މިހާރު ކުރިޔަށްދަ އެމްޑީޕީގެ ރިޔާސީ ޕްރައިމަރީގެ ވޯޓު ލުމުގައި، ރާއްޖޭގެ ބައެއް ރަށްތަކުގައި، ލިސްޓުގައި ނަން ނެތް ފަރާތްތަކުން ވޯޓުލަމުން ދިއުމާއި ގުޅިގެން ހަމަނުޖެހުން އުފެދި، ވޯޓު ލުން ހުއްޓުމަކަށް އައިސްފައިވަނިކޮށް، ކެއްތެރިކަމާއި ސުލްހަވެރިކަމާއެކު ވޯޓުލާ ނިންމާލުމަށް ރައީސް ސޯލިހުގެ ކެމްޕޭން ޓީމުން އިލްތިމާސް ކޮށްފިއެވެ.
"އެމްޑީޕީ ކުރިއަށް" ކެމްޕޭނުން ކުރި ޓުވީޓެއްގައި ބުނެފައިވަނީ ވާދަވެރިން ވޯޓު ފޮށިތައް ގަޑުބަޑު ކުރަން އުޅޭ ކަމަށާއި އެކަންކަމާއި ބައިވެރި ނުވުމަށް އިލްތިމާސް ކުރާ ކަމުގައެވެ.
Hurihaa beyfulhunves kehtherikamaa sulhaverikamaa ekee vote laa ninmaala dhehvaa. Iraadhakurehviyya saafu vote akun molhuvaane. Vaadhaverin vote foshithah gadu badukoh maslahathu nagaalan e hingaa evves kamehgai baiveri nuvumah mi campaign ge faraathun edhen#MDPKuriah #Ibu2023
— MDP Kuriah (@MDPKuriah) January 28, 2023
މިހާރު ކުރިޔަށްދާ ޕްރައިމަރީގެ ވޯޓުގައި، ނަޝީދުގެ ސަޕޯޓަރުން އިންތިޚާބު ގަޑުބަޑު ކުރަން އުޅޭކަމުގެ ތުހުމަތު ރައީސް ސާލިހުގެ ކެމްޕޭނުން ތުހުމަތު ކޮށްފައިވާއިރު، މާލޭގެ ބައެއް ދާއިރާތަކާއި އަދި އެހެން ބައެއް ރަށްރަށުގައިވެސް، ލިސްޓުގައި ނަން ނެތް މީހުން ވޯޓުލަމުންދާކަމުގެ ޝަކުވާތައްވަނީ ބޮޑުވެފައެވެ.
މިގޮތުން ގދ. ހޯޑެއްދޫގައި ލިސްޓުގައި ނެތް މީހުން ވޯޓު ލީކަމުގެ ތުހުމަތާއެކު ވޯޓުލުން ހުއްޓުމަށް އައިއިރު، މާލޭ މާފަން ދެކުނު ދާއިރާގަވެސް ވަނީ ލިސްޓުގައި ނެތް މީހުން ވޯޓު ލުމާއި ގުޅިގެން ވޯޓުލުން ހުއްޓުވާފައެވެ.
އޭގެ އިތުރުން ގދ. ގައްދޫގައި، ވޯޓުލާ ސަރަހައްދަށް ބޮޑީ ކެމެރާ ވައްދައިގެން ވޯޓު ލާން ފެށުމުން، އެރަށުގައި ތިބި ނަޝީދުގެ ސަޕޯޓަރުންވަނީ ވޯޓު ކަރުދާސްތައް ވީދާލާއި، ވޯޓު ފޮށިތައް ފުނޑާލާފައެވެ.
ޚަބަރު އޮންލައިނަށް މައުލުމާތު ލިބިފައިވާ ގޮތުގައި ގައްދޫގައި ހަމަ ނުޖެހުން އުފެދުނީ ރައީސް ސާލިހަށް ތާއިދުކުރާ ފަރާތްތަކުން، ލާ ވޯޓުތައް ފޮޓޯ ނެގުމަށް ބޮޑީ ކެމެރާ ވައްދާ ވޯޓު ފޮއްޓަށް ލާ ވޯޓު ފޮޓޯ ނަގަން ފެށުމާއި ގުޅިގެންނެވެ.
އަދި މިމައްސައާއި ގުޅިގެން އުފެދުނު ހަމަނުޖެހުންތައް ހައްލު ނުވުމާއެކު ނަޝީދަށް ތާއީދުކުރާ ފަރާތްތަކުންވަނީ ވޯޓުލާ މަރުކަޒުތެރެއަށް ވަދެގަނެ، މޭޒުތައް ފުނޑާލާ އަދި ވޯޓު ކަރުދާސްތައްވެސް ވީދާ ހަދާލާފައެވެ.
އެހެންނަމަވެސް ފުލުހުންގެ އެހީތެރިކަމާއެކު ފަހުން ވޯޓުލާ މަރުކަޒުން މީހުން ހުސްކޮށްފައިވާކަށް ވަނީ މައުލޫމާތު ލިބިފައެވެ. މައުލުމާތު ލިބެމުންދާ ގޮތުގައި ވޯޓުލުން މިހާރުވަނީ އެރަށުގައި ހުއްޓުމަކަށް އައިސްފައެވެ.
މިއަދު ކުރިޔަށްދާ އެމްޑީޕީގެ ރިޔާސީ ޕްރައިމަރީގައި އެހެން ބައެއް ސަރަހައްދު ތަކުގައިވެސް ވަނީ ހަމަނުޖެހުން ހިނގާ، ވޯޓުލުންވެސް ފަސްކުރަން ޖެހިފައި ވެއެވެ.
