މިއަދު ކުރިޔަށްދާ އެމްޑީޕީގެ ރިޔާސީ ޕްރައިމަރީގެ ވޯޓުލުން ގަޑުބަޑު ކުރުމަށް މަސައްކަތްކުރާ ފަރާތްތަކާމެދު ފިޔަވަޅު އެޅުމަށް، ޕްރައިމަރީގައި ވާދަކުރައްވަމުން ގެންދަވާ އެޕާޓީގެ ރައީސް މުހައްމަދު ނަޝީދު ގޮވާލައްވައިފިއެވެ.

އެމްޑީޕީގެ އެންމެ އިސް ދެ ލީޑަރުން ވާދަކުރައްވަމުން ގެންދަވާ، ރިޔާސީ ޕްރައިމަރީގެ ވޯޓުލުން މިހާރު ކުރިޔަށް ދާއިރު، ގިނަ ރަށްތަކުގައި ދަނީ ހަމަނުޖެހުން ހިނގަމުންނެވެ. އަދި ބައެއް ރަށްތަކުގައި އެމްޑީޕީގެ ދެފެކްޝަންގެ ސަޕޯޓަރުންގެ މެދުގައި ހިނގަމުންދާ ހަމަނުޖެހުންތަކުގައި، ވޯޓު ފޮށިތައް ފަޅާލާ، މަރާމާރީވެސް ވަނީ ހިންގާފައެވެ.

މިފަދަ ބައެއް ރަށްތަކުގައި ވޯޓު ފޮށިތައް ފަޅާލި މީހުން ފުލުހުން މިހާރުވަނީ ހައްޔަރުވެސް ކޮށްފައެވެ.

ނަޝީދު ކުރެއްވި ޓުވީޓުގައި ވިދާޅުވެފައިވަނީ، ބައެއް ވޯޓު ފޮށިތައް ކަރީގައި ތިބި އެމަނިކްފާނުގެ އޮބްޒާވަރުންނާއި އަދި ތާއީދުކުރާ ބައެއް މީހުން ފުލުހުން ހައްޔަރު ކޮށްފައިވާ ކަމުގައެވެ. އަދި ވަނީ އެ ހުރިހާ މީހުން ވަގުތުން ދޫކޮށްލުމަށްވެސް ގޮވާލައްވާފައެވެ.

Baeh vote foshi kaireega alhugadu ge faraathun thibi kithanme observerunnai thaaidhu kuraa meehun fuluhun vanee hayyarukohfa. E meehun vaguthun dhookohlumah adhi vote gadu badu kuraa meehunaai medhu fiyavalhu elhumah govaalan

— Mohamed Nasheed (@MohamedNasheed) January 28, 2023

ވޯޓު ގަޑުބަޑު ކުރުމަށް މަސައްކަތް ކުރަމުން ދާކަމަށް ނަޝީދު ތުހުމަތު ކޮށްފައި ވާއިރު، ވޯޓު ލުމުގައި ބޮޑެތި މައްސަލަތައް ދިމާވެ، ދަނީ ބޮޑެތި ހަމަނުޖެހުންވެސް ހިގަމުންނެވެ. އެއާއެކު، ބައެއް ރަށްތަކުގައި ހިގަމުންދާ ހަމަނުޖެހުންތަކުގައި ޕާޓީގެ މެމްބަރުން ވޯޓު ފޮށިތައް ފަޅަމުން ދާރީ، ޕާޓީންވަނީ ވޯޓު ފޮށިތައް ނުފެޅުމަށްވެސް އިލްތިމާސް ކޮށްފައެވެ.

އެމްޑީޕީން ބުނެފައިވަނީ މިފަދަ ގެއްލުންތައް ޕާޓީއަށް ދޭ މެމްބަރުންނާމެދު ޕާޓީގެ ތެރެއިން އެޅެން ހުރި ފިޔަވަޅު އަޅާނެ ކަމުގައެވެ.

އަދި އިންތިހާބު ކުރިއަށް ގެންދިއުމަށް ކުރަންޖެހުނު ކޮންމެ ކަމެއް ކުރާނެކަމުގެ ޔަގީންކަން އެންމެހާ މެމްބަރުންނަށް އަރުވާކަމަށްވެސް އެމްޑީޕީން ކުރި ޓުވީޓުގައި ބުނެފައި ވެއެވެ.

