ވައްޑެ މިހެން ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަފުޅުދައްކަވަމުންނެވެ. ވައްޑެ ވިދާޅުވީ، ދައުލަތުން ކުރާ ނުރަނގަޅު ކަންކަން ހާމަކުރުމުގެ ޒިންމާ އޮތީ މީޑިއާގައި ކަމަށާއި، އެއީ ޑިމޮކްރަޓިކް ދައުލަތެއްގެ ހަތަރު ވަނަ ބާރު ކަމަށް 19 ވަނަ މަޖިލީހަށް އެމްޑީޕީގެ މެންބަރުން އިންތިހާބުވެގެން ބޭއްވި ބައްދަލުވުމެއްގައި ރައީސް އިބްރާހީމް ވިދާޅުވި ކަމަށެވެ.

ނަމަވެސް މިހާރު ކަންތައް ހިނގަމުންދަނީ އެއާ ހިލާފަށް ކަމަށް ވައްޑެ ވިދާޅުވި އެވެ. މިސާލެއްގެ ގޮތުން އޭނާ ދެއްކެވީ ކޮވިޑުގެ ދުވަސްވަރު، ސަރުކާރުން ބޭއްވި ނޫސްވެރިންގެ ކޮންފަރެންސްތަކަށް ދިޔަ ނޫސްތަކުގެ އަދަދު ކުއްލިއަކަށް އިތުރުވެ، އެ ހުރިހާ ނޫހަކަށް ސަރުކާރުން ސްޕޮންސާ ދީފައި އޮތުމެވެ.

"(ކޮވިޑުގެ) އެ ދަތި އުނދަގުލުގެ ހާލަތުގައި ކުއްލިއަކަށް ފެނިގެން މި ދިޔައީ ސަރުކާރުން ކޮވިޑާ ގުޅިގެން އެ ހިންގި ހަރަކާތް، އެންއީއޯސީގެ ނޫސްވެރިންގެ ބައްދަލުވުންތަކަށް، ކުއްލިއަކަށް ރާއްޖޭގައި މީހަކު ހިޔާލަށް ނާންނަހާ ކުއްލިއަކަށް ކުދިކުދި ނޫސްތައް ގިނަވެގެން ދިޔަތަން. 30، 40 ނޫސް، އަދި މިއިން ކޮންމެ ނޫހެއްގަ އެކީ އެއް ވާނަކަށް، އެ ބަހުރުވައަކުން، އެ އިބާރާތަކުން ހަމަ ކިޔާލީމަ އެނގޭނެ އެކަކު އެއް ބަޔަކު ލިޔެފަ ޖައްސުވާފަ ހުންނަ ވާހަކަ ކަން. ބައެއް ނޫސްތަކުގައި އެބަހުރި ހަތަރު ނޫހުގަ އެކި ނަންނަމުގައި އަކުރުން އަކުރަށް އެ އާޓިކަލެއް ލިޔެފަ. ދެން ކޮންމެ އާޓީކަލެއް މަތީގަ ސަރުކާރު ކުންފުންޏެއްގެ އިޝްތިހާރު، ތިރީގަ ސަރުކާރު ކުންފުންނެއްގެ އިޝްތިހާރު،" ވައްޑެ ވިދާޅުވިއެވެ