4 އަހަރުން ކުރަމުން މިދަނީ ފާއިތުވި 40 އަހަރުދުވަހު ނުކުރެވި ހުރި މަސައްކަތްތައް: ރައީސް

މި 4 އަހަރު ދުވަހުގެ ތެރޭގައި ކުރަމުން މިދަނީ ފާއިތުވި 40 އަހަރު ތެރޭގައި ނުކުރެވި ހުރި މަސައްކަތައް ކަމުގައި ރައީސުލްޖުމްހޫރިއްޔާ އިބުރާހިމް މުހައްމަދު ސާލިހު ވިދާޅުވެއްޖެއެވެ.

އެމްޑީޕީގެ ރިޔާސީ ޕްރައިމަރީގެ ކެމްޕޭންގައި ކ. އއ. އަދި އދ އަތޮޅަށް މިހާރު ކުރައްވަމުން ގެންދަވާ ދަތުރުފުޅުގުގައި އއ. މާޅޮހަށް ވަޑައިގެން އެރަށުގެ އެމްޑީޕީގެ މެމްބަރުންނާއި ބައްދަލުކޮށް ވާހަކަ ދައްކަވަމުން ރައީސް ސާލިހު ވިދާޅުވީ އިހުމާލެއް ބަޔަކާ ދޭތެރޭ ވެވޭނީ މިހާވަރަކަށް ކަމަށާއި، އެމަނިކްފާނަށް ފާއިތުވި 4 އަހަރު ކުރައްވަން ޖެހިވަޑައިގަތީ ފާއިތުވި 40 އަަހަރު ނުކުރެވި ހުރި މަސައްކަތައް ކަމުގައެވެ.

40 އަހަރު ދުވަހުގެ ތެރޭގައި ނުކުރެވިހުރި މަސައްކަތް މި 4 އަހަރު ދުވަހުގެ ތެރޭގައި ކުރާ ވާހަކަ. އިހުމާލެއް ބަޔާކާ ދޭތެރޭގަ ވެވޭނީ މިވަރަށް ނޫންތޯ!.. ދައުލަތަށް އެންމެ ގިނަ ފައިސާ ދައްކާ އެސެޓްތައް ހުރި ތަނެއްގަ ރައްޔިތުން ދިރިއުޅެމުންދާ ހާލު ދެންމެ… އ ވިދާޅުވީ. އަޅުގަޑުމެންނަށް އެކަން ބަލާކަށް ތިބެވޭކަށް ނެތް.

ރައީސް ސާލިހި ވިދާޅުވިއެވެ.

މި ބައްދަލުވުމުގައި އިތުރަށް ވާހަކަ ދައްކަވަމުން ރައީސް ސާލިހު ވިދާޅުވީ، ވެރިކަމަށް ވަޑައިގަތުމަށްފަހު އެންމެ ފުރަތަމަ ދުވަހުން ފެށިގެންވެސް މަސައްކަތް ފެއްޓެވީ މިގޮތަށް އަސާސީ ޚިދުމަތްތަކަށް ބޭނުންވެފައި ހުރި ރަށްރަށަށް އެ ޚިދުމަތްތައް ފޯރުކޮށް ދިނުމަށް ކަމަށެވެ.

"އެމްޑީޕީ ކުރިއަށް" ކެމްޕޭންގައި ރައީސް ސާލިހު މިހަފްތާގައި ވަޑައިގެންފައިވަނީ ކ. އއ. އަދި އދ.ގެ ރަށްތަކަށެވެ. މި ރަށްތަކަށް ދަތުރު ކުރެއްވުމަށްފަހު ރޭގެ ވަގުތެއްގައި ރައީސްވަނީ އެނބުރި މާލެވަޑައިގެންފައެވެ.

"އެމްޑީޕީ ކުރިއަށް" ކެމްޕޭންގެ ފަރާތުން ހާމަ ކޮށްފައިވާ ގޮތުގައި، ރައީސް ސާލިހުގެ ކެމްޕޭން ނިންމާލުމުގެ ގޮތުން އައްޑޫ ސިޓީގައި ބޮޑު ޖަލްސާއެއް ބޭއްވުމަށް ވަނީ ހަމަޖެހިފައެވެ.

"އައްޑޫ ޖަލްސާ"ގެ ނަމުގައި ބާއްވާ މި ޖަލްސާ ބޭއްވުމަށް ހަމަޖެހިފައިވަނީ މިމަހުގެ 26 ވަނަ ދުވަހުގެ ރޭ 8:30 ގައި ސ. ހިތަދޫ ސިޓީ ބާޒާރު ސަރަހައްދުގައި ކަމުގައެވެ.

އައްޑޫ ސިޓީގައި ބޮޑު ޖަލްސާއެއް ބޭއްވުމަށް ރަައީސް ސާލިހުގެ ކެމްޕޭނުން ނިންމާފައިވާއިރު، ފާއިތުވެދިޔަ ހަފްތާގައި މާލޭގައިވެސް ވަނީ ކެމްޕޭންގެ ބޮޑު ޖަލްސާއެއް ބާއްވާފައެވެ. މި ޖަލްސާއަށް ކައިރި ބައެއް ރަށްރަށުން މީހުން ހާޒިރުވިއިރު، ރައީސް ސާލިހަށް ތާއީދުކުރާ އެތައް ސަތޭކަ އެމްޑީޕީ މެމްބަރުންނެއްވަނީ މިޖަލްސާގައި ބައިވެރި ވެފައެވެ.