މިއަދު ކުރިއަށްދާ މި ޕާޓީގެ ރިޔާސީ ޕްރައިމަރީގައި ވޯޓުލާ މަރުކަޒުތަކުގައި ހުރި ވޯޓު ފޮށިތައް ފަޅާ އެކި ވަރުގެ ގެއްލުންތައް ދިނުމުގެ އެއްވެސް ހަރަކާތެއް ނުހިންގުމަށް އިންތިހާބުގައި ވާދަކުރައްވާ ދެ ކެންޑިޑޭޓުންގެ ޓީމުތަކަށާއި އެންމެހާ މެމްބަރުންނަށް އިލްތިމާސްކުރަން.

— MDP Secretariat (@MDPSecretariat) January 28, 2023

މިހާރު ކުރިޔަށްދާ އެމްޑީޕީގެ ރިޔާސީ ޕްރައިމަރީގެ ވޯޓުގައި، ރައީސް ސާލިހަށް ތާއީދުކުރާ ފަރާތްތަކުން، ލިސްޓުގައި ނެތް މީހުންނަށް ވޯޓު ލާން ފުރުސަތު ދިނުމާއި އަދި ދައްކައިގެން ވޯޓުލަމުންދާ ކަމުގެ ތުހުމަތުގައި، ނަޝީދުގެ ސަޕޯޓަރުން ދަނީ ގިނަ ރަށްރަށުގައި ހަމަނުޖެހުން ހިންގަމުންނެވެ.

މިގޮތުން ގދ. ތިނަދޫއާއި އަދި ރަތަފަންދޫގައި ބަހައްޓާފައި ހުރި ވޯޓު ފޮށިތައް ފަޅާލި މީހުން މިހާރު ފުލުހުންވަނީ ހައްޔަރުވެސް ކޮށްފައެވެ.

މައުލޫމާތު ލިބިފައިވާ ގޮތުގައި ފުލުހުން ހައްޔަރު ކޮށްފައިވަނީ ރަތަފަންދޫގައި ބަހައްޓާފަހުރި ވޯޓު ފޮއްޓެ ފަޅާލި 2 މީހަކާއި އަދި ގދ. ތިނަދޫ އަބޫބަކުރު ސްކޫލުގައި ބަހައްޓާފަހުރި ވޯޓު ފޮށި ފަޅާލި ކަމުގައި ތުހުމަތު ކުރެވޭ އެކެކެވެ.

ތިނަދޫއާއި ރަތަފަންދޫގައި ވޯޓު ފޮށިތައް ފަޅާލާފައިވާއިރު، ގދ. ގައްދޫގައި، ވޯޓުލާ ސަރަހައްދަށް ބޮޑީ ކެމެރާ ވައްދައިގެން ވޯޓު ލާން ފެށުމުން، އެރަށުގައި ތިބި ނަޝީދުގެ ސަޕޯޓަރުންވަނީ ވޯޓު ކަރުދާސްތައް ވީދާލާއި، ވޯޓު ފޮށިތައް ފުނޑާލާފައެވެ.

ޚަބަރު އޮންލައިނަށް އެރަށުން މައުލޫމާތު ދިންގޮތުގައި ގައްދޫގައި ހަމަ ނުޖެހުން އުފެދުނީ ރައީސް ސާލިހަށް ތާއިދުކުރާ ފަރާތްތަކުން، ލާ ވޯޓުތައް ފޮޓޯ ނެގުމަށް ބޮޑީ ކެމެރާ ވައްދާ ވޯޓު ފޮއްޓަށް ލާ ވޯޓު ފޮޓޯ ނަގަން ފެށުމާއި ގުޅިގެންނެވެ.

އަދި މިމައްސައާއި ގުޅިގެން އުފެދުނު ހަމަނުޖެހުންތައް ހައްލު ނުވުމާއެކު ނަޝީދަށް ތާއީދުކުރާ ފަރާތްތަކުންވަނީ ވޯޓުލާ މަރުކަޒުތެރެއަށް ވަދެގަނެ، މޭޒުތައް ފުނޑާލާ އަދި ވޯޓު ކަރުދާސްތައްވެސް ވީދާ ހަދާލާފައެވެ.