ރައީސް އެދިވަޑައިގަތީ ޕްރައިމަރީއަށް ފަހު މާޒީ އެކަހެރިކޮށް އެންމެން އެކުގައި މަސައްކަތް ކުރުމަށް

މާދަމާ ބޭއްވުމަށް ހަމަޖެހިފައިވާ އެމްޑީޕީގެ ރިޔާސީ ޕްރައިމަރީ ތަފާތު ބޮޑުކޮށް ކާމިޔާބު ކުރައްވާނެ ކަމަށާއި، އެހެންކަމުން ވާދަވެރިންގެ ކިބައިން އެދިވަޑައިގަންނަވަނީ މާޒީ އެކަހެރިކޮށް، އެންމެ އެކީގައި މަސައްކަތް ކުރުމަށް ކަމުގައި ރައީސް ސާލިހު ވިދާޅުވެއްޖެ އެވެ.

މާދަމާ ބޭއްވުމަށް ހަމަޖެހިފައިވާ އެމްޑީޕީގެ ރިޔާސީ ޕްރައިމަރީގެ ވޯޓު ލުމުގެ ކުރިން ކުރިޔަށްދިޔަ "އެމްޑީޕީ ކުރިޔަށް" ކެމްޕޭންގެ ހަރަކާތްތައް ނިންމާލުމަށް ހުޅުމާލޭގައި ބޭއްވުނު އިވެންޓުގައި ވާހަކަ ދައްކަވަމުން ރައީސް ސާލިހު ވިދާޅުވީ އެންމެ އެކީގައި މަސައްކަތް ކުރެވިއްޖެނަމަ، 2023 ވަނަ އަހަރު ބައްވާ އިންތިޚާބު ބޮޑުތަނުން ފަސޭހަކަމާއެކު އެމްޑީޕީއަށް ކާމިޔާބު ކުރެވޭތަން އެމަނިކުފާނަށް ފެނިވަޑައިގަންނަވާ ކަމުގައެވެ.

އަދި ރައީސް ސާލިހު ވަނީ، މި ކެމްޕޭނަށްފަހު، ކުރިޔަށް އޮތް ރިޔާސީ އިންތިޚާބު ކާމިޔާބު ކުރުމަށް، އެމަނިކުފާނާއެކީ، އެކައްޗެއްގެ ގޮތުގައި ކެމްޕޭންގެ މަސައްކަތް ފަށައިގަތުމަށް ވަދަވެރި ކެނޑިޑޭޓަށް ގޮވާލައްވާފައެވެ.

އަޅުގަޑަށް ހަމަޔަގީން އިރާދަ ކުރެއްވިއްޔާ މާދަމާ އިރު އޮއްސިގެން އަންނާނީ އަނެއްކާވެސް ވަރަަށް އުފާވެރި ދުވަހަކަށް ކަން. އަޅުގަޑު ދަންނަވާލަން ބޭނުންވަނީ އަޅުގަޑުމެންގެ ވާދަވެރިންނަށް މިމަސައްކަތް ނިމުމާ އެކީގަ މާޒީ އެކަހެރިކޮށް މި ވޭދުވެދިޔަ ތަން ބާއްވާފަ އަޅުގަޑުމެން އެކީގަ މަސައްކަތް ކުރަން ނިކުތުމަށް. އަޅުގަޑުމެންނާ އެކީގައި ބައިވެރިވެ، ކުރިޔަށް މިއޮތް ރިޔާސީ އިންތިޚާބު ކާމިޔާބު ކުރުމަށްޓަކާ އެކައްޗެއްގެ ގޮތުގައި މަސައްކަތް ފަށައިގަތުމަށް.

މިއަދު ހަވީރު ހުޅުމާލޭގައި ބޭއްވުނު ކެމްޕޭން އިވެންޓުގައި ވާހަކަ ދައްކަވަމުން ރައިސް ސާލިހު ވިދާޅުވިއެވެ.

"އެމްޑީޕީ ކުރިއަށް" ކެމްޕޭނަށް ތާއީދުކުރާ ގިނަ ބަޔަކު އެއްވި މި އިވެންޓުގައި ވާހަކަ ދައްކަވަމުން ރައީސް ސާލިހު ވިދާޅުވީ މާދަމާއަކީ ވަރަށް އުފާވެރި ދުވަހަކަށް އިރު އޮއްސިގެން އަންނާނެ ދުވަހެއް ކަމުގައެވެ. އަދި ވިދާޅުވީ މާދަމާ އޮންނަ ރިޔާސީ ޕްރައިމަރީ ބޮޑު ތަފާތަކުން ކާމިޔާބު ކުރައްވާނެ ކަމުގައެވެ.

މިހާރު ކުރިޔަށްދާ އެމްޑިޕީގެ ރިޔާސީ ޕްރައިމަރީގެ، ރައީސް ސާލިހުގެ އެންމެ ފަހުގެ ކެމްޕޭން ހަރަކާތްތައް ރާއްޖޭގެ އެކި ކަންކޮޅުތަކުގައި މިއަދު ހަވީރު ވަނީ ބާއްވާފައެވެ. ހުޅުމާލޭގެ އިތުރުން ރާއްޖޭގެ ގިނަ ރަށްތަކުގައި ކުރިޔަށް ދިޔަ، ރައީސް ސާލިހުގެ ކެމްޕޭންގެ އެންމެ ފަހުގެ ހަރަކާތްތަކަށް ރައީސް ސާލިހުގެ ފެކްޝަނަށް ތާއީދުކުރާ ގިނަ އަދަދެއްގެ މެމްބަރުން ނުކުމެފައި ވެއެވެ.

