ވާދަވެރި ޕްރައިމަރީގެ ނަތީޖާ އިއުލާން ކުރިތާ އެއް ދުވަސް، ނަޝީދުގެ ހަނު! ސަޕޯޓަރުން ހާސްކަމުގައި!

މިމަހުގެ 28 ވަނަ ދުވަހު ބޭއްވިގެންދިޔަ އެމްޑީޕީގެ ވާދަވެރި ރިޔާސީ ޕްރައިމަރީ ނިމުނުތާ 1 ދުވަސް ފާއިތުވެގެން ދިޔައިރުވެސް ނަޝީދުގެ އިތުރުން އެމަނިކްފާނުގެ ކެޕްމޭން ޓީމުވެސްގެ އެއްވެސް ޚަބަރެއް ނުވެ، ނަޝީދުވެސް ހަނު ހުންނަވަމުން ގެންދެވުމާއެކު، އެމްނިކުފާނުގެ ސަޕޯޓަރުންގެ މެދުގައި މިހާރުވަނީ ހާސްކަމާއި ކަންބޮޑުވުން އުފެދިފައެވެ.

ފާއިތުވެދިޔަ މަހެއްހާ ދުވަހު ކުރިޔަށްދިޔަ، ފޯރިގަދަ ކެމްޕޭނަށްފަހު، ބޮޑެތި ހަމަނުޖެހުންތަކާއެކު ބޭއްވިގެންދިޔަ އެމްޑީޕީގެ ޕްރައިމަރީގެ ވޯޓުލުމުގެ ނަތީޖާ ވެގެންދިޔައީ ނަޝީދުގެ ސަޕޯޓަރުންގެ އިތުރުން ޕަރައިމަރީ ކާމިޔާބިޔާކުރި ރައީސް ސާލިހުގެ ކެމްޕޭންޓީމަށްވެސް ހައިރާން ކުރުވަނިވި ނަޖީޖާއަކަށެވެ.

އޭގެ އެއް ސަބަބަކަށް ވެގެން ދިޔައީ، ހީކުރިވަރަށްވުރެ ތަފާތު ބޮޑުކޮށް މިއިންތިޚާބުން ނަޝީދު ބަލިވެގެން ދިޔައިރު، ކުރިން ގިނަ ބަޔަކު ޖަހަމުންދިޔަ ހިސާބުތަކާއި ޚިލާފަށް، ޕްރައިމަރީގެ ވޯޓުން ބޮޑުތަފާތަކުންކުން ރައީސް ސާލިހަށް ކުރިޔަށް އޮތް ރިޔާސީ އިންތިޚާބުގެ އެމްޑީޕީގެ ޓިކެޓް ކަށަވަރުވެގެން ދިއުމެވެ.

އޭގެ އިތުރުންވެސް، މިމަހުގެ 28 ވަނަ ދުވަހު ބޭއްވިގެންދިޔަ، އެމްޑީޕީގެ ރިޔާސީ ޕްރައިމަރީ ވެގެން ގޮސްފައިވަނީ އެޕާޓީގެ ތާރީޚުގައި ބޭއްވުނު އެންމެ އާދަޔާ ޚިލާފް، އަދި އެންމެ ވާދަވެރި އިންތިޚާބު ކަމުގައިވެސް މެއެވެ. އަދި މިއިންތިޚާބަކީ، ރާއްޖޭގެ، ފާއިތުވި ޑިމޮކްރަސީގެ ކުރު ހަޔާތުގައި، ސިޔާސީ ޕާޓީއެއްގެ އެތެރޭގެ ބޭއްވުނު ވާދަވެރި އިންތިޚާބަކުން ރިޔާސީ ޓިކެޓް ކަށަވަރު ކުރެއްވިގެންދިޔަ ފުރަތަމަ އިންތިޚާބެވެ.

އަދި އެމްޑީޕީގެ ހަޔާތުން ފާއިތުވެދިޔަ 15 އަހަރުތެރޭވެސް ޕާޓީގެ އެންމެ އިސް ދެލީޑަރުން ޕާޓީގެ އެތެރެއިންވެސް އަދި ބޭރުންވެސް އެއް އިންތިޚާބެއްގައި ވާދަކުރި ފުރަތަމަ އިންތިޚާބަކީވެސް މި އިންތިޚާބެވެ. މިއީ ފާއިތުވި 15 އަހަރު ތެރޭ ދެފަހަރަށް އެމްޑީޕީ ވެރިކަމަށް އައިސްފައިވާއިރު، ވެރިކަމުގެ ދައުރެއް ފުރިހަމަކޮށް، ޖެހިޖެހިގެން ދެވަ ދައުރެއްގައި ވެރިކަން ކުރުމަށް އެޕާޓީއަށް ލިބިގެންދާ ފުރަތަމަ ފުރުސަތުވެސް މެއެވެ.

