ވެރިކަން ހިންގުމުގެ ބާރު ލިބިގެންވަނީ ޤާނޫނާއި، ޤާނޫނު އަސާސީގެ ތެރެއިން ކަމަށާއި، ޤާނޫނު އަސާސީއާއި ޤާނޫނާއި ޚިލާފަށް އެއްވެސް ކަމެއް ކުރުމުގެ ޖާގަ އެއްވެސް މީހަކަށް ލިބިގެން ނުވާކަމަށް ރައްޔިތުންގެ މަޖިލީހުގެ މާމިގިލީ ދާއިރާގެ މެމްބަރު ޤާސިމް އިބްރާހިމް ވިދާޅުވެއްޖެއެވެ.

ރާއްޖެއަށް މަސްތުވާތަކެތި އެތެރެކުރާ ބިދޭސީން ފުރުވާ ލެވޭ ގޮތަށް ހަދާފައިވާ ގަވާއިދެއްގެ ބައިތައް އުނިކުރުމަށް ގޮވާލައި ރައްޔިތުންގެ މަޖިލީހަށް ހުށަހެޅި ކުއްލި މައްސަލަ ބަހުސްގައި ވާހަކަ ދައްކަވަމުން ޤާސިމް ވަނީ ގާނޫނުން ކުށާއި އަދަބު ކަނޑައަޅައިފައިވާ ކަމެއް ނަފީވާ ގޮތަށް ގަވާއިދެއް ހަދައި އެ ގަވާއިދު ތަންފީޒު ކުރުމަކީ ގާނޫނީ ގޮތުން ކުރެވޭނޭ ކަމެއް ނޫން ކަމަށެވެ.

ރާއްޖެއަށް މަސްތުވާތަކެތި އެތެރެ ކުރި ބިދޭސީއަކު ފުރުވާލި މައްސަލާގައި ހުށަހެޅި މިމައްސަލާގައި ޤާސިމް ވިދާޅުވީ ޤާނޫނު އަސާސީއާއި ގާނޫނާއި ޚިލާފަށް އެއްވެސް ގަވާދެއް ނެހެދޭނެކަމަށެވެ. އަދި އެފަދަ ގަވާއިދެއް ހަދައި އަމުރު ކުރިނަމަވެސް އެއަށް އަމުކުރަން ނުޖެހޭނެކަމަށް ޤާސިމް ވިދާޅުވިއެވެ.

އަޅުގަނޑު ގަބޫލުކުރާ ގޮތުގައި ޤާނޫނު އަސާސީއާއި ޤާނޫނާއި ޚިލާފަށް އެއްވެސް ގަވާއިދެއް ނުހެދޭނެ. އަދި ޤާނޫނު އަސާސީއާއި ޤާނޫނާއި ޚިލާފަށް މީހަކު ގަވާއިދެއް ނެހޭދޭ ތަނުގައި ކުރާ އަމުރަކަށްވެސް ތަބާވާކަށް ނުޖެހޭ. އެއީ ކޮންމެ ވެރިޔަކު ކުރިޔަސްވެސް. އެހެންވީމާ މިމައްސަލައިގެ ބޮޑުކަން އެބަ އެނގޭ ވަރަށް ސާފުކޮށް. ކޮންމެވެސް ދިމާލަކުން ކޮންމެވެސް ބަޔަކު މިއުޅެނީ ޤާނޫނު އަސާސީގެ ބާރު ކަނޑުވާލައިގެން ކަން ނުވަތަ ޤާނޫނު ތަކުގެ ބާރުވެސް ކަނޑުވާލައިގެންކަން.

– ޤާސިމް ވިދާޅުވިއެވެ.

