ފާޑުފާޑު ޕޯލްތައް ހަދާނެ ކަމެއްނެތްކަމަށާ، އަހަރުމެންގެ ކެނޑިޑޭޓަކީ ރައީސް ޔާމީންކަމުގައި މާލޭސިޓީގެ މޭޔަރު ޑރ.މުޙައްމަދު މުޢިއްޒު ވިދާޅުވެއްޖެއެވެ. މުޢިއްޒު މިހެން ވިދާޅުވީ ޕީޕީއެމްގެ ރިޔާސީ ކެންޑިޑޭޓަކަށް ވާނީ ކޮން ބޭފުޅެއްތޯ ބެލުމަށް ސޯޝަލް މީޑިއާގައި ބައެއް މީހުން ހަދާ ޕޯލްތަކާ ގުޅިގެން ކުރެއްވި ޓްވީޓެއްގައެވެ.
މިފަދަ ޕޯލްތައް ހަދައި މީހުން ވާހަކަދައްކަމުންދަނީ ރައީސް ޔާމީނަށް ދަށުކޯޓުން ކޮށްފައިވާ 11 އަހަރުގެ ޖަލު ޙުކުމާއެކު އެމަނިކުފާނަށް ރިޔާސީ އިންތިޚާބުގައި ވާދަކުރުމުގެ ފުރުސަތު މިވަގުތު ގެއްލިފައިވާތީއެވެ. އެގޮތުން ރައީސް ޔާމީނަށް އިންތިޚާބުގައި ވާދަކުރެވެން އޮތް މަގަކީ ރިޔާސީ އިންތިޚާބަށް ކުރިމަތިލުމަށް އިލެކްޝަންސް ކޮމިޝަނުން ހުޅުވާލާފައިވާ މުއްދަތުގެ ކުރިން ރައީސް ޔާމީންގެ ޖަލުޙުކުމް މަތީ ކޯޓަކުން ބާޠިލްކުރުމެވެ. އެކަން އެެންވާނެކަމަށް ޕީޕީއެމްއިން އުންމީދުކުރެއެވެ.
އެހެންނަމަވެސް ރައީސް ޔާމީނަށް ވާދަނުކުރެވިއްޖެނަމަ، އިދިކޮޅުން އިންތިޚާބުގައި ވާދަކުރާނަމަ، ޕީޕީއެމް/ޕީއެންސީގެ ތެރެއިން އެހެން ކެންޑިޑޭޓަރު ނެރެންޖެހޭނެއެވެ. އެޙާލަތުގައި ކެންޑިޑޭޓަރަކަށް ކަނޑައަޅާނެކަމަށް ލަފާކުރާ ބޭފުޅުންގެތެރޭގައި ޑރ.މުޢިއްޒުގެ ނަންވެސް ސޯޝަލް މީޑިއާއިން ފެނެއެވެ. އަދި ސިއްރިއްޔާތުގައި ޑރ.މުއިއްޒު މިކަމަށް މަސައްކަތްޕުޅު ކުރައްވާކަމަށްވެސް ބައެއް ފަރާތްތަކުން ވާހަކަދައްކައެވެ. އެހެންނަމަވެސް ޑރ.މުޢިއްޒު މިކަން ދޮގުކުރައްވައެވެ.
ޑރ.މުއިއްޒުގެ މި ޓްވީޓަކީވެސް މިފަދަ ވާހަކަތަކާ ގުޅިގެން ކުރެއްވި ޓްވީޓެކެވެ. އަންނަ ރިޔާސީ އިންތިޚާބަށް ތައްޔާރުވުމުގެ ގޮތުން ޕީޕީއެމްއިން ވަނީ މިދިޔަ ބުރާސްފަތި ދުވަހުން ފެށިގެން މިއަދުގެ ނިޔަލަށް ޚާއްސަ ހަރަކާތްތަކެއް ބާއްވާފައެވެ. މި ޙަރަކާތްތައް ފެށީ ބުރާސްފަތި ދުވަހު ފެށި "ހޯޕް ކޮންފަރެންސް"އިންނެވެ. މި ޙަރަކާތްތަކުގެ ތެރެއިން ހުކުރުދުވަހު ވަނީ މާލޭގައި ވަރަށްބޮޑު ހިނގާލުމެއް ބާއްވާފައެވެ. އަދި މިރޭ "ދުއްޕާން" މިނަމުގައި ހެންވޭރު ހެދިގޮނޑުދޮށުގައި ޚާއްސަ ޖަލްސާއެއް އޮންނާނެއެވެ.
