ވެރިކަންކުރާ ކޯލިޝަންގެ އެންމެ ބޮޑު ޕާޓީ، އެމްޑީޕީގެ ނަޝީދު ފެކްޝަންގެ މެމްބަރުން ރައީސް ސާލިހު މިއަދު ރައްޔިތުންގެ މަޖިލިހަށް އިއްވި ރިޔާސީ ބަޔާން ބޮއިކޮޓް ކޮށްފިއެވެ.

ރައީސް ސާލިހުގެ ރިޔާސީ ފުރަތަމަ ދައުރުގައި ރައްޔިތުންގެ މަޖިލިހަށް އެމްނިކްފާނު އިއްވަވާނެ އެންމެ ފަހު ރިޔާސީ ބަޔާން އިއްވި މިއަދުގެ ޖަލްސާއަށް، އެމްޑިޕީގެ ރައީސް ސާލިހުގެ ފެކްޝަނަށް ނިސްބަތްވާ މެމްބަރުން ހާޒިރުވިއިރު، ނަޝީދު ފެކްޝަނަަށް ނިސްބަތްވާ މެމްބަރުން ރިޔާސީ ބަޔާން އިއްވި ޖަލްސާއަށް ހާޒިރު ނުވާނެކަން ރަސްމީކޮށް ހާމަ ކޮށްފައި ނުވެއެވެ. އަދި އެމެމްބަރުން ޖަލްސާ ބޮއިކޮށްކުރި ވަކި ސަބަބެއްވެސް ހާމަ ކޮށްފައެއްވެސް ނުވެއެވެ.

އެހެންނަމަވެސް، ރިޔާސީ މި ދައުރުގައި އެންމެ ފަހު ރިޔާސީ ބަޔާން ރައީސް ސާލިހު މިއަދު އިއްވެވިއިރު، އެމްޑީޕީގެ އެންމެ އިސް ދެލީޑަރުންގެ މެދުގައި އުފެދިފައިވާ ސިޔާސީ ކޯޅުމުގައި ޕާޓީ ބައިބައިވެ، އަދި ކުރިޔަށް އޮތް ރިޔާސީ އިންތިޚާބަށްވެސް ދެބޭފުޅުން އެއްގަލަކަށް ނާރުއްވާނޭކަން މިހާރުވަނީ ޔަގީން ކުރެވިފައެވެ.

އަދި މިގޮތުން އުފެދިފައިވާ ސިޔާސީ ވާދެވެރިކަމާއެކު، ފާއިތުވެދިޔަ އެމްޑީޕީގެ ރިޔާސީ ޕްރައިމަރީއަށްފަހު ޕާޓީގެ އެތެރޭގައި ނަޝީދު މިހާރު ގެންދަވަނީ ވަކި ސިޔާސީ ހަރާކެއް އުފަންކުރެއްވުމަށް "ފިކުރެއްގެ ދިރުން" ނަމުގައި 50،000 މީހުންގެ މައްޗަށް އެކުލެވޭ ވަކި ގޮތްޕެއް ރަޖިސްޓްރީ ކުރުމަށްވެސް މަސައްކަތް ކުރައްވަމުންނެވެ.

ރައީސް ސާލިހު މިއަދު ރައްޔިތުންގެ މަޖިލީހަށް އިއްވެވި ރިޔާސީ ބަޔާން އިއްވެވީ، ރައްޔިތުންގެ މަޖިލިހުގައި އިހުތިޖާޖް ކުރަމުންދިޔަ އިދިކޮޅު މެމްބަރުން މަޖިލިހުން ނެރުއްވުމަށްފަހުއެވެ. އެއަށްފަހު އެ މެމްބަރުންވަނީ މަގުމަތީގައި އިދިކޮޅު ޕާޓީގެ އެކްޓިވުސްޓުންނާއެކު މުޒާހިރާ ކޮށްފައެވެ.

މިއަދުގެ ރިޔާސީ ބަޔާނުގައި ރައީސް ސާލިހުވަނީ ފާއިތުވެދިޔަ ތަނުގައި ސަރުކާރުން ހާސިލްކުރި ކަންކަމުގެ މައްޗަށް ބައްލަވާލެއްވުމުގެ އިތުރުން، މިއަހަރު ސަރުކާރުން ތަންފީޒު ކުރައްވާނެ ސިޔާސަތުތަކުގެ މައްޗަށް އަލި އަޅުއްވާލައްވާ ވާހަކަފުޅު ދައްކަވާފައެވެ. އޭގެތެރޭގައި ހިމެނޭ ޚާއްސަ ކަމެއްގެ ގޮތުގައި ފާހަގަކުރެވޭ އެއްކަމަކީ އަންނަ މޭމަހުގެ 1ވަނަ ދުވަހު ސިއްޙީ ޚިދުމަތެރިންގެ މުސާރަ ބޮޑުކުރައްވާނެކަމަށް ރައީސް ސާލިހު ވިދާޅުވި ވިދާޅުވުމެވެ.