ރިޔާސީ އިންތިޚާބަށް ކުރިމަތިލުމަށް ހުޅުވާލުމަށްފަހު ދޭ 10 ދުވަހުގެ މުއްދަތު 14 ދުވަހަށް އިތުރު ކުރުމަށް، ރިޔާސީ އިންތިހާބުގެ ގާނޫނަށް ބަދަލު ގެންނަން ހުށަހަޅާފައިވާ ކަމުގައި، އިލެކްޝަންސް ކޮމިޝަންގެ ނާއިބުރައީސް އިސްމާއިލް ހަބީބު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީގައި ވާހަކަ ދައްކަވަމުން ހަބީބު ވިދާޅުވީ މިހާރު ގާނޫނުގައި އޮތްގޮތުން، އަންނަ ރިޔާސީ އިންތިޚާބަށް ކުރިމަތިލުމަށް ހުޅުވާލެވޭނީ އަންނަ ޖުލައިމަހުގެ 23 ވަނަ ދުވަހުން ފެށިގެން އޮގަސްޓުމަހުގެ 3 ވަނަ ދުވަހުގެ ނިޔަލަށް ކަމުގައެވެ.
އޭނާ ވިދާޅުވީ އަންނަ އެޕްރިލްމަހުގެ ކުރިން މި އިސްލާހު މަޖިލިހުން ފާސްވެ ގާނޫނަށް ބަދަލު ގެނެވޭނެކަމަށް އިލެކްޝަންސް ކޮމިޝަނުން އުއްމީދު ކުރެއެވެ. އެއާއިއެކު، އިލެކްޝަންސް ކޮމިޝަނުން މިހާރު އިއުލާން ކޮށްފައިވާ، ރިޔާސީ އިންތިޚާބުގެ ބައެއް ތާރީޚުތަކަށް ބަދަލުތަކެއް އަންނާނެކަމަށްވެސް ހަބީބު ވިދާޅުވިއެވެ.
އުއްމީދު ކުރަނީ އޭޕްރީލް މަސް ނިމުމުގެ ކުރިން އެ ބަދަލު އަންނާނެކަމަށް އެހެންކަމުން މެއި ދެއެއްގައި އިންތިހާބުގެ ރަޖިސްޓްރޭޝަންގެ މަސައްކަތް ފެށުމުގެ ކުރިން އެންމެ ލަސްވެގެން އޭޕްރީލް މަހުގެ ތެރޭގައި ރިޔާސީ އިންތިހާބުގެ ގަވާއިދު ގެޒެޓު ކުރަން ޖެހޭނެ.
މިނިވަން މުއައްސަސާތަކާ ބެހޭ ކޮމިޓީގައި ވާހަކަ ދައްކަވަމުން ހަބީބު ވިދާޅުވިއެވެ.
މިއަހަރު ބޭއްވުމަށް ހަމަޖެހިފައިވާ ރިޔާސީ އިންތިޚާބު ބާއްވާ ތާރީޚެއްކަމުގައި އިލެކްޝަންސް ކޮމިޝަނުން ހަމަޖައްސާފައިވަނީ އަންނަ ސެޕްޓެމްބަރުމަހުގެ 9 ވަނަ ދުވަހުއެވެ. އަދި ދެވަނަ ބުރަކަށް ދާން ޖެހިއްޖެނަމަ ދެވަނަ ބުރުގެ ވޯޓުލުން ބޭއްވުމަށް ހަމަޖެހިފައިވަނި ސެޕްޓެމްބަރުމަހުގެ 30ވަނަ ދުވަހުއެވެ.
ކޮމެންޓު ފޮނުވާ