ރައްޔިތުންނަށް ފައިދާހުރި ކަންކަމަކީ އަމަލީ ގޮތުން ފެންނަ ކަންކަން ކަމުގައި ސަރުކާރު ކޯލިޝަންގައި ހިމެނޭ އަދާލަތު ޕާޓީގެ ރައީސް އަދި ހޯމް މިނިސްޓަރ އިމްރާން ވިދާޅުވެއްޖެއެވެ.

މިނިސްޓަރ އިމްރާން މިހެން ވިދާޅުވީ އަންނަ ހޮނިހިރު ދުވަހު ބާއްވާ އެމްޑީޕީގެ ރިޔާސީ ޕްރައިމަރީގެ ކެމްޕެއިންގައި އެޕާޓީގެ ރައީސް މުހައްމަދު ނަޝީދަށް އަމާޒުކޮށް ކަމަށް ބެލެވެއެވެ. ރައީސް ނަޝީދު ގެންދަވަނީ ސަރުކާރުގެ ސިޔާސަތުތަކަށާއި، ރައީސް ޞާލިހަށް ވަރަށް ބޮޑަށް މި ކެމްޕެއިންގައި ފާޑު ވިދާޅުވަމުންނެވެ.

އިމްރާން ވިދާޅުވީ ރައްޔިތުންނަށް ފައިދާ ގޮތަށް ކުރެވޭ ކަންކަމަކީ އަމަލީ ގޮތުން އެކަންކަން ފެންނަ ހުންނަ ކަންކަން ކަމަށެވެ. ރައްޔިތުން ގަބޫލުކުރާގެ ހަގީގަތަކީ އަދި ފެންނަން ހުންނަ ކަންކަމަކީ ރައްޔިތުން ބަލައި ގަންނަ ކަންކަން ކަމަށްވެސް އިމްރާން ވިދާޅުވިއެވެ. އިމްރާންގެ ޓުވީޓުގައި ފެންނަން ހުރި ވަކި ކަމަކަށް އިޝާރާތް ކުރައްވާފައި ނުވެއެވެ.

ޤައުމާއި ރައްޔިތުންނަށް ފައިދާހުރި ކަންކަމަކީ އަމަލީ ގޮތުން ފެންނަ ކަންކަމެވެ. ދައްކާ ވާހަކައަށްވުރެއް ބޮޑަށް ބަލައި ގަންނާނީ ފެންނަން ހުންނަ ހަގީގަތް ތަކެވެ.

– އިމްރާން ވިދާޅުވިއެވެ.

އެމްޑީޕީގެ ޕްރައިމަރީގައި އަދާލަތު ޕާޓީގެ އިސްކޮށް ތިއްބެވި ގިނަ ބޭފުޅުން ގެންދަވަނީ ނުސީދާ ގޮތެއްގައި ރައީސް ޞާލިހަށް ކެމްޕެއިން ކުރައްވައި ރައީސް ނަޝީދަށް ފާޑު ވިދާޅުވަމުންނެވެ. އެމްޑީޕީގެ ޕްރައިމަރީގައި ވޯޓުލުން ކުރިއަށްދާނީ ހޮނިހިރު ދުވަހުގެ ހެނދުނު 9:00 އިން ހަވީރު 5:00 އަށެވެ. އެ ޕާޓީގެ ވޯޓާސް ލިސްޓުވެސް މިހާރު އާންމުކޮށްފައެވެ. އެ ލިސްޓުގައި ހިމެނެނީ 57،257 މީހުން ވޯޓު ލެވޭނެކަމަށް ބުނެފައިވެއެވެ.

މި ޕްރައިމަރީގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހާއި، ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވާދަކުރައްވާއިރު އިންތިޚާބުގެ ކެމްޕޭން ހަރަކާތްތައް މިހާރު ދަނީ ކުރިއަށެވެ.