މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އާއި މޯލްޑިވްސް ސިވިލް އޭވިއޭޝަން އޮތޯރިޓީއިން ގުޅިގެން ދެދުވަހުގެ އެއަރޕޯޓު އެމަރޖެންސީ ޕްލޭނިން ވާރކްޝޮޕެއް ކުރިޔަށް ގެންގޮސްފިއެވެ.
މި ވާރކްޝޮޕް ކުރިޔަށް ގެންގޮސްފައިވަނީ، ލޯކަލް އައަރލައިންތަކަށާއި އޭރޯޑްރޮމް އޮޕްރޭޓަރުންނަށް ޚާއްސަކޮށްގެން، މިމަހުގެ 14 އަދި 15 ވަނަ ދުވަހުއެވެ. އެމްއޭސީއެލްއިން ހާމަކޮށްފައިވާ ގޮތުގައި މި ވާރކްޝޮޕް 18 އެއަރޕޯޓަކުންނާއި 3 އެއަރލައިންއަކުން ޖުމްލަ 51 ބައިވެރިއަކު ފުރިހަމަ ކޮށްފައި ވެއެވެ.
އެމްއޭސީއެލްއިން ބުނެފައިވަނީ، މި ވާރކްޝޮޕްގެ މަގުސަދަކީ، ވާރކްޝޮޕްގެ ބައިވެރިންނަށް، އެއަރޕޯޓު އެމަރޖެންސީ ޕްލޭން ތައްޔާރުކޮށް ތަންފީޒުކުރާނެ ގޮތްތައް ދަސްކޮށް ދިނުމުގެ އިތުރުން، މުޅި އެއަރޕޯޓުގެ ފުލް ސްކޭލް އެމަރޖެންސީ އެކްސެސައިޒްތަކަށް އަހުލުވެރި ކުރުވުމުވެ.
މި ވާރކްޝޮޕް ހުޅުއްވާ ދެއްވުމުގެ ގޮތުން ބޭއްވުނު ރަސްމިއްޔާތުގައި ވާހަކަ ދައްކަވަމުން، އެމްއޭސީއެލްގެ ޑެޕިއުޓީ މެނޭޖިންގ ޑިރެކްޓަރ އިބުރާހިމް ތޯހާ ވަނީ އެއަރޕޯޓު އެމަޖެންސީއަކަށް ތައްޔާރުވެ ތިބުމުގެ މުހިންމުކަމުގެ މައްޗަށް އަލިއަޅުއްވާލައްވާފައެވެ. އަދި، އެއަރޕޯޓު އެމަރޖެންސީ މެނޭޖްމަންޓުގެ ފުރިހަމަކަން އިތުރު ކުރުމަށްޓަކާ ގުޅިގެން ރޭވުންތެރިކަމާއެކު މަސައްކަތް ކުރުމުގެ މުހިންމުކަންވެސް މި ރަސްމިއްޔާތުގައި ތޯހާ ފާހަގަ ކުރައްވާފައި ވެއެވެ.
އެމްއެސީއެލްއިން ފާހަގަ ކޮށްފައިވާ ގޮތުގައި، ހުރިހާ އެއަރޕޯޓެއްގައިވެސް ތިބޭ މުވައްޒަފުންނަށް އެންމެ ފަހުގެ މައުލޫމާތާއި ތަމްރީނު ފޯރުކޮށް ދިނުމަށް އެކުންފުނިން އިސްކަން ދެމުންދާ ދިއުމަކީ، އެއަރޕޯޓުގެ ސެކިއުރިޓީއާއި ރައްކާތެރިކަމަށް އެކުންފުނިން ދެމުންދާ ސަމާލުންކަން ރަމްޒުކޮށްދޭ ކަމެކެވެ.
