މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެމް) އާއި ސޮސައިޓީ ފޯރ ހެލްތު އެޑިއުކޭޝަން (ޝީ) އަދި ކެންސަރ ސޮސައިޓީ އޮފް މޯލްޑްވްސް ގުޅިގެން އެމްއޭސީއެލްގެ މުވައްޒަފުންނަށް ޚާއްސަ ކޮށްގެން ކެންސަރ ސްކްރީނިންގެ އިތުރުން ހޭލުތެރިކުރުމުގެ ޚާއްސަ ސެޝަނެއް ކުރިޔަށް ގެންގޮސްފިއެވެ.
އެމްއޭސީއެލްއިން ހާމަ ކޮށްފައިވާ ގޮތުގައި މި އިވެންޓަކީ، އެކުންފުނީގެ މުވައްޒަފުންގެ ސިއްޙީ ދުޅަހެޔޮކަމަށް އަމާޒުކޮށްގެން، ކުންފުނީގެ ސޭފްޓީ، ސެކިއުރިޓީ އަދި ކޮމްޕްލަޔަންސް ޑިޕާޓްމަންޓުގެ އޮކިއުޕޭޝަނަލް ސޭފްޓީ އެންޑް ހެލްތު މެނޭޖްމަންޓް ސެކްޝަނުން އިންތިޒާމް ކޮށްގެން ކުރިޔަށް ގެންދިޔަ އިވެންޓެކެވެ.
މި އިވެންޓުގައި، ކެންސަރ ސްކްރީނިންގ ކުރުމަށް ކުންފުނީގެ މުވައްޒަފުންނަށް ހިތްވަރު ދިނުމުގެ ގޮތުން، އެމްއޭސީއެލްގެ މެނޭޖިން ޑިރެކްޓަރ އަދި ޗީފް އެގްޒެކެޓިވް އޮފިސަރ މަހުޖޫބު ޝުޖާއުގެ އިތުރުން އެ ކުންފުނީގެ ޑިޕާޓްމަންޓް ހެޑުންވެސް ބައިވެރި ވެފައިވާކަމަށް އެމްއޭސީއެލްއިން މައުލޫމާތު ދީފައި ވެއެވެ.
އެމްއޭސީއެލްއިން ހާމަ ކޮށްފައިވާ ގޮތުގައި އެކުންފުނީގެ އޮކިއުޕޭޝަނަލް ހެލްތު އެންޑް ސޭފްޓީ މެނޭޖްމަންޓް ސެކްޝަނުން އަބަދުވެސް، ރައްކާތެރި މަސައްކަތުގެ މާހައުލެއް ފޯރުކޮށް ދިނުމަށާއި، މުވައްޒަފުން ފުރިހަމަ ސިއްހަތެއްގައި ދެމިތިބުމަށް ވަރަށްބޮޑު ސަމާލުކަމެއް ދެއެވެ. އޭގެ އިތުރުން، ކުންފުނީގެ ސޭފްޓީ، ސެކިއުރިޓީ އެންޑް ކޮމްޕަލަޔަންސް ޑިޕާޓްމަންޓުން، މުވައްޒަފުން ދުޅަހެޔޮ ސިއްހަތެއްގައި ދެމިތިބުމަށް ހިތްވަރު ދިނުމުގެ ގޮތުން، އެނުއަލް ހެލްތު ސޭފްޓީ ކެމްޕޭންއެއް ލޯންޗުކުރުމަށް މިހާރު ރާވަމުންދާ ކަމުގައިވެސް އެމްއޭސީއެލްއިން ހާމަ ކޮށްފައި ވެއެވެ.
އެމްއޭސީއެލްއިން ކުރިޔަށް ގެންދިޔަ މި އިވެންޓަށް ޝީއިންނާއި ކެންސަރ ސޮސައިޓީ އޮފް މޯލްޑިވްސްއިން ވެދެއްވި އެހީތެރިކަން އެކުންފުނިން ފާހަގަ ކޮށްފައި ވެއެވެ.
ދުނިޔޭގެ ސިއްހަތު ޖަމިއްޔާއިން ހާމަ ކޮށްފައިވާ ގޮތުގައި، ކެންސަރއަކީ ދުނިޔޭގައި ދެވަނައަށް އެންމެ ގިނައިން މީހުން މަރުވާ ބައްޔެވެ. އެހެންނަމަވެސް، ކެންސަރ ސްކްރީންކޮށް، ބަލީގެ ކުރީކޮޅު ބަލިހުރިކަން ދެނެގަނެވިއްޖެނަމަ، މިބަލިން ރައްކާތެރިވެސް އަދި ޝިފާ ހޯދުމުގެ މަގު ފަހިވެގެން ދެއެވެ.
