ދޯހާއިން ރާއްޖެ އައި މީހެއް އެތެރެކުރި 2.6 ކިލޯގެ މަސްތުވާތަކެތި އަތުލައިގަނެ އެމީހާ އަނބުރާ ފޮނުވާލައިފިއެވެ.
ވައިގެމަގުން ރާއްޖެ އައި މިމީހާއާ ބެހޭގޮތުން ރާއްޖޭގެ ކަސްޓަމްސްއިން ނެރުނު ނޫސްބަޔާނުގައިވަނީ އެއީ ޤަޠަރުގެ ދޯހާއިން ރާއްޖެ އައި ޢުމުރުން 23 އަހަރުގެ އަންހެނެއްކަމަށެވެ. އޭނާގެ ލަގެޖްގައި މަސްތުވާތަކެތި ރައްކާކޮށްގެން ގެނެސްފައިވާ ކަމަށާ، އޭނާގެ ބައެއް ޢަމަލުތައް ހުރިގޮތުން ޝައްކުކުރެވިގެން ބެލިއިރު މަސްތުވާތަކެތި ފެނިފައިވާ ކަމަށްވެސް ކަސްޓަމްއިން ވިދާޅުވެއެވެ.
މި އަންހެންމީހާގެ އަތުން އަތުލައިގަތް މަސްތުވާތަކެތި ތަހްލީލް ކުރިއިރު ކޮކެއިނަށް ޕޮޒިޓިވް ވެފައިވާ ކަމަށާ، މިމަސްތުވާތަކެތީގެ ބަރުދަނުގައި 2.6 ކިލޯ ހުރިކަމަށްވެސް ކަސްޓަމްސްއިން ވިދާޅުވެއެވެ. މިތަކެތީގެ މަގުމަތީ އަގު 6.5 މިލިޔަން ރުފިޔާއަށް އަރާކަމަށް އެފަރާތުން މައުލޫމާތުދެއްވައެވެ.
