އިގިނރޭސި ވިލާތަށް ކުރެއްވި ނުރަސްމީ ދަތުރުފުޅަށްފަހު ކަރަންޓީންގެ މުއްދަތު ފުރިހަމަ ކުރައްވައި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ޖަލްސާތަކުގައި ބައިވެރިވެ ވަޑައިގަންވަން ފައްޓަވައިފިއެވެ.
ކޯވިޑް-19ގެ ޙާލަތާއި ގުޅިގެން އެޗްޕީއޭއިން އާންމުކޮށްފައިވާ ގައިޑްލައިންގައިވާ ގޮތުން ރާއްޖެއިން ބޭރުން ރާއްޖެއަށް އަންނަ ކޮންމެ މީހަކުވެސް 14 ދުވަހުގެ ކަރަންޓީންގެ މުއްދަތު ފުރިހަމަ ކުރަންޖެހެއެވެ. އަދި ކަރަންޓީން ނިންމުމަށްފަހު ކޯވިޑް-19 އަށް ކުރެވޭ ޓެސްޓް ހެދުމަށްފަހު ސާމްޕަލްގެ ނަތީޖާ ނެގެޓިވްވުމުން ކަރަންޓީނުން މީހާ ވީއްލޭނެއެވެ.
މަޖިލީހުގެ ރައީސް އިނގިރޭސި ވިލާތަށް ކުރެއްވި ނުރަސްމީ ދަތުރުފުޅަށްފަހު ކަރަންޓީންގެ މުއްދަތު ހަމަވެފައިވަނީ އިއްޔެއެވެ.
ރައީސް ނަޝީދު އިނގިރޭސި ވިލާތަށް ވަޑައިގެންފައި ވަނީ މިދިޔަ މަހުގެ 28 ވަނަ ދުވަހުގައެވެ. އެމަނިކުފާނުގެ މިދަތަރުފުޅުގައި ވަނީ މުހިންމު ބައެއް މަސައްކަތްތަކެއްވެސް ކުރައްވާފައެވެ. އެގޮތުން ޑިމޮކްރަސީ ހަފްތާ ފާހަގަކުރުމަށް ކުރިއަށްގެންދިޔަ ޔޫރަޕިއަން ޔޫނިއަންގެ ހައިލެވެލް ސެޝަންގައި ބައިވެވަޑައިގެން އެމަނިކުފާނު ވަނީ ތަޤްރީރުވެސް ކުރައްވާފައެވެ.
މިދަތުރުފުޅުގައި ރައީސް ނަޝީދު ވަނީ އިނގިރޭސި ވިލާތުގެ ޤާނޫނު ހަދާ މަޖިލީހުގެ ރައީސްއާއި ބައްދަލުކުރައްވައި ދުނިޔޭގެ ތިމާވެއްޓަށް އަންނަ ބަދަލުތަކާއި ގުޅޭގޮތުންނާއި، މަޖިލީހުގެ ހިންގެވުމުގެ ދާއިރާއާއި ގުޅޭގޮތުން ފުޅާދާއިރާއެއްގައި މަޝްވަރާ ވެސް ކުރައްވާފައެވެ.
ކަރަންޓީނަށްފަހު މަޖިލީހުގެ ރައީސް ޖަލްސާތަކުގައި ބައިވެރިވެވަޑައިގަންނަވަން ފައްޓަވާފައިވާއިރު އެމަނިކުފާނު ބާއްވަވާ ޕްރެސްކޮންފަރެންސެއް މިރޭ 20:10ގައި ރައްޔިތުންގެ މަޖިލީހުގެ އިދާރާގައި އޮންނާނެކަމަށް މަޖިލީހުގެ އިދާރާއިން ވަނީ ވިދާޅުވެފައެވެ.
ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ބާއްވަވާ ޕްރެސް ކޮންފަރެންސެއް މިރޭ 20:10 ގައި ރައްޔިތުންގެ މަޖިލީހުގެ އިދާރާގައި އޮންނާނެ ވާހަކަ ދަންނަވަން. pic.twitter.com/mQ0OueUtWr
— People's Majlis (@mvpeoplesmajlis) October 7, 2020
ކޮމެންޓު ފޮނުވާ