އަންނަ ހޮނިހިރުދުވަ ބޭއްވުމަށް ހަމަޖެހިފައިވާ އެމްޑީޕީގެ ރިޔާސީ ޕްރައިމަރީގެ ވޯޓުލުން ހައިޖެކް ކުރަން ފުރުސަތު ނުދެނެ ކަމުގައި އިންތިހާބުގެ ކަންކަން އިންތިޒާމު ކުރަން ނަގާފައިވާ ކޮމިޓީގެ މުޤައްރިރު އިބްރާހިމް ވަހީދު (އިބުރޭ) ވިދާޅުވެއްޖެއެވެ.
އެ ކޮމިޓީން މިކަން ހާމަކޮށްފައިވަނީ ކުރިޔަށް އޮތް އެމްޑީޕީގެ ޕްރައިމަރީގެ ވޯޓުލުމާއި ގުޅޭގޮތުން ނޫސްވެރިންނަށް މައުލޫމާތު ދިނުމަށް މިއަދު ބޭއްވި ނޫސްވެރިންގެ ބައްދަލުވުމުގައެވެ.
މި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އިބުރޭ ވިދާޅުވީ ވޯޓާސް ލިސްޓުގައި ސޮއިކުރުމަށް، އިންތިޚާބުގައި ވާދަކުރައްވާ އެޕާޓީގެ ރައީސް މުހައްމަދު ނަޝީދުގެ ފަރާތުން ހުށަހަޅުއްވާފައިވި ނަމަވެސް، ވޯޓާސް ލިސްޓުގައި ސޮއިކުރުމަކީ އެއްވެސް އިރަކު އެޕާޓީން ބާއްވާ އިންތިޚާބުތަކުގައި ކޮށްފައިވާ ކަމެއް ނޫންކަމުގައެވެ.
އޭގެ ސަބަބެއް ކަމުގައި އޭނަ ވިދާޅުވީ އެއް ފަރާތުން ވޯޓާސް ލިސްޓުގައި ސޮއި ނުކޮށްފިނަމަ، އިންތިޚާބު ކުރިޔަށް ނުގެންދެވި، އިންތިޚާބު ހައިޖެކް ކުރުމުގެ ފުރުސަތު އެފަތާރަކަށް އަބަދުވެސް ލިބިގެން ދިއުމެވެ. އަދި އޭނާ ވިދާޅުވީ އިންތިޚާބު ހައިޖެކް ކުރުމުގެ ފުރުސަތަކީ އެމްޑީޕީން ދޭނެ ފުރުސަތެއް ނޫންކަމުގައެވެ.
ނޫސްވެރިންނަށް އިތުރަށް މައުލޫމާތު ދެއްވަމުން އޭނާ ވިދާޅުވީ ވޯޓާސް ލިސްޓުގައި ނަން ނެތް މީހުންނަށްވެސް ވޯޓުލާން ދާން މެސެޖްތައް ކުރަމުންދާ ކަމުގައެވެ. އަދި އޭނާ ވިދާޅުވީ ވޯޓާސް ލިސްޓު ވަނީ އެތައް ދުވަހެއް ކުރިން އާންމު ކޮށްފައި ކަމަށާއި، ވޯޓުލާ މަޒުކަޒުތަކަށް ދިޔަނަމަވެސް ވޯޓާސް ލިސްޓުގައި ނަން ނެތް ފަރާތަކަށް ވޯޓު ލުމުގެ ފުރުސަތު ނޯންނާނެ ކަމުގައެވެ.
މެސެޖު ވެސް އެބަ ފޮނުއްވާ، އެ ދުވަހު [ވޯޓު ލާ ދުވަހު] އެތަނަށް ދުރުވާށޭ. ވޯޓު ލެވޭނެޔޭ. އެ ކަހަލަ ކަންކަން ނުކުރެއްވުމަށް އަޅުގަނޑު ދަންނަވަން ކޮންމެ ބަޔަކު ކުރިޔަސް. އެއީ މި އިންތިހާބުގައި ކޮންމެވެސް ކަމެއް ކުރުމުގެ ނިޔަތުގައި ނޫނީ އެ ކަހަލަ މެސެޖެއް ދިނުމުގެ ބޭނުމެއް ނެތް ކަމަށް އަޅުގަނޑު ގަބޫލުކުރަނީ.
