މިހާރު ކުރިށްދާ އެމްޑީޕީގެ ޕްރައިމަރީ ނަޝީދަށް ކާމިޔާބު ކޮށްދިނުމަށް އިދިކޮޅީ ޕީޕީއެމްއިން މަސައްކަތް ކުރަމުންދާކަމަށް ރައީސް ސާލިހު ތުހުމަތު ކުރައްވައިފިއެވެ.
އިދިކޮޅު ޕީޕީއެމްއިން ނަޝީދަށް ޕްރައިމަރީ ކާމިޔާބު ކޮށްދީ، އެމްޑީޕީއަށް ރިޔާސީ އިންތިޚާބު ކާމިޔާބު ވިޔަ ނުދޭންކަމަށް މޭރުންކޮށް ރައީސް ސާލިހު ވާހަކަ ދައްކަވާފައިވަނީ ކުރިޔަށް ރިޔާސީ ޕްރައިމަރީގެ ކެމްޕޭންގައި މިއަދު އއ. މާޅޮހަށް ވަޑައިގެން އެރަށުގައި އެމްޑީޕީގެ މެމްބަރުންނާއި މުޚާތަބްކޮށް ވާހަކަ ދައްކަވަމުންނެވެ.
ބައެއް ރަށްރަށުން އެ މަންޒަރު މިހާރު ފެންނަމުންދޭ. ތިބޭފުޅުން ވިސްނަވަން ވާނެ މަގްސަދަކީ ކޮބައިތޯ، އެ ބޭފުޅުން ކުރައްވަނީ ކޮން ކަމެއް ކަން ސާފުކޮށް. އެމްޑީޕީ އަށް ވެރިކަމުގައި ދެމިތިބެ އޮތްކަން އެނގޭތީ އެކަމަށް ހުރަސް އަޅަން އޮތް ކަންތައްތައް އެބޭފުޅުން އެ ކުރައްވަނީ.
އިދިކޮޅު ޕީޕީއެމްއިން އެމަނިކްފާނާއި ދެކޮޅަށް ރަށްރަށުގައި ހިންހަމުންދާ ހަރަކާތްތަކަކީ މިއިންތިޚާބު އެމަނިކްފާނަށް ކާމިޔާބު ކުރެވި، އަދި ރިޔާސީ އިންތިޚާބުވެސް އެމްޑީޕީއަށް ކާމިޔާބު ކުރެވޭނެކަން ޔަގީންވާތީ ހިންގަމުންދާ ހަރަކާތަތަކެއް ކަމަށް މޭރުންކޮށް ވާހަކަ ދައްކަވަމުން ރައީސް ސާލިހު ވިދާޅުވިއެވެ. އަދި މިއީ އެމްޑީޕީގެ މެމްބަރުން ވަރަށް ފުންކޮށް ވިސްނާޖެހޭނެކަމެއް ކަމުގައިވެސް ރައީސް ވިދާޅުވިއެވެ.
މާޅޮހުގެ ރައްޔިތުންނާއި ބައްދަލުކޮށް ވާހަކަ ދައްކަވަމުން ރައީސް ސާލިހު ވިދާޅުވީ، އިދިކޮޅު ޕީޕީއެމްއިން އެމްޑީޕީގެ ޕްރައިމަރީގެ ތެރެއަށްވަދެ ޕްރައިމަރީ ގަޑުބަޑުކުރުމަށް މަސައްކަތް ކުރަމުންދަނީ ކުރިޔަށް އޮތް ރިޔާސީ އިންތިޚާބު އިދިކޮޅަށް ކާމިޔާބު ކުރެވެން އޮތް ހަމައެކަނި މަގަކީ އެއީ ކަމަށް ދެކިގެން ކަމުގައެވެ.
ކުރިއަށް އޮތް ރިޔާސީ އިންތިހާބުގައި ކިރިޔާ ވެސް، އެ ބޭފުޅުންނަށް ވާދަ ކޮށްލެވެން އޮތީ މީގެތެރެއަށް ވަދެ މި ގަޑުބަޑު ކޮށްގެން ކަމަށް ފެންނާތީ އެބޭފުޅުން ނުކުމެ އެ ތިބީ.
ރައީސް ސާލިހު ވިދާޅުވިއެވެ.
އއ. އަދި އދ. އަށް މިހާރު ކުރައްވަމުން ގެންދަވާ ދަތުރުފުޅުގައި އދ. ދަނގެއްޗަށް ވަޑައިގެން ރައީސް ސާލިހު ވިދާޅުވެފައިވަނީ އެމްޑީޕީގެ ރިޔާސީ ޕްރައިމަރީގެ ނަތީޖާ ނިމިގެންދާ ގޮތަކުން އަނެއްކާވެސް މަގުމަތިވާން ޖެހިދާނެކަމުގައެވެ.
އަދި ވިދާޅުވީ ޕްރައިމަރީން އެމްޑީޕީގެ މެމްބަރުން ހޮއްވަވާ ދެއްވަންވާނީ ކުރިޔަށް އޮތް ރިޔާސީ އިންތިޚާބަށް އެހެން ޕާޓީތަކާއެކި ގުޅިގެން މަސައްކަތް ކުރެއްވޭނެ ކެނޑިޑޭޓަކު ކަމުގައެވެ. އަދި ވިދާޅުވީ އެންމެން ގޮވައިގެން އެކީ ކުރިޔަށް ވަޑައިގެންނެވޭނެކަން އެމަނިކްފާނު ވާނީ ސާބިތުކޮށްދެއްވާފަ ކަމުގައެވެ.
މި ޕްރައިމަރީ ނިމިގެންދާ ގޮތަކުން އެނބުރި އަނެއްކާވެސް މަގުމަތިވާން ޖެހިދާނެ. އެއީކީއެއް ހަމަ ގައިމު ވެސް ރައްޔިތުން އެދޭނެ ގޮތެއް ނޫން.
އދ. ދަނގެތީގައި ވާހަކަ ދައްކަވަމުން ރައީސް ސާލިހު ވިދާޅުވިއެވެ.
އިދިކޮޅު ޕީޕީއެމްއިން ނަޝީދަށް އިންތިޚާބު ކާމިޔާބު ކޮށްދޭން މަސަައްކަތް ކުރަމުންދާކަމަށް ރައީސް ސާލިހު ތުހުމަތު ކުރައްވާއިރު، މީގެ ކުރިން ޑިފެންސް މިނިސްޓަރު މާރިޔާދީދީވެސް ވަނީ، ނަޝީދު ރަށްރަށަށް ވަޑައިގަންނަވާއިރު، ޕޯސްޓަރުތައް ތަތްކުރުމާއި ބެނަރތައް ދެމުމުގައި ހަރަކާތްތެރި ވަމުންދަނީ ޕީޕީއެމްގެ އެކްޓިވިސްޓުން ކަމުގައި ވިދާޅުވެފައެވެ.
އަދި މާރިޔާ ވިދާޅުވީ އެންމެ ބިރު ހީވަނީ ނަޝީދު އިދިކޮޅު ޕީޕީއެމްއާ ކޯލިޝަން ހައްދަވާފާނެތީ ކަމުގައެވެ.
ކޮމެންޓު ފޮނުވާ