މަޝްހޫރު ވިޔަފާރި ވެރިޔާ އަދި މޯލްޑިވްސް އެއާޕޯޓްސް ކޮމްޕެނީ، އެމްއޭސީއެލްގެ ބޯޑު މެމްބަރު އިބުރާހިމް ނޫރައްދީން، ކުރިޔަށް އޮތް އެމްޑީޕީގެ ރިޔާސީ ޕްރައިމަރީގައި ރައީސް ސާލިހަށް ތާއީދުކުރައްވާކަން ހާމަ ކުރައްވައިފިއެވެ.
އޭނާ ސޯޝަލް މީޑިއާގައި ހިއްސާ ކުރި މެސެޖެއްގައި ވިދާޅުވެފައިވަނީ މިވަގުތު ރާއްޖެއަށް އެންމެ ބޭނުންތެރީ ހަމަޖެހުމާއި ސުލްހަ މަސަލަސްކަން ކަމުގައެވެ. އެގޮތުން މަޝްވަރާގެ އުސޫލުގެ މަތިން ރޭވުންތެރިކަމާއެކު ހަރުދަނާ ނިންމުންތައް ނިންމުމުގެ ގާބިލްކަން ހުރި ލީޑަރަކު ރާއްޖެއަށް ބޭނުންތެރި ކަމުގައި އޭނާ ވިދާޅުވެފައި ވެއެވެ.
ނޫރައްދީން ވިދާޅުވެފައިވާ ގޮތުގައި އެމްޑީޕީގެ ޕްރައިމަރީގައި ވާދަކުރައްވާ ދެބޭފުޅުންވެސް އޭނާއަށް އެނގޭތާ 30 އަހަރު ވެއްޖެއެވެ. އަދި ދެބޭފުޅުންވެސް ޑިމޮކްރަސީއަޓަކާ ކޮށްފައިވާ މަސައްކަތުގައި އަމިއްލަފުޅު ގޮތުންނާއި އަދި އޭނާގެ އާއިލާންވެސް ފޯރުކޮށް ދެވުނުހާ އެހީތެރިކަމެއް އޭނާ ފޯރުކޮށް ދީފައިވާނެކަމަށްވެސް ވިދާޅުވެފައި ވެއެވެ.
ރާއްޖެއަށް ބޭނުން ވަނީ އަމާންކަމާއި ހަމަޖެހުމާއި މަޝްވަރާ ކުރައްވާ، ރޭވުންތެރި، ހަމަޖެހޭ ނިންމުން ނިންމާ ލީޑަރެއް. އަޅުގަނޑު މި ހުރީ އިބޫއާއެކު.
ނޫރައްދީން ކުރެއްވި ޓުވީޓުގައި ވިދާޅުވެފައި ވެއެވެ.
އިބްރާހިމް ނޫރައްދީނަކީ ނިސްބަތްވަމީ ރާއްޖޭގައި އެންމެ ފަހުން ވެރިކަން ކުރެއްވި ޝާހީ އާއިލާއަށެވެ. އަދި އޭނާއަކީ އެއާއިލާއިން ރަސްކަން ކުރެއްވި ރަސްގެފާނު ހަސަން ނޫރައްދީނުގެ ދަރިކަލުން އަމީރު މުހައްމަދު ނޫރައްދީންގެ ދަރިކަލުންނެވެ.
