ކުރިޔަށް އޮތްތަނުގައި ޔޫކުރެއިންއަށް އަސްކަރީ އެހީތެރިކަން ފޯރުކޮށް ދިނުމާއި ގުޅޭގޮތުން މަޝްވަރާ ކުރުމަށްޓަކާ ހުޅަނގުގެ 50 ގައުމަކުން ޖާރމަނީގައި ބައްދަލު ކުރަން ފަށައިފިއެވެ.
އެހެންނަމަވެސް، މިހާރު ކުރިޔަށްދާ ޔޫކުރެއިން ހަނގުރާމަ ކާމިޔާބު ކުރުމަށްޓަކާ ޔޫކުރެއިން އެދެމުންދާ ޖާރމަނީގެ ހަނގުރާމަމަތީ ޓޭންކު ޔޫކުރެއިންއަށް ފޯރުކޮށްދިނުމުގެ ހުއްދަ ދޫކުރުމަށް އެގައުމުން އަދިވެސް ފަސްޖެހެމުން ދިއުމާއި ގުޅިގެން، މި 50 ގައުމުގެ މެދުގައި ކުރެވޭ ބަހުސްތަކާއި އަދި މަޝްވަރާތަކުގައި ވަރަށް ބޮޑެތި އުދާސްތައް ހުންނާނެ ކަމުގައި މީޑިއާ ރިޕޯޓުތައް ބުނެއެވެ.
ޔޫކުރެއިންވަނީ ޖާރމަނީން އުފައްދާފައިވާ ހަނގުރާމަމަތީ ލިއޯޕާޑްސް ޓޭންކު އެގައުމަށް ބޭނުންވާކަމަށް ބުނެފައެވެ. މިބާވަތުގެ ޓޭންކު ޖާރމަނީގެ އިތުރުން ޕޮލޭންޑާއި އަދި ޔޫރަޕްގެ އެނޫން ބައެއް ގައުމުތަކުގައިވެސް އެބަހުއްޓެވެ. އެހެނަމަވެސް މިއިން އެއްވެސް ގައުމަކަށް މި ޓޭކްތައް އެހެން ގައުމަކަށް އެކްސްޕޯޓު ކުރެވެން އޮންނަނީ ޓޭންކުތައް އުފެއްދި ގައުމުގެ ހައިސިއްޔަތުން ޖާރމަނީން އެކަމަށް ހުއްދަ ދިނުމުންނެވެ.
އެހެންނަމަވެސް ޕޮލޭންޓުން ބުނެފައިވަނީ، ޖާރމަނީން މި ހުއްދަ ދޫ ނުކުރި ނަމަވެސް، "އާންމު އުސޫލާއި ޚިލާފަށް" ވެސް މި ބްރޭންޑުގެ ޓޭންކު ޔޫކުރެއިންއަށް ފޯރުކޮށްދިނުމަށް އެގައުމު އޮތީ ތައްޔާރަށް ކަމުގައެވެ.
ޔޫކުރެއިން ހަތިޔާރު ފޯރުކޮށް ދިނުމާއި ގުޅޭގޮތުން ހުޅަނގުގެ ގައުމުތަކުން މަޝްވަރާ ކުރަމުން ދާއިރު، ޔޫކުރެއިންގައި މިހާރުވެސް އެންމެ ވަރުގަދައަށް ހަނގުރާމަ ހިނގަމުންދާ ސިޓީ ކަމުގައިވާ ބަޚްމޫޓުގެ ބައެއް ސަރަހައްދުތައް ރަޝިއާގެ ބާރުގެ ދަށަށް މިހާރު ގެނެސްފައިވާކަމަށް އެގައުމުން ވަނީ ބުނެފައެވެ.
ނޭޓީގެ ސެކެޓްރީ ޖެނެރަލް ޖެންސް ސްޓޮލްޓެމްބާރގް ވިދާޅުވެގައި ވާގޮތުގައި ޔޫކުރެއިންއަށް އެހީތެރިކަން ފޯރުކޮށް ދެމުންދާ ގައުމުތަކުން ހަމައެކަނި ވިސްނަންވާނީ މުޅިން އާ ހަތިޔާރުތައް ފޮނުވުމާއެކު، ކުރިން ފޮނުވާގައިވާ ހަތިޔާރުތަކަށް ބޭނުންވާ އެމިއުނިޝަންތައްވެސް ޔޫކުރެއިންއަށް ފޯރުކޮށް ދިނުމަށް ކަމުގައެވެ.
