އިނގިރޭސިވިލާތަށް ކުރެއްވި ދަތުރުފުޅުގައި ޔޫކުރެއިންގެ ރައީސް ވޮލޮޑޮމިރު ޒެލެންސްކީ އިނގިރޭސި ރަސްގެފާން ޗާރލްސްއާއި ބައްދަލު ކުރައްވައިފިއެވެ.
ޒެލެންސްކީ އިނގިރޭސިވިލާތަށް ކުރެއްވި ދަތުރުފުޅަކީ، ފާއިތުވި އަހަރުގެ ފެބްރުއަރީމަހުގެ 24ވަނަ ދުވަހު ރަޝިއާއިން ޔޫކުރެއިންއަށް އުދުވާނީ ހަމަލާ ދޭން ފެށިފަހުން އޭނާ އިނގިރޭސިވިލާތައް ކުރެއްވި ފުރަތަމަ ދަތުރުފުޅެވެ. އަދި މިއީ މިހަނގުރާމަ ފެށުނުފަހުން ޒެލެންސްކީ ގައުމުން ބޭރަށް ކުރައްވާ ދެވަނަ ދަތުރުފުޅުވެސްމެއެވެ.
މީގެ ކުރިން ޒެލެންސްކީވަނި އެމެރިކާއަށް ވަޑައިގެން އެގައުމުގެ ގާނޫނުހަދާ މަޖިލިހުގައި ތަގުރީރު ކުރައްވާފައެވެ.
ޒެލެންސްކީއާއި ޗާރލްސް ބައްދަލު ކުރައްވާފައިވަނީ ރަސްގެފާނުގެ ރަސްމީ ގެކޮޅު ބަކިމްގހަމް ޕެލަސްގައެވެ. މިއީ ރަސްގެފާނު ޗާރލްއާއި ޒެލެންސްކީ ބައްދަލު ކުރެވި ފުރަތަމަ ފަހަރުވެސް މެއެވެ.
މި ބައްދަލު ކުރެއްވުމުގައި ޗާރލްސްވަނީ، ޒެލެންސްކީއާއި ބައްދަލު ކުރެއްވުމަކީ އެމަނިކްފާނަށް ލިބިވަޑައިގެން ވަރަށް ބޮޑު އުފަލެއްކަމުގައި ވިދާޅުވެފައެވެ. އަދި ޒެލެންސްކީވަނީ ރަސްގެފާނާއި ބައްދަލު ވުމަކީ ލިބިވަޑައިގެންނެވި ވަރަށްބޮޑު ޝަރަފެއްކަމުގައި ވިދާޅުވެފައެވެ.
މިހާރު ޔޫކުރެއިންގައި ކުރިޔަށްދާ ހަނގުރާމައާއި ގުޅޭގޮތުން މަޝްވަރާ ކުރެއްވުމަށް މިބައްދަލުވުން ވަނީ 30 މިނިޓަށް ކުރިޔަށް ގެންދެވިފައެވެ.
މި ބައްދަލުވުމުގެ ކުރިން ޒެލެންސްކީ ވަނީ އިނގިރޭސި ގާނޫނުހަދާ މަޖިލިހުގައި ތަގުރީރު ކުރައްވާފައެވެ. މި ތަގުރީރުގައި ޒެލެންސްކީ ވިދާޅުވެފައިވަނީ، އޭނާގެ ގައުމުން، މިހާރު ކުރެވެމުންދާ ހަނގުރާމާގައި ރަޝިއާ ބަލި ކުރާނެ ކަމުގައެވެ.
އަދި އޭނާވަނީ، ހުޅަނގުގެ ގައުމުތަކުން ޔޫކުރެއިންއަށް ފައިޓަރޖެޓްތައް ފޯރުކޮށްދިނުމަށް ގޮވާލައްވާފައެވެ. އެހެންނަމަވެސް އިނގިރޭސި ބޮޑުވަޒީރުގެ ތަރުޖަމާން ވިދާޅުވެފައިވަނީ، ޔޫކުރެއިންއަށް ފައިޓަރ ޖެޓްތައް ފޯރުކޮށް ދިނުމާއި ގުޅޭގޮތުން އެގައުމުން އަދި ވަކި ގޮތެއް ނުނިންމާކަމުގައެވެ.
އެހެންނަމަވެސް، އިނގިރޭސިވިލާތުން ޔޫކުރެއިންގެ ޕައިލެޓުން ތަމްރީން ކޮށްދިނުމަށް ވީހާވެސް އަވަހަކަށް ފެށުމަށް ހަމަޖެހިފައިވާ ކަމުގައި ބޮޑުވަޒީރު ސުނަކްގެ ތަރުޖަމާން ވިދާޅުވެފައި ވެއެވެ.
"ބޮޑުވަޒީރު ވަނީ، ޔޫކުރެއިންއަށް ފޯރުކޮށް ދެވިދާނެ ފައިޓަރޖެތައް ބެލުމުގެ ޒިންމާ ޑިފެންސް ސެކެޓްރީއާއި ހަވާލު ކުރައްވާފަ. އެހެންނަމަވެސް ހަގީގަތުގައި ދަންނަވާނަމަ، މިއީ ވަރަށް ދިގު މުއްދަތުގެ ހައްލެއް. ކުރު މުއްދަތުގައި ހޯދާންޖެހޭ އެއްވުރެ މުހިންމު ހައްލުތައް އެބަހުރި،" ތަރުޖަމާން ވިދާޅުވެފައި ވެއެވެ.
ރަޝިއާއިން ޔޫކުރެއިންގައި ކުރަމުންދާ ހަނގުރާމައަށް އަހަރެއް ފާއިތުވެގެން ދާއިރު، ޔޫކުރެއިން ދަނީ، ރަޝިއާއާއި ކުރިމަތިލުމަށް، ހަނގުރާމަމަތީ ވައިގެ އުޅަނދުފަހަރު އެގައުމަށް ފޯރުކޮށް ދިނުމަށް ހުޅަނގުގެ ގައުމުތަކުން އެދެމުންނެވެ.
މި ދަތުރުފުޅަށްފަހު މިހާރު ޒެލެންސްކީ ވަނީ ފްރާންސްގެ ޕެރިހަށް ވަޑައިގެންފައެވެ. ޕެރިހުގައި ޒެލެންސްކީ ފްރާންސްގެ ރައީސް އެމަނޫލް މެކްރޮންއާއި ބައްދަލު ކުރެއްވުމަށް ހަމަޖެހިފައިވާއިރު، މި ބައްދަލު ކުރެއްވުމުގައި ބައިވެރިވެ ވަޑައިގަތުމަށް ޖާމަނީގެ ޗާންސެލަ ޝޯލްޒްވެސް ވަނީ ޕެރިހަށް ވަޑައިގެންފައެވެ.
