ސިވިލް ކޯޓުގެ ގާޒީ އަލްއުސްތާޒު ފައްޔާޒް ޝާތިރުގެ ސުލޫކީ މައްސަލައެއް ބެލުމަށް ޖޭސްސީއިން ނިންމައިފިއެވެ.
ޖޭއެސްސީން ބުނެފައިވަނީ، ސިވިލް ކޯޓަށް ހުށަހެޅުނު މައްސަލައެއްގެ އަޑުއެހުންތައް ނިންމާލުމަށްފަހު، މައްސަލައިގެ ޙުކުމް ނުކޮށް 01 އަހަރު ދުވަހަށްވުރެ ދިގު މުއްދަތަކަށް މައްސަލަ ކުރިއަށްގެންދިޔުމުގައި ފަރުވާކުޑަކޮށްފައިވާކަމަށް ތުހުމަތުކޮށް އެކޮމިޝަނަށް ހުށަހަޅާފައިވާ ޝަކުވާ، އެއީ ޤާޟީ ފައްޔާޒް ޝާތިރުގެ ސުލޫކީ މައްސަލައެއްގެ ގޮތުގައި ބެލުމަށް 2023 ޖަނަވަރީ 8 ވީ އާދިއްތަ ދުވަހު ބޭއްވި ޖުޑީޝަލް ސަރވިސް ކޮމިޝަނުގެ 2 ވަނަ ޖަލްސާގައި ނިންމާފައި ވާކަމުގައެވެ.
އަދި ޖޭއެސްސީން ހާމަ ކޮށްފައިވަނީ މި ޝަކުވާ ތަޚްޤީޤު ކުރުމަށް އެކޮމިޝަނުން މިހާރު ކޮމިޓީއެއް ވަނީ އެކުލަވާލާފައި ވާކަމުގައެވެ.
މި ތަހުގީގާއި ގުޅޭ އިތުރު ތަފްސީލެއް ޖޭއެސްސީން ހާމަ ކޮށްގފައެއް ނުވެއެވެ. ފާއިތުވެދިޔަ ތަނުގައި ޖޭއެސްސީންވަނީ ފަނޑިޔާރުންނާއި ގުޅުންހުރި ގިނަ މައްސަލަތަކެއް ތަހުގީގުކޮށް، ބައެއް ފަނޑިޔާރުން ރައްޔިތުންގެ މަޖިލިސް މެދުވެރިކޮށް މަގާމުންވެސް ދުރު ކޮށްފައެވެ.
އެހެންނަމަވެސް ޖޭއެސްސީގެ ކޮމްޕޮޒިޝަން އޮތް ގޮތުން ސިޔާސީ ގޮތުން ހަރަކާތްތެރިވާ އިސްފަރާތްތަކުން އެ ކޮމިޝަންގައި ތުބުމަކީ ގިނަ ބައެއްގެ ކަންބޮޑު ވުމެކެވެ.
ޖޭއެސްސީގެ ރައީސްކަމުގައި މިވަގުތު ހުންނެވީ ރައްޔިތުންގެ މަޖިލިހުގެ ތުޅާދޫ ދާއިރާގެ މެމްބަރު ހިސާން ހުސެއިންއެވެ. އޭނާއަކީ ވެރިކަން ކުރާ އެމްޑީޕީގެ އިސް އެކްޓިވިސްޓެއްވެސް މެއެވެ.