މިގޮތުން މާލޭ ސަރަހައްދުގެ ކެމްޕޭން ހަރަކާތް ނިންމާލާފައިވަނީ ހުޅުމާލޭ ރުއްގަޑު ސަރަހައްދަށް އެއްވެ ބޭއްވި ހަރަކާތަކަށް ފަހުއެވެ. މި ހަރަކާތުގައި ރައީސް ސާލިހަށް ތާއީދުކުރާ، އެމްޑީޕީގެ އެތައް ސަތޭކަ މެމްބަރުންނެއް ބައިވެރި ވެފައިވެއެވެ.

އަދި މިހަރަކާތުގައި ރައީސް ސާލިހު ބައިވެރިވެ ވަޑައިގެންފައިވާއިރު، މިހަރަކާތް ނިންމާލާފައިވަނީ ކުރެވުނު ޚައްސަ ދުޢާއަކުންނެވެ. އޭގެ އިތުރުން ރާއްޖޭގެ އެހެން ބައެއް ރަށްތަކުގައި ސައިކަލް ބުރުތަކާއި، ހަވީރު ސަޔާއި، އަދި ހިގާލުންތައްވެސް ބާއްވާފައި ވެއެވެ.

މީގެ ތެރޭގައި އާބާދީ ބޮޑު ބައެއް ރަށްތައް ކަމުގައިވާ ގއ. ވިލިގިއްޔާއި ގދ. ތިނަދޫވެސް ހިމެނެއެވެ.

އެމްޑީޕީގެ ރިޔާސީ ޕްރައިމަރީގައި ރައީސް ސާލިހާއި ވާދަ ކުރައްވަމުން ގެންދަވާ އެޕާޓީގެ ރައީސް މުހައްމަދު ނަޝީދުގެ ކެމްޕޭން ހަރަކާތް ނިންމާލާފައިވަނީ މާލޭގެ މަގުތަކުގައި ބޭއްވުނު ޚާއްސަ ހިގާލުމަކުންނެވެ. މި ހިނގާލުމުގައިވެސް ނަޝީދަށް ތާއީދުކުރާ ގިނަ އަދަދެއްގެ މެމްބަރުން ވަނީ ބައިވެރި ވެފައެވެ.

މާދަމާ ބޭއްވުމަށް ހަމަޖެހިފައިވާ އެމްޑީޕީގެ ރިޔާސީ ޕްރައިމަރީގެ ކެމްޕޭން ދެފަރާތުންވެސް ވަރަށް ވާދަވެރިކޮށް ކޮށްފައި ވާއިރު، ރޭ ދެ ޓީމުންވެސް ވަނީ ކެމްޕޭންގެ ބޮޑު ދެ ޖަލްސާ ބާއްވާފައެވެ.

މިގޮތުން ރައީސް ސާލިހުގެ ކެމްޕޭން ޖަލްސާ އައްޑު އަތޮޅު ހިތަދޫގައި ބާއްވާފައިވާއިރު ނަޝީދުގެ ކެމްޕޭން ޖަލްސާ ބާއްވާފައިވަނީ މާލޭގެ އާރޓިފިޝަލް ބީޗުގައެވެ. މި ދެ ޖަލްސާއަށްވެސް ގިނަ އަދަދެއްގެ ސަޕޯޓަރުން ހާޒިރުވެފައިވާކަން ފާހަގަ ކޮށްލެވެއެވެ.

ރައީސް ޞާލިހުވެސް ރައީސް ނަޝީދުވެސް ވިދާޅުވަމުންދަނީ މިއިންތިޚާބު ބޮޑު ތަފާތަކުން ކާމިޔާބު ކުރްއްވަނެ ކަމުގައެވެ.

އެމްޑީޕީން ބުނެފައިވަނީ މި އިންތިޚާބުގައި 200އަށް ވުރެ ގިނަ ވޯޓު ފޮށި ބެހެއްޓުމަށް ނިންމާފައިވާކަމަށެވެ. އެގޮތުން މާލެ ސަރަހައްދުގައި ޖުމްލަ 49 ވޯޓު ފޮށި ބަހައްޓާއިރު، އަތޮޅުތެރޭގައި 194 ވޯޓު ފޮށި ބަހައްޓަން އެޕާޓިން ނިންމާފައިވެއެވެ.މި އިންތިޚާބުގައި ވޯޓުލުން ކުރިއަށްދާނީ މާދަމާ ހެނދުނު 9:00 އިން ހަވީރު 5:00 އަށެވެ.

މި އިންތިޚާބުގައި މޮނީޓަރުންގެ މީޑިއާތަކުންވެސް ހަރަކާތްތެރި ވާނެއެވެ. މިގޮތުން ކޮންމެ ވޯޓު ފޮއްޓެއްކައިރި އެއްވަގުތެއްގައި ހަރަކާތްތެރިވެވޭނީ ކޮންމެ ޕްރިންޓް އަދި އޮންލައިން މީޑިއާ އަކުން އެއްބޭފުޅަކަށާއި އަދި ކޮންމެ ޓީވީ ސްޓޭޝަނަކުން 2 މީހަކަށް ކަމަށް އެމްޑޕީން ވަނީ ބުނެފައެވެ.

މިއިންތިޚާބުގައި ވޯޓުލާ އެމްޑީޕީގެ ވޯޓާސް ހިމެނެނީ އެޕާޓީގެ 57،257 މެމްބަރުންނެވެ.