ރައީސް ޔާމިން ޖަލުން މިނިވަންވެ ވަޑައިގަންނަވަންދެން ޕީޕީއެމް ދެމިއޮންނާނީ ޕީޕީއެމްގެ ލީޑަރޝިޕްގައި ހިމެނިވަޑައިގަންނަވާ، ޕާޓީގެ އިސް ބޭފުޅެއް ކަމުގައިވާ އަބުދުއްރަހީމްގެ ފަހަތުގައި ކަމުގައި، ރައްޔިތުންގެ މަޖިލިހުގެ މާވަށުގެ ދާއިރާގެ މެމްބަރު މުހައްމަދު ސައީދު ވިދާޅުވެއްޖެއެވެ.
ޕީޕީއެމްއާއެކު ކޯލިޝަން ޕާޓްނަރ ޕާޓީއެއްގެ ގޮތުގައި މަސައްކަތް ކުރަމުންދާ ޕީއެންސީގެ ނާއިބު ރައީސްކަމުގެ މަގާމްގައިވެސް މިވަގުތު ހުންނެވި، މާވަށު ދާއިރާގެ މެމްބަރު މުހައްމަދު ސައީދު މިހެން ވިދާޅުވީ، އިދިކޮޅު ޕީޕީއެމްއިން "ދުއްޕާން"ގެ ނަމުގައި ރޭ އާރޓިފިޝަލް ބީޗުގައި ބޭއްވި ޖަލްސާގައި ވާހަކަ ދައްކަވަމުންނެވެ.
ރޭގެ ޖަލްސާގައި ވާހަކަ ދައްކަވަމުން ސައީދު ވިދާޅުވީ ޔާމީން ޖަލުގައި އޮންނެވީ، އެމަނިކްފާނުގެ ވެރިކަމެއްގައި ރާއްޖެއަކީ އަސާސީ ހުރިހާކަމެއް ފުރިހަމަ ވެފައި އޮތް ގައުމަކަށް ވެގެންދާނެކަން އިނގޭތީ، ހަސަދަވެރިވާ ބަޔަކު އައިސް ކުރި މަސައްކަތްތަކެއްގެ ނަތީޖާއެއްގެ ގޮތުން ކަމުގައެވެ. އެހެންނަމަވެސް އެއީ ކޮންބައެއް ކަމެއް ސައީދު ހާމަ ކުރައްވާފައެއް ނުވެއެވެ.
އަދި ސައީދު ވިދާޅުވީ ޔާމީން ޖަލުން މިނިވަންވެގެން ވަޑައިގަނަންވަންދެން ޕާޓީގެ އެހެން އެއްވެސް ފަރާތަކަށް މައިކުވެސް ދޭނެކަމެއް ނެތްކަމަށާއި، މައިކު ހިތްޕަވައިގެން ހުންނަވަން ވާނީ އަބުދުއްރަހީމް ކަމުގައެވެ. އަދި މުޅި ޕާޓީގެ ލީޑަރޝިޕްވެސް އޮންނާނީ ޕާޓީގެ ހިންގުމާއި ހަވާލުވެ ހުންނެވި އަބުދުއްރަހީމް ފަހަތްޕުޅުގައި ކަމުގައިކަމަށްވެސް ސައީދު ވިދާޅުވިއެވެ.
އެއްވެސް ބޭފުޅަކަށް މައިކެއް ދެއްވާނެ ކަމެއް ނެތް. ރައީސް ވަޑައިގަންނަވަންދެން އަބުދުއްރަހީމް މައިކު ހިތްޕަވައިގެން ހުންނަވާ.. އަޅުގަޑުމެން އެންމެން މިތިބީ މިވަގުތު ޕާޓީ ހިންގަން ހަވާލުވެ ހުންނެވި އަބުދުއްރަހީމްގެ ފަހަތްޕުޅުގަ.
ރޭގެ ޖަލްސާގައި ވާހަކަ ދައްކަވަމުން، ރައީސް ޔާމިން ނެތް ހާލަތުގައި ޕާޓީ ކުރިޔަށް ދާނީ އަބުދުއްރަހީމް ދައްކަވާ މަގުންކަމުގައި މޭރުން ކުރައްވަމުން ސައީދު ވިދާޅުވިއެވެ.