ޤާސިމް ވިދާޅުވީ މިމައްސަލައަކީ ވަރަށް ސީރިއަސް މައްސަލައެއް ކަމަށެވެ. ޤާނޫނު އަސާސީގައި ވަރަށް ސާފުކޮށް ގާނޫނާއި ގަވާއިދާއި ޚިލާފް ކަންތައްތައް ބަޔާން ކޮށްފައިވާއިރު ގާނޫނީ އިމުން ބޭރުން އެއްވެސް ކަމެއް ކޮށްގެން ނުވާނެކަމަށެވެ.

މިއީ ވަރަށް ސީރިއަސް މައްސަލައެއްގެ ގޮތުގައި އަޅުގަނޑުމެން ބަލަންޖެހޭ މައްސަލައެއް. ކޮންމެ ބަޔަކު ކުރިއަސް ވެރިކަމުގެ ބާރު ހިންގުމުގެ ބާރު ލިބިގެންވަނީ ޤާނޫނާއި، ޤާނޫނު އަސާސީގެ ތެރެއިން. ޤާނޫނު އަސާސީއާއި ޤާނޫނުގައި ވަރަށް ސާފުކޮށް ބުނެފައި އޮންނާނެ ޤާނޫނު އަސާސީއާއި ގާނޫނުގައި ކަނޑައެޅިފައިވާ ކަމަކާއި ޚިލާފަށް އެއްވެސް ގަވާއިދެއް ނެހެދޭނެކަމަށް. އެހެން ކަމަށްވަންޏާ އެއީ ބާތިލް އެއްޗެއް. އެހެން ވީމާ އެކަން ކުރި ބަޔަކުވެސް ގޯސް. އަނެއްކާ އެކަމަށް އަމުރު ކުރި ބަޔަކުވެސް ގޯސް.

– ޤާސިމް ވިދާޅުވިއެވެ.

ޤާސިމް ވިދާޅުވީ މުޖުތަމައުގައި ކަންކަން ހަލާކުވެގެން ދަނީ މިބާވަތުގެ ކަންކަމަށް ޖާގަދޭތީ ކަމަށެވެ. މިފަދަ ކަންކަމުގައި އަމަލު ކުރަންވީ ގޮތް ޤާނޫނު އަސާސީއާއި ގާނޫނުތަކުގައި ބަޔާން ކޮށްފައިވާކަމަށް ޤާސިމް ވިދާޅުވިއެވެ.

މިބާވަތުގެ ކަންތައް މުޖުތަމައުއެއްގައި ހިނގާކަމުގައި ވަންޏާ އެތަނެއްގެ ހަލާކު އޮންނީ ވަރަށް ކައިރީގަ. ނުވަތަ ހަލާކު ވެފަ އެއޮތީ. ދެން އެހެން ވިއްޔާ ދެން ބަލަންވީ ކިހިނެއްތޯ ހަދަންވީ. ހަދަންވީ ގޮތް ވަރަށް ސާފުކޮށް ޤާނޫނުގައި، އަދި ޤާނޫނު އަސާސީގައި ބުނެފައިވާނެ.

– ޤާސިމް ވިދާޅުވިއެވެ.

މިމައްސަލައަކީ ވައިގެ މަގުން ރާއްޖެއަށް އެތެރެކުރި 2.6 ކިލޯގެ މަސްތުވާތަކެތި ކަސްޓަމްސްއިން އަތުލައިގަނެ އެ ގެނައި މީހާ ރާއްޖެ އެތެރެވިޔަ ނުދީ ފޮނުވާލި މައްސަލައެވެ. މިތަކެތީގެ މަގުމަތީ އަގު 6.5 މިލިއަން ރުފިޔާ އަށް އަރާކަމަށް އެ އިދާރާއިން ބުންޏެވެ. އެ މީހާ މިހާރު ވަނީ ރާއްޖެއަށް އެތެރެވިޔަ ނުދީ ފޮނުވާލައިފައެވެ. އެގޮތަށް އަމަލުކުރުމުގެ ބާރު އިމިގްރޭޝަން ކޮންޓްރޯލާއަށް އޮވެއެވެ.