އެހެންކަމުން ވާދަވެރި އިންތިޚާބެއްގައި ވަދަކޮށް، މިއިންތިޚާބުން ރައީސް ސާލިހު ބޮޑު ކާމިޔާބީއެއް ހޯއްދަވާ ޕާޓީގެ ޓިކެޓް ކަށަވަރު ކުރައްވާފައިވާއިރު، އިންތިޚާބުގެ ކުރިންވެސް އަދި އޭގެ ފަހުންވެސް ގިނަ ބައެއްގެ ޝައުގުވެރިކަން ހުއްޓިފައިވަނީ، އިންތިޚާބުން ބަލިވެއްޖެނަމަ ނަޝީދު ނިންމަވާނޭ ނިންމެވުމަކަށެވެ.

ނަޝީދު ހަނު!

ނިމިދިޔަ ރިޔާސީ ޕްރައިމަރީގެ ކުރިން ބޭއްވުނު ކެމްޕޭން އެއްވުންތަކުގައާއި ބޭއްވެވި ޕްރެސް ކޮންފަރެންސްތަކުގައި، އެތައް ފަހަރެއްގެ މަތިން، ނަޝީދު ވިދާޅުވަމުން ގެންދެވީ އިންތިޚާބުން ބަލިވެދާނެ އެއްވެސް ހާލަތަކަށް ނުވިސްނަވާ ކަމުގައެވެ.

އަދި ގަދަ ބަސް ވިދާޅުވަމުން ގެންދަވާފައިވަނީ، ޖެނުއަރީ 28 އަށްފަހު ރައީސް ސާލިހު ވެގެންދާނީ އެއްވެސް ބާރެއް ނެތް ރައީސަކަށް ކަމަށާއި، ސަބަބަކީ އެދުވަހަށްފަހު އެމްޑީޕީގެ ރިޔާސީ ޓެކެޓް ރައީސް ސާލިހުގެ އަތްޕުޅުގައި ނޯންނާނެތީ ކަމުގައެވެ.

މިގޮތުން މިމަހުގެ ކުރީކޮޅު ހުވަދޫ އޮތޮޅަށް ކުރެއްވި ކެމްޕޭން ދަތުރު ނިންމަވާލެއްވުމަށްފަހު މާލެ ވަޑައިގެން މިމަހުގެ 12 ވަނަ ދުވަހު ބޭއްވި ނޫސްވެރިންގެ ބައްދަލުވުމުގައި ނޫސްވެރިން ނަޝީދާއި އެންމެ ގިނައިން އަމާޒުކުރި ސުވާލަކަށް ވެގެންދިޔައީ އިންތިޚާބުން ބަލިވެއްޖެނަމަ ދެން ހައްދަވާނީ ކިހިނަކުން ތޯއެވެ.

އެ ނޫސްވެރިންގެ ބައްދަލުވުމުގައި އެކިއެކި ނޫސްވެރިން ތަކުރާރުކޮށް މިސުވާލު ކުރުމުންވެސް ނަޝީދު ދެއްވި ޖަވާބަކީ އިންތިޚާބުން ބަލިނުވާނެކަމަށާއި އިންތިޚާބު ކާމިޔާބު ކުރައްވާނެ ކަމަށެވެ.

އޮޕީނިއަން ޕޯލްސް އަޅުގަޑުމެންނަށް އެބަ ފެނޭ. އެތަން މިތަނުން. އެންމެ އޮޕީނިއަން ޕޯލެއްވެސް އަޅުގަޑަށް ދައްކަވާ އެހެން ގޮތަކަށް ނަތީޖާ ދައްކާފަ އޮއްވާ، އެންމެ އެންމެ ޚިޔާލު ހޯދުމުގެ އެއްވެސް ވޯޓެއް. އަދި އަޅުގަޑުމެން އެބަ ގެންދަން އަޅުގަޑުމެން އެކިއެކި ކޯލް ސެންޓަރުތައް މެދުވެރިކޮށްގެން މީހުންނާ ވާހަަކަ ދައްކަމުން. ހަމަ އެއްވެސް ތާކުންނެއް އެވިދާޅުވި ބަލި ފެންނާކަށެއް ނެތް. އަދި އަޅުގަޑުމެންގެ ކެމްޕޭން ޓީމުގެ އެއްވެސް މީހަކު ބޭނުމެއްވެސް ނޫން ބަލިވާ ވާހަކައެއްވެސް އަޅުމަޑުމެން ދައްކާކަށެއް.

ނޫސްވެރިންގެ ބައްދަލުވުމުގައި ނަޝީދު ވިދާޅުވިއެވެ. އެހެންނަމަވެސް ޕްރައިމަރީގެ ކެމްޕޭންގައި ބައެއް ރަށްރަށް ކުރެއްވި ދަތުރުފުޅުތަކުގައި، އެމްޑީޕީގެ އާންމު މެމްބަރުންނާއި ބައްދަލުކޮށް ވާހަކަދައްކަވަމުން ނަޝީދު ވަނީ، އިންތިޚާބުން ބަލިވިޔަސް ރައީސް ސާލިހުގެ ފަހަތްޕުޅަށް ނާރުއްވާނޭ ކަމަށް ވިދާޅުވެފައެވެ.