ޔާމިން މިހާރު ގެންދަވަނީ، ރިޝްވަތާއި މަނީ ލޯންޑަރިންގެ ކުށުގައި 11 އަަހަރުގެ ޖަލު ހުކުމެއް ތަންފީޒު ކުރައްވަމުންނެވެ. އަދި ޔާމިން ޖަލަށް ވަޑައިގެންނެވުމުގެ ކުރިންވެސް ޕީޕީއެމް އެތެރޭގައި ފެކްޝަން އުފެދި، ލީޑަރޝިޕްގެ ޚިޔާލު ތަފާތުވެ، މައްސަލަތައް ހައްލު ކުރުމަށް، ޚުދު ޔާމިންވެސް ޕާޓީގެ ލީޑަރޝިޕާއި ބައްދަލު ކުރައްވާފައި ވެއެވެ.
އެހެންނަމަވެސް، ޔާމިން ޖަލަށް ވަޑައިގެންނެވި ހިސާބުން، ފަރުދާގެ ފުރަގަހުގައި ތިއްބަވައިގެން، ކުރިޔަށް އޮތް ރިޔާސީ އިންތިޚާބުގެ ޓިކެޓް ކަށަވަރު ކުރެއްވުމުގެ މަސައްކަތް ޕާޓީގެ ލީޑަރޝިޕްގެ ބައެއް ފަރާތްތަކުން ކުރަމުންދާކަމުގެ އަޑުތައް މިހާރު ދަނީ ގަދަވަމުންނެވެ. އޭގެ އެއް ސަބަބެއްގެ ކަމުގައި ބައެއް ފަރާތްތަކުން ބުނަމުންދަނީ، ކޯޓު މަރުހަލާތައް ކަނޑައްތުކޮށް ރިޔާސީ އިންތިޚާބުގެ ކުރިން، ކުޑަމިނުން ސުޕްރިމް ކޯޓާ ހަމައިން މައްސަލަ ނިމިގެން ދިއުމުގެ ފުރުސަތުވެސް ކުޑަވުމެވެ.
ރޭގެ ޖަލްސާގައި، ޔާމިން ނެތް ހާލަތުގައި ޕާޓީ ކުރިޔަށް ދާނީ އަބުދުއްރަހީމްއާއެކު ކަމަށް މާވަށު ދާއިރާގެ މެމްބަރު ސައީދު ވިދާޅުވި ވިދާޅުވުމަކީ، ޔާމީނަށް ކުރިމަތި ނުލެވިއްޖެ ހާލަތެއްގައި ޕާޓީގެ ރިޔާސީ ކެނޑިޑޭޓެއްގެ ގޮތުގައި އަބުދުއްރަހީމް ނުކުނަވާފާނޭކަން ހާމަކުރެއްވުމުގެ ގޮތުން ދެއްވި މެސެޖެއްކަމުގައިވެސް ބައެއް ފަރާތްތަކުން ސައީދުގެ މިވާހަކަ ދަނީ މޭރުން ކުރަމުންނެވެ.
2 Responses
ތިޔަ އެންމެނަށް ވުރެންވެސް ހިސާބުގެ ވިޔަތަކަށް އެންމެ ފަރިތަވާނީ އަދުރޭ އެވެ. އަދި ޔާމީނުގެ ގާއިމުމަގާމަކަށް އެންމެ އެކަށީގެންވަނީ އަދުރޭކަން ޓިނުގެ މައްސަލައިން އެވަނީ ސާބިތުކޮށްދީފައެވެ.
ޔާމީނުނެތްހާލެއްގައި ޓިނުވަގު އަދުރޭ ފަހަތުގައި ޕީޕީ އެމް ލޮބުވެތި ރަށްޔިތު ތިބެންހެޔޮނުވާނެ ޑޮކްޓަރ ވަހީދުމެންފަދަ މޮޅު އެތަށް އިއްޒަތްތެިން ޕީޕީއެމްތިއްބާ ވަރަށް ވަރަށް ސާފް