ނޫސްވެރިންނަށް މައުލޫމާތު ދެއްވަމުން އިބުރޭ ވިދާޅުވިއެވެ.
އިބުރޭ އިތުރަށް ވިދާޅުވީ މިފަހަރުގެ އިންތިޚާބަށް 555 ޝަކުވާ މިހާތަނަށް ލިބިފައިވާކަމަށެވެ. އަދި އެ ހުރިހާ ޝަކުވާއަކަށްވެސް މިހާރު ޖަވާބު ދީފައިވާނެކަމަށްވެސް އޭނާ ވިދާޅުވިއެވެ.
އިބުރޭ ވިދާޅުވީ އިންތިޚާބަށް ވާންޖެހޭ ހުރިހާ ތައްޔާރީއެއް މިހާރުވެވި ނިމިފައި ވާކަމުގައެވެ.
އަންނަ ހޮނިހިރު ދުވަހު ވޯޓުލާއިރު ދެ ކެނޑިޑޭޓުންވެސް ދަނީ ވަރަށް ފޯރީގައި ކެމްޕެއިން ކުރައްވަމުންނެވެ. ރައީސް ޞާލިހުވެސް އަދި ރައީސް ނަޝީދުވެސް ވަރަށް އިތުބާރާއިއެކު ވިދާޅުވަމުންދަނީ މިއިންތިޚާބު ކާމިޔާބު ކުރާނެކަމަށެވެ.
އެމްޑީޕީން ބުނެފައިވަނީ މި އިންތިޚާބުގައި 200އަށް ވުރެ ގިނަ ވޯޓު ފޮށި ބެހެއްޓުމަށް ނިންމާފައިވާކަމަށެވެ. އެގޮތުން މާލެ ސަރަހައްދުގައި ޖުމްލަ 49 ވޯޓު ފޮށި ބަހައްޓާއިރު، އަތޮޅުތެރޭގައި 194 ވޯޓު ފޮށި ބަހައްޓަން އެޕާޓިން ނިންމާފައިވެއެވެ.މި އިންތިޚާބުގައި ވޯޓުލުން ކުރިއަށްދާނީ 28 ވަނަ ދުވަހުގެ ހެނދުނު 9:00 އިން ހަވީރު 5:00 އަށެވެ.
މި އިންތިޚާބުގައި މޮނީޓަރުންގެ ގޮތުގައި ހަރަކާތްތެރިވާން ބޭނުންވާ މީޑިއާތަކަށް ވެސް މިހާރު ވަނީ އެ ފުރުސަތު ހުޅުވާލާފައެވެ. މި ފުރުސަތު ހުޅުވާލާފައި ވަނީ މި މަހުގެ 20 ވަނަ ދުވަހުގެ 12:00އާއި ހަމައަށެވެ. ކޮންމެ ވޯޓު ފޮއްޓެއްކައިރި އެއްވަގުތެއްގައި ހަރަކާތްތެރިވެވޭނީ ކޮންމެ ޕްރިންޓް އަދި އޮންލައިން މީޑިއާ އަކުން އެއްބޭފުޅަކަށާއި އަދި ކޮންމެ ޓީވީ ސްޓޭޝަނަކުން 2 މީހަކަށް އެ ޕާޓީން ބުންޏެވެ.
އެމްޑީޕީންވަނީ ޕާޓީގެ ވޯޓާސް ލިސްޓުވެސް މިހާރު އާންމުކޮށްފައެވެ. އެ ލިސްޓުގައި ހިމެނެނީ 57،257 މީހުން ވޯޓު ލެވޭނެކަމަށް ބުނެފައިވެއެވެ.
