްޖެއަށް އައި ބޮޑެތި ބަދަލުތަކުގެ އެތައް ކުރެޑިޓެއް ނަންގަވާ، އެކަންކަމުން މެޑަލް ޖައްސަވަމުން ވަޑައިގެންނެވި ބޭފުޅުންނަށް، އަމިއްލަ މަސްލަހަތާއި އަރާ ހަމަވުމުން މިވީ ގޮތަކީ، މިއަދު ގިނަ ބަޔަކު އެތައް މޭރުމަކުން ދައްކަމުންދާ ވާހަކައަކަށް މިވަނީ ވެގެން ގޮސްފައެވެ.

ތިމާމެން ހަގީގީގީ ބައްޔަކުން ބަލިވުމުން، އެކަން ހަޖަމްނުވެ، ނަފްތަރާއި ޒާތީ ހަސަދަ ކުރިޔަށް ނެރުއްވީއެެވެ. އިންތިޚާބުތަކަށް ކޯޓުތަކުން އަތް ބާނާއިގެން ނުވާނެކަމަށާއި، އެއީ ޑިމޮކްރަސީގެ އަސާސްތަކާއި ޚިލާފް ކަމެއްކަމަށް ބުނަމުން ދިޔަ ފަރާތްތަކުން، އަމިއްލަ ޕާޓީގެ އެތެރޭގެ އިންތިޚާބަކަށް އައް ބޭނުއްވުމުގެ މަގުސަދުގައި އެންމެ ފަހުން ކޯޓަށްވެސް ދިޔައީއެވެ.

ހަމައެއާއެކު، ޑިމޮކްރަސީގެ އަސާސަކީ ބަލިވާ ކެނޑިޑޭޓު މޮޅުވާ ކެނޑިޑޭޓެއްގެ ފަހަތައް އެރުންކަމަށް ބުނެ، އެއުސޫލުން ތިމާމެންގެ ވާހަކަތައް ޒީނަތްތެރި ކުރަމުން ދިޔަ ފަރާތްތަކަށް، އަމިއްލަފުޅު ޕާޓީގެ އެތެރޭގައި އިންތިޚާބު ކާމިޔާބުކުރި ކެނޑިޑޭޓުގެ ފަހަތަށް އަރުއްވާ، އަމިއްލަފުޅަށް ވަކާލާތު ކުރައްވަމުން ވަޑައިގެންނެވި ޑިމޮކްރަސީގެ ނަމޫނާ ދެއްކުވުމުގެ ހިތްވަރުވެސް ނެތިގެން ދިޔައީއެވެ.

ރައީސް ސާލިހަށް ރަސްމީކޮށް އެމްޑީޕީގެ ރިޔާސީ ޓިކެޓް ހަވާލުކުރުމަށް ބޭއްވުނު އެޕާޓީގެ ޖަލްސާއަށް، ވާދަވެރި ކެނޑިޑޭޓު މުހައްމަދަ ނަޝީދު ވަޑައިގެންފައި ނުވާތާގަ، އެމަނިކުފާނަށް ތާއީދުކުރި އިސް ފަރާތްތަކުންވެސް މި ޖަލްސާއަށް، "ޑިމޮކްރަސީގެ ނަމޫނާ" ދެއްކެވުމަށް ވަޑައިގެންފައެއް ނުވެއެވެ.

ހަގީގަތުގައިވެސް، މިއަދު ފެނިގެން މިދިޔައީ، ޑިމޮކްރަސީގެ ނަމުން މެޑަލް ޖައްސަވައިގެން، ހުސް ވާހަކަތަކުން ތިމާމެންގެ އަމަލުތައް ޒީނަތްތެރި ކުރަމުން އައި އެތައް ބައެއްގެ ފަތިފުށް އެންމެ ފަހުން ހާމަވެގެން ދިޔަތަނެވެ. ތިމާމެންގެ ކިބައިގައި އިޚްލާސްތެރިކަން ނެތުމުން، ކޮންމެވެސް ދުވަހަކުން ހަގީގަތް ފާޅުވެ، "އަސްލު ސިފަ" ފާޅުވެގެން ދިޔައީ ކަމުގައި މިފަރާތްތަކުގެ އަމަލުތައް މިއަދު ގިނަބަޔަކު ދަނީ ސިފަކުރަމުންނެވެ.